ಡಿಸೆಂಬರ್ 1 ರಿಂದ ಮೊಬೈಲ್ ಸಿಮ್ ಪಡೆಯಲು ಹೊಸ ರೂಲ್ಸ್; ಇಲ್ಲಿದೆ ಮಾಹಿತಿ
ಹೊಸದಿಲ್ಲಿ: ಡಿಸೆಂಬರ್ 1ರಿಂದ ಹೊಸ ಸಿಮ್ ಕಾರ್ಡ್ ಪಡೆಯುವವರು ಹಾಗೂ ಮಾರಾಟ ಮಾಡುವವರು ಕೂಡ ಹೊಸ ನಿಯಮಗಳನ್ನು (SIM card rules) ಫಾಲೋ ಮಾಡಬೇಕಿದೆ. ದೂರಸಂಪರ್ಕ ಇಲಾಖೆ (Department of Telecommunications) ಈ ಕುರಿತ ನಿಯಮಗಳನ್ನು ಪರಿಷ್ಕರಿಸಿದ್ದು, ಡಿ.1ರಿಂದ ಜಾರಿಗೆ ಬರಲಿವೆ.
ಹೊಸದಾಗಿ ರೂಪಿಸಲಾದ SIM ಕಾರ್ಡ್ ನಿಯಮಗಳಲ್ಲಿ ಈ ಹಿಂದಿನದಕ್ಕಿಂತ ಹಲವು ಬದಲಾವಣೆ ಮಾಡಲಾಗಿದೆ. ಆರಂಭದಲ್ಲಿ ಅಕ್ಟೋಬರ್ 1ಕ್ಕೆ ಡೆಡ್‌ಲೈನ್‌ ನಿಗದಿಪಡಿಸಲಾಗಿತ್ತು. ನಂತರ ಎರಡು ತಿಂಗಳು ಮುಂದೂಡಲಾಗಿತ್ತು. ನೀವು ಹೊಸ ಸಿಮ್ (New sim purchase) ಖರೀದಿಸಲು ಯೋಚಿಸುತ್ತಿರಿ ಅಥವಾ ಸಿಮ್ ಕಾರ್ಡ್ ಮಾರಾಟಗಾರರಾಗಿರಲಿ, ಈ ಹೊಸ ನಿಯಮಗಳನ್ನು ಅರ್ಥಮಾಡಿಕೊಳ್ಳುವುದು ಮುಖ್ಯವಾಗಿದೆ.
ಹೊಸ ನಿಯಮಗಳಿಗೆ ಕಾರಣವೇನು?
ವಂಚನೆಗಳನ್ನು ತಡೆಹಿಡಿಯುವುದು: ನಕಲಿ ಸಿಮ್‌ಗಳನ್ನು ಒಳಗೊಂಡ ವಂಚನೆಗಳನ್ನು ಎದುರಿಸುವ ಪ್ರಮುಖ ಉದ್ದೇಶದಿಂದ ದೂರಸಂಪರ್ಕ ಇಲಾಖೆಯು ಸಿಮ್ ಕಾರ್ಡ್‌ಗಳನ್ನು ಖರೀದಿಸಲು ಮತ್ತು ಮಾರಾಟ ಮಾಡಲು ಹೊಸ ನಿಯಮಗಳನ್ನು ಪರಿಚಯಿಸುತ್ತಿದೆ. ದೇಶದಲ್ಲಿ ಹೆಚ್ಚುತ್ತಿರುವ ಸಿಮ್ ಕಾರ್ಡ್ ಹಗರಣಗಳನ್ನು ತಡೆಯುವ ಗುರಿಯಿಂದ ಡಿಸೆಂಬರ್ 1ರಿಂದ ರಾಷ್ಟ್ರವ್ಯಾಪಿ ಜಾರಿಗೆ ತರಲಿದೆ.
ಪಾಲಿಸದಿದ್ದರೆ ಕಠಿಣ ಕ್ರಮ: ನಕಲಿ ಸಿಮ್‌ಗಳಿಂದ ಉಂಟಾಗುವ ವಂಚನೆಗಳ ತೀವ್ರತೆಯನ್ನು ಪರಿಗಣಿಸಿ, ಕೇಂದ್ರ ಸರ್ಕಾರವು ಈ ನಿಯಮಗಳನ್ನು ಜಾರಿಗೊಳಿಸುವ ವಿಚಾರದಲ್ಲಿ ಕಟ್ಟುನಿಟ್ಟಾಗಿದೆ. ನಿಯಮಗಳನ್ನು ಉಲ್ಲಂಘಿಸುವವರಿಗೆ ದಂಡ ಮತ್ತು ಜೈಲು ಶಿಕ್ಷೆ ಸೇರಿದಂತೆ ಶಿಕ್ಷೆಳನ್ನು ವಿವರಿಸಲಾಗಿದೆ.
