ಜಾಗತಿಕ ಮಟ್ಟದಲ್ಲಿ ಅತಿ ವೇಗವಾಗಿ ಬೆಳೆಯುತ್ತಿರುವ ಕಂಪೆನಿ ಸ್ಟಾರ್‌ಲಿಂಕ್ ಈಗಾಗಲೇ ಹಲವು ದೇಶಗಳಲ್ಲಿ ಜನರ ಮನೆಬಾಗಿಲಿಗೆ ಇಂಟರ್‌ನೆಟ್ ಸೇವೆ ಒದಗಿಸುತ್ತಿದೆ. ಆದರೆ ಭಾರತಕ್ಕೆ ಸ್ಟಾರ್‌ಲಿಂಕ್ ಅಂತರ್ಜಾಲ ಸೇವೆ ದೊರೆಯುವುದು ಯಾವಾಗ ಎಂಬ ಪ್ರಶ್ನೆಗೆ ಈವರೆಗೂ ನಿರ್ದಿಷ್ಟ ಉತ್ತರ ಸಿಕ್ಕಿಲ್ಲ. ಆದರೆ ಎಲಾನ್ ಮಸ್ಕ್ ಅವರ ಸ್ಟಾರ್‌ಲಿಂಕ್ ಉಪಗ್ರಹ ಆಧಾರಿತ ಇಂಟರ್ನೆಟ್ ನೀಡುವ ತನ್ನ ಸೇವೆಯನ್ನು ಭಾರತದಲ್ಲಿ ಒದಗಿಸಲು 2022ರ ಜನವರಿ 31 ಅಥವಾ ಅದಕ್ಕೂ ಮುನ್ನವೇ ಅನುಮತಿಗಾಗಿ ಅರ್ಜಿ ಹಾಕುವುದಾಗಿ ತಿಳಿಸಿದೆ.

ಗಗನ ಮುಟ್ಟಿರುವ ಅಂತರ್ಜಾಲ ಸೇವೆಗಳ ದರ, ಸಮರ್ಪಕ ಸೇವೆ ದೊರೆಯದೇ ಇರುವುದು, ಗ್ರಾಮೀಣ ಮತ್ತು ಗುಡ್ಡಗಾಡು ಪ್ರದೇಶಗಳಲ್ಲಿ ಇಂಟರ್ನೆಟ್ ಅಥವಾ ಮೊಬೈಲ್ ಸಿಗ್ನಲ್ ಸಹ ಸಿಗದೇ ಇರುವುದು ಇಂತಹ ಅನೇಕಾನೇಕ ಸಮಸ್ಯೆಗಳೇ ಭಾರತದಲ್ಲಿ ಸಂವಹನ ಸಾಧ್ಯತೆಗಳ ಬೆಳವಣಿಗೆಯನ್ನು ಕಡಿಮೆಗೊಳಿಸಿದ್ದವು. ಆದರೆ ಜಿಯೋ ಬಂದಮೇಲೆ ಆದ ಕ್ರಾಂತಿಕಾರಿ ಬೆಳವಣಿಗೆಗಳು ಅಂತರ್ಜಾಲ ಬಳಕೆಯ ಮಟ್ಟವನ್ನು ವೇಗವಾಗಿ ಬೆಳೆಸಿದವು. ಇದಕ್ಕೂ ಮಿರಿ ಉಪಗ್ರಹದಿಂದ ನೇರವಾಗಿ ಟೆಲಿವಿಶನ್ ಸಿಗ್ನಲ್‌ನಂತೆ ಇಂಟರ್ನೆಟ್ ಇಳಿದುಬರುವ ಕಾಲಕ್ಕಾಗಿ ಕಾಯುತ್ತಿರುವ ಭಾರತೀಯರಿಗೆ ಒಳ್ಳೆ ಸುದ್ದಿಯೊಂದು ಸಿಕ್ಕಿದೆ.