ಬರ್ಲಿನ್‌: ಜರ್ಮನಿಯಲ್ಲಿ 55 ವರ್ಷದಷ್ಟು ಹಳೆಯ ಸೇತುವೆಯೊಂದನ್ನು ಸ್ಫೋಟಕ ಬಳಸಿ ಧ್ವಂಸ ಮಾಡಲಾಗಿದ್ದು, ಈ ಕಾರ್ಯಾಚರಣೆಯ ರೋಚಕ ಕ್ಷಣ ಕ್ಯಾಮರಾದಲ್ಲಿ ಸೆರೆ ಆಗಿದ್ದು ವೈರಲ್ ಆಗಿದೆ.  ಈ  ಸೇತುವೆಯನ್ನು 1965 ಹಾಗೂ 1968ರ ಮಧ್ಯೆ ನಿರ್ಮಿಸಲಾಗಿತ್ತು. ಇತ್ತೀಚೆಗೆ ಸೇತುವೆ ಶಿಥಿಲಾವಸ್ಥೆಗೆ ತಲುಪಿದ ಹಿನ್ನೆಲೆಯಲ್ಲಿ ಮುಂಜಾಗೃತ ಕ್ರಮವಾಗಿ ಸೇತುವೆಯನ್ನು ಧ್ವಂಸ ಮಾಡಲಾಗಿದ್ದು, ಇದೇ ರೀತಿ ಹೊಸ ಸೇತುವೆ ನಿರ್ಮಿಸಲು ಐದು ವರ್ಷ ಹಿಡಿಯಬಹುದು ಎಂದು ಅಂದಾಜಿಸಲಾಗಿದೆ. 

ವಾಹನ ಓಡಾಟಕ್ಕೆ ಬಳಸಲಾಗುತ್ತಿದ್ದ ಈ ಸೇತುವೆಯನ್ನು ನಿಯಂತ್ರಿತ ಸ್ಫೋಟಕ ಬಳಸಿ  ಯಶಸ್ವಿಯಾಗಿ ಕೆಡವಲಾಗಿದ್ದು ಅಂದಾಜು 330 ಪೌಂಡ್ ಅಂದರೆ 150 ಕೇಜಿ ಸ್ಫೋಟಕವನ್ನು ಈ ಕಾರ್ಯಾಚರಣೆಗೆ ಬಳಸಲಾಗಿದೆ.  ಮೇ 7 ರ ಭಾನುವಾರ ಈ ಕಾರ್ಯಾಚರಣೆ ನಡೆದಿದೆ.  150 ಕೇಜಿ ಸ್ಫೋಟಕ ಸ್ಫೋಟಗೊಳ್ಳುತ್ತಿದ್ದಂತೆ ಜರ್ಮನಿಯ ಲುಡೆನ್‌ಶೈಡ್‌ನಲ್ಲಿರುವ (Ludenscheid) 450 ಮೀಟರ್ ಉದ್ದದ ರಹ್ಮೆಡೆ ವ್ಯಾಲಿ ಸೇತುವೆ  (Rahmede Valley Bridge) ಸೆಕೆಂಡುಗಳಲ್ಲಿ ಕುಸಿದು ಬಿದ್ದಿದೆ.