ಕೈಲಾಶ್ ವಿಜಯವರ್ಗೀಯ ಅವರು ಸುದ್ದಿಗಾರರ ಜತೆ ಮಾತನಾಡುವ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ. ಪಕ್ಷದ ಕಚೇರಿಯಲ್ಲಿ ಸೆಕ್ಯುರಿಟಿ ಇರಿಸಿಕೊಳ್ಳಲು ಬಯಸಿದರೆ, ಅಗ್ನಿವೀರರಿಗೆ ಆದ್ಯತೆ ನೀಡುವುದಾಗಿ ಅವರು ಹೇಳಿದ್ದಾರೆ. “ಅಗ್ನಿವೀರರು ಸೇನಾ ತರಬೇತಿ ಪಡೆದು, ನಾಲ್ಕು ವರ್ಷಗಳ ನಂತರ ಸೇವೆಯಿಂದ ಹೊರಬಂದರೆ, ಅವರಿಗೆ 11 ಲಕ್ಷ ರೂಪಾಯಿ ಸಿಗಲಿದೆ ಮತ್ತು ಅಗ್ನಿವೀರ್ ಎಂಬ ಬ್ಯಾಡ್ಜ್ ಧರಿಸಲಿದ್ದಾರೆ. ಬಿಜೆಪಿ ಕಚೇರಿಗೆ ನಾನು ಭದ್ರತಾ ಸಿಬ್ಬಂದಿಯನ್ನು ನೇಮಿಸಲು ಬಯಸಿದರೆ, ನಾನು ಅಗ್ನಿವೀರರಿಗೆ ಆದ್ಯತೆ ನೀಡುತ್ತೇನೆ” ಎಂದಿದ್ದಾರೆ.”ದೇಶದ ಯುವಕರು ದೈಹಿಕ ಪರೀಕ್ಷೆ ಪಾಸಾಗಲು ಹಗಲು ರಾತ್ರಿ ಶ್ರಮಿಸುವುದು ಅವರು ಸೇನೆಯನ್ನು ಸೇರಿಕೊಂಡು ಇಡೀ ಜೀವನವನ್ನು ದೇಶ ಸೇವೆಗೆ ಮುಡಿಪಾಗಿಡುವ ಸಲುವಾಗಿಯೇ ವಿನಾ, ಅವರು ಬಿಜೆಪಿ ಕಚೇರಿಯಲ್ಲಿ ಕಾವಲುಗಾರರಾಗಿ ಸೇರಲು ಬಯಸುತ್ತಾರೆ ಎಂದಲ್ಲ” ಎಂದು ಅರವಿಂದ್ ಕೇಜ್ರಿವಾಲ್ ಕಿಡಿಕಾರಿದ್ದಾರೆ.

“ಅಗ್ನಿಪತ್ ಯೋಜನೆ ಕುರಿತಾದ ಎಲ್ಲ ಅನುಮಾನಗಳನ್ನು ಬಿಜೆಪಿಯ ಕೈಲಾಶ್ ವಿಜಯವರ್ಗೀಯ ನಿವಾರಿಸಿದ್ದಾರೆ” ಎಂದು ಕಾಂಗ್ರೆಸ್ ಹೇಳಿದೆ.ಅಗ್ನಿಪಥ್ ಯೋಜನೆಯಡಿ ನೇಮಕಗೊಳ್ಳುವ ಯುವಕರಿಗೆ ಚಾಲಕರು, ಎಲೆಕ್ಟ್ರಿಷಿಯನ್, ವಾಷರ್‌ಮೆನ್, ಕ್ಷೌರಿಕರು ಮತ್ತು ಇತರೆ ವೃತ್ತಿಪರರ ಕೌಶಲಗಳ ತರಬೇತಿ ನೀಡಲಾಗುತ್ತದೆ ಎಂದು ಕೇಂದ್ರ ಸಚಿವ ಜಿ ಕಿಶನ್ ರೆಡ್ಡಿ ಹೇಳಿದ್ದಾರೆ. ಅವರ ಹೇಳಿಕೆ ವ್ಯಾಪಕ ಟೀಕೆಗೆ ಗುರಿಯಾಗಿದೆ.