ಈ ದುರಂತದಲ್ಲಿ ನನ್ನ ಬಾಲ್ಯ ಗೆಳೆಯ, ಪ್ರಾಣ ಸ್ನೇಹಿತ ವಿಠ್ಠಲ ಕಾಕಡೆ (27), ಅಳ್ನಾವರದ ಸಾಗರ ಬೀಡಿಕರ (28) ಸಾವನ್ನಪ್ಪಿದರು. ಅವರು ಬೆಂಗಳೂರಿನ ಖಾಸಗಿ ಕಂಪನಿಯಲ್ಲಿ ಕೆಲಸ ಮಾಡುತ್ತಿದ್ದರು. ಸಾಗರ ಬೀಡಿಕರ ಹೊಸದಾಗಿ ಟಾಟಾ ನೆಕ್ಸಾನ್‌ ಖರೀದಿಸಿ ತಿಂಗಳಾಗಿತ್ತು. ವರ್ಕ್ ಫ್ರಂ ಹೋಂ ಹಿನ್ನೆಲೆಯಲ್ಲಿ ಮನೆಯಲ್ಲಿ ಕೆಲಸ ಮಾಡುತ್ತಿದ್ದ. ಹೀಗೆ ಒಂದು ದಿನ ಲಾಂಗ್‌ ಡ್ರೈವ್‌ ಹೋಗಲು ತೀರ್ಮಾನಿಸಿದ್ದೆವು. ಐವರು ಗೋವಾ ರಸ್ತೆಯಲ್ಲಿ ಹೋಗುತ್ತಿದ್ದೆವು. ಚಾಲಕ ಹಾಗೂ ಪಕ್ಕದ ಸೀಟ್‌ನಲ್ಲಿ ಮೃತರಾದ ಸ್ನೇಹಿತರು ಕುಳಿತಿದ್ದರು. ಇಬ್ಬರೂ ಸೀಟ್‌ ಬೆಲ್ಟ್‌ ಹಾಕಿರಲಿಲ್ಲ. ಹೀಗಾಗಿ ಅಪಘಾತವಾದಾಗ ಏರ್‌ಬ್ಯಾಗ್‌ ತೆರೆದುಕೊಳ್ಳದೆ ಗಂಭೀರ ಗಾಯಗೊಂಡು ಕಣ್ಣೆದುರೆ ಅಸುನೀಗಿದರು. ನಾನು ಚಾಲಕನ ಹಿಂಬದಿ ಸೀಟ್‌ ಬೆಲ್ಟ್‌ ಧರಿಸಿ ಕುಳಿತಿದ್ದರಿಂದ ಸಣ್ಣಪುಟ ಗಾಯಗಳು ಮಾತ್ರ ಆಗಿವೆ. ನನ್ನ ಕಣ್ಣೆದುರಿಗೇ ಪ್ರಾಣ ಸ್ನೇಹಿತರಿಬ್ಬರನ್ನು ಸಣ್ಣ ನಿರ್ಲಕ್ಷ್ಯದಿಂದ ಕಳೆದುಕೊಳ್ಳಬೇಕಾಯಿತು.