ನವದೆಹಲಿ: ದೇಶದ ವಾಯವ್ಯ ಮತ್ತು ಉತ್ತರ ಭಾಗದ ರಾಜ್ಯಗಳಲ್ಲಿ ಮುಂದಿನ ಮೂರು ದಿನ ಚಳಿ ಅಧಿಕವಾಗಲಿದೆ ಎಂದು ಭಾರತೀಯ ಹವಾಮಾನ ಇಲಾಖೆ (ಐಎಂಡಿ) ತಿಳಿಸಿದೆ.
ರಾಜಸ್ಥಾನ ಮತ್ತು ಹಿಮಾಚಲ ಪ್ರದೇಶ, ದೆಹಲಿ, ಉತ್ತರ ಪ್ರದೇಶ, ಹರಿಯಾಣ, ಪಂಜಾಬ್​,  ಮಧ್ಯಪ್ರದೇಶ, ಜಮ್ಮು ಮತ್ತು ಕಾಶ್ಮೀರ, ಲಡಾಖ್​, ಉತ್ತರಾಖಂಡ, ಪಾಕ್​ ಆಕ್ರಮಿತ ಕಾಶ್ಮೀರದ ಗಿಲ್ಗಿಟ್​ ಮತ್ತು ಬಾಲ್ಟಿಸ್ತಾನ್​, ಮುಜಾರಾಬಾದ್​ಗಳಲ್ಲೂ ಚಳಿ ಹೆಚ್ಚಿರುತ್ತದೆ ಎಂದು ಅದು ತಿಳಿಸಿದೆ. ಉತ್ತರಾಖಂಡ, ಪಂಜಾಬ್​, ಹರಿಯಾಣಗಳಲ್ಲಿ ದಟ್ಟ ಮಂಜು ಆವರಿಸಲಿದ್ದು,  1ರಿಂದ 50 ಮೀಟರ್​ವರೆಗೆ ಅತಿ ದಟ್ಟ ಮಂಜು,  51ರಿಂದ 200 ಮೀಟರ್​ವರೆಗೆ ದಟ್ಟ ಮಂಜು, 201ರಿಂದ 500 ಮೀಟರ್​ವರೆಗೆ ಸಾಧಾರಣ ಮಂಜುಕವಿದ ವಾತಾವರಣ ಇರಲಿದೆ. ಶೀತಗಾಳಿಯು ಗಂಟೆಗೆ 15 ಕಿ.ಮೀ. ವೇಗದಲ್ಲಿ ಬೀಸಲಿದ್ದು,  ಮುಂದಿನ ಗುರುವಾರದವರೆಗೆ ವಾಯವ್ಯ ಭಾರತದಲ್ಲಿ ಇದು ಮುಂದುವರಿಯಲಿದೆ ಎಂದು ಐಎಂಡಿ ಮುನ್ಸೂಚನೆಯ ವರ್ತಾ ಪತ್ರದಲ್ಲಿ ತಿಳಿಸಿದೆ.
ಶ್ರೀನಗರದಲ್ಲಿ ಮೈನಸ್‌ 6 ಡಿಗ್ರಿ ಸೆಲ್ಷಿಯಸ್‌ ಕಡಿಮೆ ತಾಪಮಾನ:
ಜಮ್ಮು ಮತ್ತು ಕಾಶ್ಮೀರದಲ್ಲಿ ದಿನದಿಂದ ದಿನಕ್ಕೆ ತಾಪಮಾನದಲ್ಲಿ ಭಾರಿ ಇಳಿಕೆ ಕಂಡುಬರುತ್ತಿದ್ದು, ಶ್ರೀನಗರದಲ್ಲಿ ಈ ಋತುವಿನ ಈವರೆಗಿನ ಅತ್ಯಂತ ಕಡಿಮೆ ತಾಪಮಾನ  ಮೈನಸ್​ 6.0 ಡಿಗ್ರಿ ಸೆಲ್ಷಿಯಸ್​ ದಾಖಲಾಗಿದೆ. ಕೆರೆಕೊಳ್ಳಗಳು ಮತ್ತು ನೀರಿನ ಪೈಪುಗಳು ಚಳಿಯಿಂದ ಮರಗಟ್ಟಿದೆ. ಉತ್ತರ ಭಾಗದ ಬಾರಾಮುಲ್ಲಾ ಜಿಲ್ಲೆಯಲ್ಲಿ ಮೈನಸ್​ 8.5 ಡಿಗ್ರಿ ಸೆಲ್ಷಿಯಸ್​  ದಾಖಲಾಗಿದ್ದು, ಲಡಾಖ್‌​ ದ್ರಾಸ್​ ಪಟ್ಟಣದಲ್ಲಿ ಮೈನಸ್​ 20.3 ಮತ್ತು ಲೇಹ್​ನಲ್ಲಿ ಮೈನಸ್​ 15.3 ಡಿಗ್ರಿ ಸೆಲ್ಷಿಯಸ್​   ರಾತ್ರಿ ತಾಪಮಾನ ದಾಖಲಾಗಿವೆ ಎಂದು ವರದಿ ತಿಳಿಸಿದೆ.
ರಾಜಸ್ಥಾನದ ಚುರು ಎಂಬಲ್ಲಿ ಮೈನಸ್​ 2.6 ಡಿಗ್ರಿ ಸೆಲ್ಷಿಯಸ್​​, ಸಿಕಾರ್​ನಲ್ಲಿ  ಮೈನಸ್​ 2.5 ಡಿಗ್ರಿ ಸೆಲ್ಷಿಯಸ್​ , ಅಮೃತಸರದಲ್ಲಿ ಮೈನಸ್​ 0.5 ಡಿಗ್ರಿ ಸೆಲ್ಷಿಯಸ್​ , ದೆಹಲಿಯಲ್ಲಿ 4.6 ಡಿಗ್ರಿ ಸೆಲ್ಷಿಯಸ್​   ಕಡಿಮೆ ತಾಪಮಾನ ಭಾನುವಾರ ದಾಖಲಾಗಿದೆ.