ಉಕ್ರೇನ್​ನ ಪರಿಸ್ಥಿತಿ ರಷ್ಯಾ ದಾಳಿಯಿಂದ ಬಿಗಡಾಯಿಸುತ್ತಿದೆ(Russia-Ukraine War). ನ್ಯಾಟೊ(NATO) ಸದಸ್ಯತ್ವ ಪಡೆಯುವ ಆಸೆ ಕೈಬಿಟ್ಟಿರುವ ಉಕ್ರೇನ್ ಅಧ್ಯಕ್ಷ ವೊಲೊಡಿಮಿರ್ ಝೆಲೆನ್​ಸ್ಕಿ ಎರಡು ಪ್ರಾಂತ್ಯಗಳ ಸ್ವಾಯತ್ತತೆ ಸೇರಿದಂತೆ ರಷ್ಯಾದ ಹಲವು ಬೇಡಿಕೆಗಳನ್ನು ಒಪ್ಪಿಕೊಂಡಿದ್ದಾರೆ. ನ್ಯಾಟೊ ಸದಸ್ಯತ್ವವನ್ನು ಇನ್ನು ಕೇಳಲು ಆಗುವುದಿಲ್ಲ. ನ್ಯಾಟೊ ಸದಸ್ಯತ್ವ ಪಡೆಯುವ ಅಗತ್ಯವೇ ತಮಗಿಲ್ಲ ಎಂದು ಹೇಳಿದ್ದಾರೆ.
ಉಕ್ರೇನ್​ ವಿರುದ್ಧ ರಷ್ಯಾ ಯುದ್ಧ ಆರಂಭಿಸಲು ಹಲವು ಕಾರಣಗಳಿವೆ. ಆದರೆ ಉಕ್ರೇನ್​ಗೆ ಸದಸ್ಯತ್ವ ಕೊಡಲು ನ್ಯಾಟೊ ಒಲವು ತೋರಿದ್ದು ಸಹ ಕಾರಣ. ನ್ಯಾಟೊ ಕೂಡ ರಷ್ಯಾದ ಮನವಿಯನ್ನು ತಿರಸ್ಕರಿಸುತ್ತಲೇ ಬಂತು. ಹೀಗಾಗಿ ರಷ್ಯಾ ಪುಟ್ಟ ರಾಷ್ಟ್ರ ಉಕ್ರೇನ್​ ವಿರುದ್ಧ ಸಮರವನ್ನೇ ಸಾರಿತು. ಆದರೆ ರಷ್ಯಾ ಪಡೆ ಆಕ್ರಮಣ ಮಾಡುತ್ತಿದ್ದಂತೆ ನ್ಯಾಟೊ ಉಕ್ರೇನ್​ನಿಂದ ಅಂತರ ಕಾದುಕೊಂಡಿದೆ. ಝೆಲೆನ್ಸ್ಕಿ ಬಹಿರಂಗವಾಗಿಯೇ ಸಹಾಯ ಕೇಳಿದರೂ ನ್ಯಾಟೊ ಅದಕ್ಕೆ ಸ್ಪಂದಿಸಲಿಲ್ಲ. ಇದರ ಬಗ್ಗೆಯೇ ಝೆಲೆನ್ಸ್ಕಿ ಮಾತನಾಡಿದ್ದಾರೆ.
ಯುರೋಪ್​​ನಲ್ಲಿ ಶೀತಲ ಸಮರ ಎದ್ದಾಗ, ಸೋವಿಯತ್​ ಒಕ್ಕೂಟದಿಂದ ಯುರೋಪ್​​ನ್ನು ರಕ್ಷಣೆ ಮಾಡುವ ಸಲುವಾಗಿ ನ್ಯಾಟೊ (ಉತ್ತರ ಅಟ್ಲಾಂಟಿಕ್ ಒಪ್ಪಂದ ಸಂಸ್ಥೆ) ರಚಿಸಲಾಗಿತ್ತು. ಈ ಹಿಂದೆ ಸೋವಿಯತ್​ ಒಕ್ಕೂಟದಲ್ಲಿದ್ದು ಬೇರ್ಪಟ್ಟ ದೇಶಗಳಿಗೆ ಸದಸ್ಯತ್ವ ನೀಡುವ ಮೂಲಕ ನ್ಯಾಟೋ ಪೂರ್ವ ಯುರೋಪ್​​ನಲ್ಲಿ ಮತ್ತಷ್ಟು ಪ್ರಾಬಲ್ಯ ವಿಸ್ತರಿಸುತ್ತಿದೆ. ಇದು ಸಹಜವಾಗಿಯೇ ರಷ್ಯಾವನ್ನು ಕೆರಳಿಸಿತ್ತು. ಯುದ್ಧಕ್ಕೆ ಅದು ಕಾರಣವಾಯಿತು. ಇದೀಗ ಝೆಲೆನ್​ಸ್ಕಿ ಒಂದು ಹೆಜ್ಜೆ ಹಿಂದೆ ಇಟ್ಟಿರುವುದರಿಂದ ಯುದ್ಧ ಮುಗಿಯಬಹುದು ಎಂಬ ನಿರೀಕ್ಷೆಗಳು ಕಾಣಿಸಿಕೊಂಡಿವೆ.