ಲಕ್ಷದ್ವೀಪ ದ್ವೀಪಗಳ ಕರಾವಳಿಯಲ್ಲಿ ₹ 1,526 ಕೋಟಿ ಮೌಲ್ಯದ ಹೆರಾಯಿನ್ ವಶ ಪಡಿಸಿಕೊಳ್ಳಲಾಗಿದೆ. ಕಂದಾಯ ಗುಪ್ತಚರ ನಿರ್ದೇಶನಾಲಯ (DRI) ಮತ್ತು ಭಾರತೀಯ ಕರಾವಳಿ ಕಾವಲು ಪಡೆ (IGC) ಜಂಟಿಯಾಗಿ ‘ಆಪರೇಷನ್ ಖೋಜ್‌ಬೀನ್’ (Operation Khojbeen) ಎಂಬ ಹೆಸರಿನಲ್ಲಿ ಕೈಗೊಂಡಿರುವ ಕಾರ್ಯಾಚರಣೆಯಲ್ಲಿ ‘ಹೈ-ಗ್ರೇಡ್ ಹೆರಾಯಿನ್’ ವಶಪಡಿಸಿಕೊಳ್ಳಲಾಗಿದೆ. ಕೊಚ್ಚಿಯಲ್ಲಿರುವ ಕೋಸ್ಟ್ ಗಾರ್ಡ್ ಪ್ರಧಾನ ಕಚೇರಿಯಲ್ಲಿ ಎರಡು ಬೋಟ್‌ಗಳಲ್ಲಿ ನಡೆಸಿದ ಶೋಧ ವೇಳೆ ತಲಾ 1 ಕೆಜಿ ಹೆರಾಯಿನ್ ಹೊಂದಿರುವ 218 ಪ್ಯಾಕೆಟ್‌ಗಳು ಪತ್ತೆಯಾಗಿವೆ. ಎರಡು ಅಥವಾ ಮೂರನೇ ವಾರದಲ್ಲಿ ತಮಿಳುನಾಡಿನ ಕರಾವಳಿಯಿಂದ ನೌಕಾಯಾನ ಮಾಡುವ ಎರಡು ಭಾರತೀಯ ದೋಣಿಗಳು ಅರಬ್ಬಿ ಸಮುದ್ರದಲ್ಲಿ ಯಾವುದೋ ಕಡೆ ಭಾರಿ ಪ್ರಮಾಣದಲ್ಲಿ ಮಾದಕ ದ್ರವ್ಯಗಳನ್ನು ಸ್ವೀಕರಿಸುತ್ತವೆ ಎಂದು ಡಿಆರ್‌ಐಗೆ ಮಾಹಿತಿ ಲಭಿಸಿತ್ತು. ಈ ಮಾಹಿತಿ ಮೇರೆಗೆ ‘ಆಪರೇಷನ್ ಖೋಜ್‌ಬೀನ್’ ಅನ್ನು ಮೇ 2022 ಮೇ 7 ರಂದು ಪ್ರಾರಂಭಿಸಲಾಯಿತು. ಕಾರ್ಯಾಚರಣೆಯ ಅಡಿಯಲ್ಲಿ ಡಿಆರ್‌ಐ ಅಧಿಕಾರಿಗಳೊಂದಿಗೆ ಕೋಸ್ಟ್ ಗಾರ್ಡ್ ಹಡಗು ‘ಸುಜೀತ್’ ವಿಶೇಷ ಆರ್ಥಿಕ ವಲಯ (EEZ) ಬಳಿ ನಿಕಟ ನಿಗಾ ಇರಿಸಿದೆ.  ಹಲವಾರು ದಿನಗಳ ನಿರಂತರ ಹುಡುಕಾಟ ಮತ್ತು ಸಮುದ್ರಗಳ ಮೇಲ್ವಿಚಾರಣೆಯ ನಂತರ, ಎರಡು ಶಂಕಿತ ದೋಣಿಗಳಾದ ಪ್ರಿನ್ಸ್  ಮತ್ತು ಲಿಟಲ್ ಜೀಸಸ್ ಅನ್ನು ಮೇ 18 ರಂದು ಲಕ್ಷದ್ವೀಪ ದ್ವೀಪಗಳ ಕರಾವಳಿಯಲ್ಲಿ ಐಸಿಜಿ ಮತ್ತು ಡಿಆರ್​​ಐ ಅಧಿಕಾರಿಗಳು ತಡೆದರು.