ದೋಹಾ(ಡಿ.07): ದಕ್ಷಿಣ ಕೊರಿಯಾ ವಿರುದ್ಧ ಪ್ರಿ ಕ್ವಾರ್ಟರ್‌ ಫೈನಲ್‌ನಲ್ಲಿ 4-1 ಗೋಲುಗಳ ಅಧಿಕಾರಯುತ ಗೆಲುವು ಸಾಧಿಸಿದ 5 ಬಾರಿ ಚಾಂಪಿಯನ್‌ ಬ್ರೆಜಿಲ್‌, 16ನೇ ಬಾರಿಗೆ ವಿಶ್ವಕಪ್‌ ಕ್ವಾರ್ಟರ್‌ ಫೈನಲ್‌ ಪ್ರವೇಶಿಸಿದೆ. ಡಿ.9ರಂದು ಅಂತಿಮ 8ರ ಸುತ್ತಿನಲ್ಲಿ ಕ್ರೊವೇಷಿಯಾವನ್ನು ಎದುರಿಸಲಿದೆ.

ಮೊದಲ 36 ನಿಮಿಷದಲ್ಲೇ 4 ಗೋಲು ಬಾರಿಸಿದ ಥಿಯಾಗೋ ಸಿಲ್ವಾ ಪಡೆ ವಿಶ್ವಕಪ್‌ ನಾಕೌಟ್‌ ಪಂದ್ಯದಲ್ಲಿ 1998ರ ಬಳಿಕ ಮೊದಲ ಬಾರಿಗೆ 4 ಗೋಲು ಬಾರಿಸಿದ ಸಾಧನೆ ಮಾಡಿತು. ಅಲ್ಲದೇ ಗುಂಪು ಹಂತದಲ್ಲಿ ಬಾರಿಸಿದ ಒಟ್ಟು ಗೋಲುಗಳಿಗಿಂತ ಪ್ರಿ ಕ್ವಾರ್ಟರಲ್ಲಿ ಹೆಚ್ಚು ಗೋಲು ಗಳಿಸಿ ಗಮನ ಸೆಳೆಯಿತು. ಗುಂಪು ಹಂತದಲ್ಲಿ 3 ಪಂದ್ಯಗಳಲ್ಲಿ ಬ್ರೆಜಿಲ್‌ ಒಟ್ಟು 3 ಗೋಲುಗಳನ್ನಷ್ಟೇ ಬಾರಿಸಿತ್ತು.

7ನೇ ನಿಮಿಷದಲ್ಲೇ ವಿನಿಶಿಯಸ್‌ ಜೂನಿಯರ್‌ ಗೋಲಿನ ಖಾತೆ ತೆರೆದರು. 13ನೇ ನಿಮಿಷದಲ್ಲಿ ಸಿಕ್ಕ ಪೆನಾಲ್ಟಿಅವಕಾಶದಲ್ಲಿ ನೇಯ್ಮರ್‌ ತಪ್ಪು ಮಾಡಲಿಲ್ಲ. 29ನೇ ನಿಮಿಷದಲ್ಲಿ ರಿಚಾರ್ಲಿಸನ್‌, 36ನೇ ನಿಮಿಷದಲ್ಲಿ ಲುಕಾಸ್‌ ಪಕೆಟಾ ಗೋಲು ಗಳಿಸಿದರು. ದ್ವಿತೀಯಾರ್ಧದಲ್ಲಿ ಬ್ರೆಜಿಲ್‌ ನಿರಾಯಾಸವಾಗಿ ಆಡಿತು. 76ನೇ ನಿಮಿಷದಲ್ಲಿ ಸಿಯುಂಗ್‌-ಹೊ ಕೊರಿಯಾ ಪರ ಏಕೈಕ ಗೋಲು ಗಳಿಸಿದರು.