ಏನು ಮಾಡಬೇಕು?
1. ಸಿಮ್ ಡೀಲರ್ ಪರಿಶೀಲನೆ: ಎಲ್ಲಾ ಸಿಮ್ ಕಾರ್ಡ್ ವಿತರಕರು ಕಡ್ಡಾಯ ಪರಿಶೀಲನೆಗೆ ಒಳಗಾಗಬೇಕು. ಸಿಮ್‌ಗಳನ್ನು ಮಾರಾಟ ಮಾಡಲು ನೋಂದಣಿ ಈಗ ಪೂರ್ವಾಪೇಕ್ಷಿತವಾಗಿದೆ. ಟೆಲಿಕಾಂ ಆಪರೇಟರ್‌ಗಳು ಪೊಲೀಸ್ ಪರಿಶೀಲನೆಗೆ ಜವಾಬ್ದಾರರಾಗಿರುತ್ತಾರೆ. ಅನುಸರಿಸಲು ವಿಫಲವಾದರೆ 10 ಲಕ್ಷ ರೂ. ದಂಡ.
2. ಜನಸಂಖ್ಯಾ ಡೇಟಾ ಸಂಗ್ರಹಣೆ: ಗ್ರಾಹಕರು ತಮ್ಮ ಅಸ್ತಿತ್ವದಲ್ಲಿರುವ ಸಂಖ್ಯೆಗಳಿಗೆ ಸಿಮ್ ಕಾರ್ಡ್‌ಗಳನ್ನು ಖರೀದಿಸಲು, ಆಧಾರ್ ಸ್ಕ್ಯಾನಿಂಗ್ ಮತ್ತು ಜನಸಂಖ್ಯಾ ಡೇಟಾ ಸಂಗ್ರಹಣೆಗೆ ವಿವರ ನೀಡುವುದು ಕಡ್ಡಾಯವಾಗಿದೆ.
3. ಸಿಮ್ ಕಾರ್ಡ್ ವಿತರಣೆಗೆ ಮಿತಿ: ಹೊಸ ನಿಯಮಗಳು ಸಿಮ್ ಕಾರ್ಡ್‌ಗಳನ್ನು ದೊಡ್ಡ ಪ್ರಮಾಣದಲ್ಲಿ ನೀಡುವುದನ್ನು ಮಿತಿಗೊಳಿಸುತ್ತವೆ. ವ್ಯಾಪಾರ ಸಂಪರ್ಕದ ಮೂಲಕ ಮಾತ್ರ ವ್ಯಕ್ತಿಗಳು ಸಿಮ್ ಕಾರ್ಡ್‌ಗಳನ್ನು ದೊಡ್ಡ ಪ್ರಮಾಣದಲ್ಲಿ ಪಡೆದುಕೊಳ್ಳಬಹುದು. ಆದರೂ, ಬಳಕೆದಾರರು ಇನ್ನೂ ಮೊದಲಿನಂತೆ ಒಂದು ಐಡಿಯಲ್ಲಿ 9 ಸಿಮ್ ಕಾರ್ಡ್‌ಗಳನ್ನು ಪಡೆಯಬಹುದು.
4. ಸಿಮ್ ಕಾರ್ಡ್ ನಿಷ್ಕ್ರಿಯಗೊಳಿಸುವ ನಿಯಮ: ಹೊಸ ನಿಯಮಗಳು ಜಾರಿಗೆ ಬಂದ ನಂತರ ಇನ್ನು ಮುಂದೆ ಸಿಮ್ ಕಾರ್ಡ್‌ಗಳನ್ನು ಮಿತಿಮೀರಿದ ಪ್ರಮಾಣದಲ್ಲಿ ನೀಡಲಾಗುವುದಿಲ್ಲ. SIM ಕಾರ್ಡ್ ಅನ್ನು ಕ್ಲೋಸ್‌ ಮಾಡಿದ 90 ದಿನಗಳ ಅವಧಿಯ ನಂತರ ಮಾತ್ರ ಆ ಸಂಖ್ಯೆಯನ್ನು ಇನ್ನೊಬ್ಬ ವ್ಯಕ್ತಿಗೆ ನೀಡಲಾಗುತ್ತದೆ.
5. ದಂಡಗಳು: ಹೊಸ ನಿಯಮಗಳನ್ನು ಅನುಸರಿಸಲು ಸಿಮ್ ಮಾರಾಟಗಾರರು ನವೆಂಬರ್ 30ರೊಳಗೆ ನೋಂದಾಯಿಸಿಕೊಳ್ಳಬೇಕು. ಉಲ್ಲಂಘನೆಯು ರೂ. 10 ಲಕ್ಷದವರೆಗೆ ದಂಡ ಮತ್ತು ಜೈಲು ಶಿಕ್ಷೆಗೆ ಕಾರಣವಾಗಬಹುದು.
