ನವದೆಹಲಿ:  ಬಿಜೆಪಿ ಅಧಿಕಾರದಲ್ಲಿರುವ ನಾಲ್ಕು ರಾಜ್ಯಗಳಲ್ಲಿ ಆಡಳಿತ ವಿರೋಧಿ ಅಲೆ ಇಲ್ಲ. ಉತ್ತರ ಪ್ರದೇಶ, ಉತ್ತರಾಖಂಡ, ಮಣಿಪುರ, ಗೋವಾಗಳಲ್ಲಿ ಮತ್ತೆ ಅಧಿಕಾರಕ್ಕೆ ಬರುವುದರ ಜತೆಗೆ ಕಾಂಗ್ರೆಸ್‌ನಿಂದ ಪಂಜಾಬ್‌ನನ್ನು ಬಿಜೆಪಿ ಕಿತ್ತುಕೊಳ್ಳಲಿದೆ ಎಂದು ಹೇಳಿದರು.
ಸುದ್ದಿಸಂಸ್ಥೆ ಎಎನ್‌ಐಗೆ ನೀಡಿರುವ ಸಂದರ್ಶನ ನೀಡಿರುವ ಅವರು, ಉತ್ತರ ಪ್ರದೇಶದಲ್ಲಿ ಅಧಿಕಾರದಲ್ಲಿರುವ ಪಕ್ಷ ಮತ್ತೆ ಚುನಾಯಿತವಾಗುವುದಿಲ್ಲ ಎಂಬ ನಿಲುವನ್ನು ರಾಜ್ಯದ ಜನರು ಯಾವತ್ತೋ ಕಸದಬುಟ್ಟಿಗೆ ಎಸೆದಿದ್ದಾರೆ. ಹೀಗಾಗಿ ಉತ್ತರ ಪ್ರದೇಶದಲ್ಲಿ ಬಿಜೆಪಿಗೆ ಸೋಲಾಗುತ್ತದೆ ಎಂಬದು ಈ ಬಾರಿ ಸುಳ್ಳಾಗಲಿದೆ ಎಂದರು.

ವಂಶಾಡಳಿತವು ಪ್ರಾಜಾಪ್ರಭುತ್ವದ ದೊಡ್ಡ ಶತ್ರು. ಒಂದೇ ಕುಟುಂಬದ ಹಲವು ತಲೆಮಾರುಗಳು ಅಧಿಕಾರದಲ್ಲಿದ್ದರೆ ಅಲ್ಲಿ ವಂಶ ಪರಾಂಪರ್ಯ ವಿರುತ್ತದೆ ಹೊರತು ಕ್ರಿಯಾಶೀಲತೆ ಇರುವುದಿಲ್ಲ. ಜಮ್ಮು- ಕಾಶ್ಮೀರ, ಹರಿಯಾಣ, ಜಾರ್ಖಂಡ್‌, ಉತ್ತರ ಪ್ರದೇಶ, ತಮಿಳುನಾಡಿನಲ್ಲಿ ಇಂಥ ರಾಜಕಾರಣಕ್ಕೆ ವಿಪುಲ ಉದಾಹರಣೆಗಳಿವೆ ಎಂದರು.
ಚುನಾವಣೆಗಳು ಮುಕ್ತ ವಿಶ್ವವಿದ್ಯಾಲಯದಂತೆ. ಇವುಗಳಿಂದ ಅನೇಕ ಸಂಗತಿಗಳು ಕಲಿಯಲು ಸಿಗುತ್ತದೆ. ಆತ್ಮಾವಲೋಕನಕ್ಕೆ ಅವಕಾಶ ಸಿಗುತ್ತಿದೆ. ಆಯ್ಕೆಯಾದ ಪಕ್ಷಗಳು ವ್ಯಾಪಾರ ಮಾಡಬಾರದು ಬಡಜನರಿಗೆ ಅನುಕೂಲವಾಗುಂತಹ ಕೆಲಸ ಮಾಡಬೇಕು ಎಂದರು.

ಉತ್ತರ ಪ್ರದೇಶದ ಲಖಿಂಪುರ ಖೇರಿ ಹಿಂಸಾಚಾರ ಪ್ರಕರಣದಲ್ಲಿ ತಪ್ಪಿತಸ್ಥರು ಯಾರೇ ಆಗಿದ್ದರೂ ಅವರಿಗೆ ಶಿಕ್ಷೆ ಅಗುತ್ತದೆ. ತನಿಖೆ ಸರಿಯಾದ ಜಾಡಿನಲ್ಲೇ ನಡೆಯುತ್ತಿದೆ ಎಂದು ಪ್ರಶ್ನೆಯೊಂದಕ್ಕೆ ಉತ್ತರಿಸಿದರು.
ರೈತರ ಹಿತಕ್ಕಾಗಿ ಮೂರು ಕೃಷಿ ಕಾನೂನುಗಳನ್ನು ಜಾರಿಗೆ ತಂದೆವು, ಆದರೆ, ರಾಷ್ಟ್ರ ಹಿತದ ದೃಷ್ಟಿಯಿಂದ ಅವುಗಳನ್ನು ಹಿಂಪಡೆಯಬೇಕಾಯಿತು ಎಂದ ಮೋದಿ, ಸರ್ಕಾರ ಕೇಂದ್ರೀಯ ತನಿಖಾ ಸಂಸ್ಥೆಗಳನ್ನು ದುರುಪಯೋಗ ಮಾಡಿಕೊಳ್ಳುತ್ತಿದೆ ಎಂಬುದರಲ್ಲಿ ಹುರುಳಿಲ್ಲ. ಅವುಗಳು ಸಾಂವಿಧಾನಿಕವಾಗಿ ಕಾರ್ಯನಿರ್ವಹಿಸುತ್ತಿದ್ದು, ಭ್ರಷ್ಟರನ್ನು ಬಯಲಿಗೆ ತರುತ್ತಿವೆ ಎಂದು ಹೇಳಿದರು.
ಭಂಟಿಡಾದಲ್ಲಿನ ಭದ್ರತಾ ಲೋಪ ಕುರಿತು ನಾನು ಈಗ ಏನೇ ಹೇಳಿಕೆ ನೀಡಿದರೂ ಅದು ಪಂಜಾಬ್‌ ಚುನಾವಣೆಯ ಮೇಲೆ ಪರಿಣಾಮ ಬೀರುತ್ತದೆ. ಹೀಗಾಗಿ ಈ ಬಗ್ಗೆ ಏನೂ ಹೇಳುವುದಿಲ್ಲ ಎಂದು ಪ್ರಶ್ನೆಯೊಂದಕ್ಕೆ ಪ್ರತಿಕ್ರಿಯಿಸಿದರು.
ಅವರು (ರಾಹುಲ್‌ ಗಾಂಧಿ) ಸಂಸತ್‌ಗೆ ಚಕ್ಕರ್‌ ಹಾಕುತ್ತಾರೆ. ಕೇಳುವ ತಾಳ್ಮೆಯಂತೂ ಮೊದಲೇ ಇಲ್ಲ. ಇಂಥವರಿಗೆ ಹೇಗೆ ಪ್ರತಿಯಿಸಲಿ ಎಂದು ಪ್ರಶ್ನೆಯೊಂದಕ್ಕೆ ಮರುಪ್ರಶ್ನೆ ಹಾಕಿದರು.