ಉತ್ತರ ಪ್ರದೇಶಕ್ಕೆ ಮತ್ತು ದೇಶಕ್ಕೆ ಭದ್ರತೆ ಒದಗಿಸುವ ಪಕ್ಷವೇನಾದರೂ ಇದ್ದರೆ ಅದು ಬಿಜೆಪಿ ಎಂದು ಕೇಂದ್ರ ಗೃಹ ಸಚಿವ ಮತ್ತು ಬಿಜೆಪಿಯ ಹಿರಿಯ ನಾಯಕ ಅಮಿತ್ ಷಾ ಹೇಳಿದ್ದಾರೆ.

ಕೋವಿಡ್ ಸೋಂಕಿನ ಕಾರಣ ಚುನಾವಣಾ ಪ್ರಚಾರ ಸಭೆಗಳಿಗೆ ಚುನಾವಣಾ ಆಯೋಗ ನಿರ್ಬಂಧ ವಿಧಿಸಿರುವ ಕಾರಣ ನಾಯಕರು ಮತದಾರ ಪ್ರಭುವಿನ ಮನೆ ಮನೆಗೆ ಎಡತಾಕುತ್ತಿದ್ದಾರೆ. ಕೇಂದ್ರ ಗೃಹ ಸಚಿವ ಅಮಿತ್ ಷಾ ಉತ್ತರ ಪ್ರದೇಶದ ವೃಂದಾವನದಲ್ಲಿ ಗುರುವಾರ ಪಾದಯಾತ್ರೆ ನಡೆಸಿ ಮತಯಾಚಿಸಿದರು.
ಈಗ ನಡೆಯುತ್ತಿರುವ ಚುನಾವಣೆ ಯಾವುದೋ ಅಭ್ಯರ್ಥಿಯನ್ನು ಶಾಸಕನ್ನಾಗಿ ಮಾಡುವುದೋ ಅಥವಾ ಸಿಎಂನನ್ನು ಆರಿಸುವುದೋ ಅಲ್ಲ. ಭವಿಷ್ಯದಲ್ಲಿ ಸುಭದ್ರ ಭದ್ರತೆಯನ್ನು ರಾಜ್ಯಕ್ಕೆ, ದೇಶಕ್ಕೆ ಒದಗಿಸಲು ಸದೃಢ ಸರ್ಕಾರವನ್ನು ಆಯ್ಕೆ ಮಾಡುವುದಾಗಿದೆ. ಉತ್ತರ ಪ್ರದೇಶಕ್ಕೆ ಮತ್ತು ದೇಶಕ್ಕೆ ಭದ್ರತೆ ಒದಗಿಸುವ ಪಕ್ಷವೇನಾದರೂ ಇದ್ದರೆ ಅದು ಬಿಜೆಪಿ ಎಂದು ಕೇಂದ್ರ ಗೃಹ ಸಚಿವ ಮತ್ತು ಬಿಜೆಪಿಯ ಹಿರಿಯ ನಾಯಕ ಅಮಿತ್ ಷಾ ಹೇಳಿದರು.
ವೃಂದಾವನದಲ್ಲಿ ಶ್ರೀಬಂಕೆ ಬಿಹಾರಿ ದೇವಾಲಯಕ್ಕೆ ಭೇಟಿ ನೀಡಿ, ನಂತರ ಮಾತನಾಡಿದ ಅವರು, ಸಮಾಜವಾದಿ ಪಕ್ಷದ ಮುಖ್ಯಸ್ಥ ಮತ್ತು ಮಾಜಿ ಮುಖ್ಯಮಂತ್ರಿ ಅಖಿಲೇಶ್ ಯಾದವ್ ವಿರುದ್ಧ ಕಿಡಿಕಾರಿದರು.
ರಾಜ್ಯದಲ್ಲಿ ಕಾನೂನು-ಸುವ್ಯವಸ್ಥೆ ಬಗ್ಗೆ ಮಾಜಿ ಸಿಎಂಗೆ ಮಾತನಾಡುವ ನೈತಿಕ ಹಕ್ಕು ಇಲ್ಲ. ಏಕೆಂದರೆ ಅವರ ಅಧಿಕಾರಾವಧಿಯಲ್ಲಿ ರಾಜ್ಯ ಗೂಂಡಾರಾಜ್ ಆಗಿತ್ತು. ಯೋಗಿ ಆದಿತ್ಯನಾಥ್ ಸಿಎಂ ಆದ ಮೇಲೆ ಗುಂಡಾಗಳ ಹೆಡಮುರಿ ಕಟ್ಟಿದ್ದಾರೆ ಎಂದರು.
ಅಯೋಧ್ಯೆಯಲ್ಲಿ ರಾಮಮಂದಿರ ನಿರ್ಮಾಣ ಆಗುತ್ತಿದೆ. ಇದರ ಉದ್ಘಾಟನೆಯು ಬಿಜೆಪಿ ಸರ್ಕಾರದಲ್ಲೇ ಆಗಬೇಕೆ ಹೊರತು ಮಂದಿರ ನಿರ್ಮಾಣಕ್ಕೆ ಬದ್ಧತೆಯನ್ನು ವ್ಯಕ್ತ ಪಡಿಸದ ಅನ್ಯಪಕ್ಷದವರ ಆಡಳಿತದಲ್ಲಿ ಅಲ್ಲ. ಆದರೆ, ಯಾದವ್ ಸೇರಿ ಎಲ್ಲರನ್ನೂ ಉದ್ಘಾಟನಾ ಕಾರ್ಯಕ್ರಮಕ್ಕೆ ಆಹ್ವಾನಿಸಲಾಗುವುದು ಎಂದರು.
ಮಥುರಾ-ವೃಂದಾವನ ದೈವಿಕತೆ, ಭವ್ಯತೆ ಮೇಳೈಸಿದೆ. ಲಕ್ಷಾಂತರ ಭಕ್ತರ ಅನುಭೂತಿಗೆ ಇದು ಬಂದಿದೆ ಎಂದ ಅವರು, ಉತ್ತರ ಪ್ರದೇಶದ ಬರ್ಜ್ ಪ್ರದೇಶವು 2014, 2017ರಿಂದ ಬಿಜೆಪಿಯ ಬೆಂಬಲಕ್ಕೆ ನಿಂತಿದೆ. ಆದರೆ, ಬಿಎಸ್ಪಿ ಮತ್ತು ಸಮಾಜವಾದಿ ಪಕ್ಷಗಳು ಒಂದು ಸಮುದಾಯದ ಬಲವರ್ಧನೆಯನ್ನಷ್ಟೆ ಮಾಡುತ್ತಿವೆ ಎಂದು ದೂರಿದರು.