ಶಹೀದ್ ಭಗತ್ ಸಿಂಗ್ ನಗರ್ : ಸ್ವಾತಂತ್ರ್ಯ ಹೋರಾಟಗಾರ ಭಗತ್ ಸಿಂಗ್ ಗ್ರಾಮವಾದ ಖಾಟ್ಕರ್‍ ಕಲಾನ್ ನಲ್ಲಿ ಪಂಜಾಬ್ ನ 17ನೇ ಮುಖ್ಯಮಂತ್ರಿಯಾಗಿ ಭಗವಂತ್ ಮಾನ್ ಅವರು ಮಾರ್ಚ್ 16ರ ಬುಧವಾರ ದೇವರ ಹೆಸರಿನಲ್ಲಿ ಪ್ರಮಾಣವಚನ ಸ್ವೀಕರಿಸಿದರು. ರಾಜ್ಯಪಾಲ ಬನ್ವಾರಿಲಾಲ್ ಪುರೋಹಿತ್ ಪ್ರತಿಜ್ಞಾವಿಧಿ ಬೋಧಸಿದರು.

ಈ ವೇಳೆ ಮಾತನಾಡಿದ ಮಾನ್, ಅಧಿಕಾರ ಸ್ವೀಕರಿಸಿದ ಕ್ಷಣದಿಂದ ಒಂದೇ ಒಂದು ಕ್ಷಣವನ್ನೂ ವ್ಯರ್ಥ ಮಾಡದೆ ಪಂಜಾಬ್ ಅಭಿವೃದ್ಧಿಗೆ, ಜನತೆಯ ಅಭ್ಯುದಯಕ್ಕೆ ತೊಡಗಿಸಿಕೊಳ್ಳುತ್ತೇನೆ. ದೆಹಲಿಯಲ್ಲಿ ಎಎಪಿ ಮಾಡಿದ ಕ್ರಾಂತಿಕಾರಿ ಬದಲಾವಣೆ ಬಗ್ಗೆ ನಿಮಗೆಲ್ಲ ತಿಳಿದಿದೆ. ಶಾಲೆ, ಆಸ್ಪತ್ರೆಗಳಲ್ಲಿ ಅಲ್ಲಿ ಮಾಡಿದಂತಹ ಬದಲಾವಣೆಗಳನ್ನು ಪಂಜಾಬ್ ನಲ್ಲೂ ಮಾಡಲಾಗುವುದು. ಪಂಜಾಬ್ ಜನ ಬೇರೆಡೆ ವಲಸೆ ಹೋಗದೆ ಇಲ್ಲೇ ಇದ್ದು ಅಭ್ಯುದಯ ಕಾಣುವಂತೆ ಮಾಡುತ್ತೇನೆ ಎಂದು ಮಾನ್ ಹೇಳಿದರು.

ಭಗತ್ ಸಿಂಗ್ ಅವರು ಸ್ವಾತಂತ್ರ್ಯಕ್ಕಾಗಿ ಹೋರಾಡಿದರು. ಆ ಸ್ವಾತಂತ್ರ್ಯ ಜನರಿಗೆ ತಲುಪಲು ನಾನು ಪ್ರಾಮಾಣಿಕವಾಗಿ ಶ್ರಮಿಸುತ್ತೇನೆ ಎಂದರು.
ಆಮ್ ಆದ್ಮಿ ಪಕ್ಷದ ರಾಷ್ಟ್ರೀಯ ಸಂಚಾಲಕ ಅರವಿಂದ ಕೇಜ್ರೀವಾಲ್, ಎಎಪಿ ನಾಯಕರಾದ ಮನೀಶ್ ಸಿಸೋಡಿಯಾ, ರಾಘವ ಚೆಡ್ಡಾ, ಸತ್ಯೇಂದ್ರ ಜೈನ್ ಮತ್ತಿತರರು ಇದ್ದರು.