ಕನ್ನಡ ಚಿತ್ರರಂಗವು ಹಲವಾರು ನಟ ನಟಿಯರಿಗೆ ಬದುಕನ್ನು ನೀಡಿದೆ. ಹಲವಾರು ನಟಿಯರು ಕನ್ನಡ ಚಿತ್ರರಂಗವನ್ನು ದಶಕಗಳ ಕಾಲ ಆಳಿದರು ಎಂದರೆ ತಪ್ಪಿನ ಮಾತಾಗುವುದಿಲ್ಲ. ಕಲ್ಪನ, ಭಾರತಿ, ಮಂಜುಳಾ, ಜಯಂತಿ ಅವರು ೭೦-೮೦ರ ದಶಕದಲ್ಲಿ ಕನ್ನಡ ಚಿತ್ರರಂಗವನ್ನು ಆಳಿದರೆ ೯೦ರ ದಶಕದ ನಂತರ ಕನ್ನಡ ಚಿತ್ರರಂಗದಲ್ಲಿ ಅತಿ ಹೆಚ್ಚು ಹೆಸರು ಮಾಡಿದ ನಟಿಯರಲ್ಲಿ ಪ್ರೇಮಾ ಕೂಡ ಒಬ್ಬರು. ಪ್ರೇಮಾ ಕನ್ನಡ ಮಾತ್ರವಲ್ಲದೆ ತೆಲುಗು, ತಮಿಳು, ಮಲಯಾಳಂ ಚಿತ್ರರಂಗದಲ್ಲೂ ಸಾಕಷ್ಟು ಹೆಸರು ಮಾಡಿದ್ದಾರೆ. ನಟಿ ಪ್ರೇಮಾ ಅವರ ತವರು ಕರ್ನಾಟಕದ ಕಾಶ್ಮೀರ ಎಂದೇ ಖ್ಯಾತಿ ಪಡೆದ ಕೊಡಗು. ಅವರು ಜನಿಸಿದ್ದು ಬೆಂಗಳೂರಿನಲ್ಲೇ ಅದರೂ ಪ್ರಾಥಮಿಕ ಹಾಗೂ ಪ್ರೌಢಶಿಕ್ಷಣವನ್ನು ಮುಗಿಸಿದ್ದು ಕೊಡಗಿನಲ್ಲಿ. ಪ್ರೇಮಾ ಅವರಿಗೆ ಚಿಕ್ಕ ವಯಸ್ಸಿನಿಂದಲೂ ಕಲೆ, ಅಟೋಟಗಳಲ್ಲಿ ಹೆಚ್ಚಿನ ಅಸಕ್ತಿ ಇತ್ತು. ಶಾಲೆಗಳಲ್ಲಿ ಏರ್ಪಡಿಸುವ ನಾಟಕ, ನೃತ್ಯ ಸ್ಪರ್ಧೆಗಳಲ್ಲಿ ಭಾಗವಹಿಸುತ್ತಿದ್ದರು. ಇದೇ ಆಸಕ್ತಿ ಅವರನ್ನು ಮುಂದೆ ಚಿತ್ರರಂಗಕ್ಕೆ ಕರೆತಂದಿತು ಎಂದರೆ ತಪ್ಪಾಗುವುದಿಲ್ಲ.