ಮಂಗಳೂರು: ನಾನು ಒಬ್ಬ ಬಡ ಸಾಮಾನ್ಯ ಮನುಷ್ಯ. ನಾನು ಇಲ್ಲಿಗೆ ಬರುತ್ತೇನೆ ಎಂದು ಕನಸು ಮನಸ್ಸಿನಲ್ಲೂ ಯೋಚಿಸಿದವನಲ್ಲ. ರಾಷ್ಟ್ರಪತಿ ಪದ್ಮಶ್ರೀ ಪುರಸ್ಕಾರ ಕೊಟ್ಟರು, ಪ್ರಧಾನಿ ನರೇಂದ್ರ ಮೋದಿ ಕೈ ಕುಲುಕಿದರು ಎಂದು ಹರೇಕಳ ಹಾಜಬ್ಬ ಭಾವುಕರಾಗಿ ಹೇಳಿದ್ದಾರೆ.

ದಿಲ್ಲಿಯಲ್ಲಿ ನನಗೆ ರಾಷ್ಟ್ರಪತಿಯವರು ರಾಷ್ಟ್ರದ ನಾಲ್ಕನೇ ಅತೀ ದೊಡ್ಡ ಪದ್ಮಶ್ರೀ ಪುರಸ್ಕಾರವನ್ನು ಕೊಟ್ಟು ಗೌರವಿಸಿದರು. ಬಳಿಕ ಅಧಿಕಾರಿಗಳ ಬೆಂಗಾವಲಿನೊಂದಿಗೆ ಚಹಾ ಕೂಟಕ್ಕೆ ತೆರಳಿದೆ. ಅಲ್ಲಿ ರಾಷ್ಟ್ರಪತಿ ರಾಮನಾಥ ಕೋವಿಂದ್, ಉಪ ರಾಷ್ಟ್ರಪತಿ ವೆಂಕಯ್ಯ ನಾಯ್ಡ, ಪ್ರಧಾನಿ ನರೇಂದ್ರ ಮೋದಿ, ಗೃಹ ಸಚಿವ ಅಮಿತ್ ಶಾ, ವಿತ್ತ ಸಚಿವೆ ನಿರ್ಮಲಾ ಸೀತಾರಾಮ್ ಇದ್ದರು ಎಂದು ತಮ್ಮ ಪುರಸ್ಕಾರ ಸ್ವೀಕಾರದ ಅನುಭವವನ್ನು ಹಾಜಬ್ಬ ಹಂಚಿಕೊಂಡರು.
ನಾನು ಪುರಸ್ಕೃತ ಸರದಿಯಲ್ಲಿ ಪ್ರಧಾನಿ ಮುಂದೆ ಹೋದಾಗ, ಪಕ್ಕದಲ್ಲಿ ಕುಳಿತವರ ಜತೆ ಸ್ವತಃ ಪ್ರಧಾನಿ ಮೋದಿಯವರೇ ನನ್ನನ್ನು ಕುರಿತು ಇವರು ಮಂಗಳೂರಿನಲ್ಲಿ ಆರೇಂಜ್ ಸೇಲ್ ಮಾಡಿ ಶಾಲೆ ಕಟ್ಟಿದವರು ಎಂದು ನನ್ನ ಕೈ ಹಿಡಿದು ಕುಲುಕಿದರು. ನಾನು ಒಂದು ಕ್ಷಣ ಮೂಕವಿಸ್ಮಿತನಾದೆ. ತಕ್ಷಣ ಸಾವರಿಸಿಕೊಂಡು, ನಾನು ಸಂಸದ ನಳಿನ್ ಕುಮಾರ್ ಕಟೀಲ್ ಅವರ ಕ್ಷೇತ್ರದವ ಎಂದು ಕನ್ನಡದಲ್ಲಿ ಹೇಳಿದೆ. ಅವರು ಅಚ್ಛಾ ಹೈ.. ಅಚ್ಛಾ ಹೈ.. ಎಂದು ಮುಗುಳ್ನಕ್ಕು ಅಭಿನಂದಿಸಿದರು. ನನ್ನ ಕೈಯಲ್ಲಿ ಬ್ಯಾಂಡೇಜ್ ಕೂಡಾ ಇದೆ. ಪ್ರಧಾನಿ ನನ್ನ ಕೈ ಹಿಡಿದರೆಂದರೆ ಇದು ನನ್ನ ಪಾಲಿನ ದೊಡ್ಡ ಭಾಗ್ಯ. ಅಲ್ಲಿಂದ ಅಮಿತ್ ಶಾ ಅವರಿಗೂ ಕೃತಜ್ಞತೆ ಸಲ್ಲಿಸಿದೆ. ಮುಂದೆ ನಿರ್ಮಲಾ ಸೀತಾರಾಮ್ ಅವರ ಬಳಿಗೆ ಬಂದೆ. ಅವರ ಬಳಿ ಜನರು ಇರಲಿಲ್ಲ. ಹಾಗಾಗಿ ನಾನು ಅವರ ಜತೆ ಸ್ವಲ್ಪ ಹೊತ್ತು ಮಾತನಾಡಲು ಅವಕಾಶ ಸಿಕ್ಕಿತು ಎಂದರು.