- ಕ್ರೀಡೆ
- 12:20 ಅಪರಾಹ್ನ
- ಅಕ್ಟೋಬರ್ 10, 2023
ಲಾಂಗ್-ಆಫ್ನಲ್ಲಿ ಅತ್ಯದ್ಭುತ ಕ್ಯಾಚ್ ಹಿಡಿದ ವೇಗಿ ಟ್ರೆಂಟ್ ಬೌಲ್ಟ್
ಹೈದರಾಬಾದ್: ನ್ಯೂಜಿಲ್ಯಾಂಡ್ ತಂಡದ ಹಿರಿಯ ವೇಗಿ ಟ್ರೆಂಟ್ ಬೌಲ್ಟ್ ಅವರು ನೆದರ್ಲೆಂಡ್ಸ್ ವಿರುದ್ಧದ ಪಂದ್ಯದಲ್ಲಿ ಲಾಂಗ್-ಆಫ್ನಲ್ಲಿ ಹಿಡಿದ ಕ್ಯಾಚ್ ಒಂದರ ವಿಡಿಯೊ ವೈರಲ್ ಆಗಿದೆ. ಈ ವಿಡಿಯೊವನ್ನು ಐಸಿಸಿ ತನ್ನ ಅಧಿಕೃತ ಟ್ವೀಟರ್ನಲ್ಲಿ ಹಂಚಿಕೊಂಡಿದ್ದು “ವಾಟ್ ಎ ಕ್ಯಾಚ್” ಎಂದು ಬರೆದುಕೊಂಡಿದೆ.
ನೆದರ್ಲೆಂಡ್ಸ್ ತಂಡದ ಸ್ಟಾರ್ ಆಲ್ ರೌಂಡರ್ ಬಾಸ್ ಡಿ ಲೀಡೆ ಕ್ರೀಸ್ಗೆ ಬಂದೊಡನೆಯೇ ಬಡಬಡನೆ ಮೂರು ಬೌಂಡರಿ ಬಾರಿಸಿ ಅಪಾಯಕಾರಿಯಾಗುವ ಸೂಚನೆ ನೀಡಿದರು. ರಚಿನ್ ರವೀಂದ್ರ ಅವರ ಓವರ್ನಲ್ಲಿ ಸಿಕ್ಸರ್ ಬಾರಿಸಲು ಮುಂದಾದರು. ಅದರಂತೆ ಚೆಂಡನ್ನು ಸಿಕ್ಸರ್ ಕಡೆ ಬಾರಿಸಿದರು. ಆದರೆ ಲಾಂಗ್-ಆಫ್ನಲ್ಲಿದ್ದ ಟ್ರೆಂಟ್ ಬೌಲ್ಟ್ ಅವರು ಇದಕ್ಕೆ ಅನುವು ಮಾಡಿಕೊಡಲಿಲ್ಲ. ಅತ್ಯಂತ ಕಷ್ಟಕರವಾದ ಕ್ಯಾಚನ್ನು ಯಶಸ್ವಿಯಾಗಿ ಪಡೆದು ಲೀಡೆಗೆ ಪೆವಿಲಿಯನ್ ಹಾದಿ ತೋರಿದರು.
ಲಾಂಗ್-ಆಫ್ನಲ್ಲಿದ್ದ ಬೌಲ್ಟ್ ಚೆಂಡನ್ನು ಹಿಡಿಯಲು ಹಿಮ್ಮುಖವಾಗಿ ನೆಗೆದರು. ಈ ವೇಳೆ ಚೆಂಡನ್ನು ಹಿಡಿದರೂ ಬ್ಯಾಲನ್ಸ್ ಆಗದೆ ಬೌಂಡರಿ ಗೆರೆಯ ಒಳ ಪ್ರವೇಶಿಸಿದರು. ಆದರೆ ಇದಕ್ಕೂ ಮುನ್ನ ಚೆಂಡನ್ನು ಮೇಲಕ್ಕೆ ಎಸೆದಿದ್ದ ಬೌಲ್ಟ್ ಬೌಂಡರಿ ಗೆರೆಯೊಳಗೆ ಪ್ರವೇಶಿಸಿ ತಮ್ಮ ನಿಯಂತ್ರವನ್ನು ಪಡೆದುಕೊಂಡು ಮತ್ತೆ ಬೌಂಡರಿ ಲೈನ್ನ ಒಳಗಡೆ ಹಾರಿ ಕ್ಯಾಚನ್ನು ಪಡೆದರು. ಇದೇ ವೇಳೆ ಕಾಮೆಂಟ್ರಿ ಮಾಡುತ್ತಿದ್ದವರು ವಾಟ್ ಎ ಕ್ಯಾಚ್, ನಿಜವಾಗಿಯೂ ಅತ್ಯದ್ಭುತ ಕ್ಯಾಚ್ ಎಂಂದು ಬಣ್ಣಿಸಿದರು. ಈ ವಿಡಿಯೊ ವೈರಲ್ ಆಗಿದೆ.
5 ವಿಕೆಟ್ ಕಿತ್ತು ದಾಖಲೆ ಬರೆದ ಸ್ಯಾಂಟ್ನರ್
ಈ ಪಂದ್ಯದಲ್ಲಿ ಬ್ಯಾಟಿಂಗ್ ಮಾತ್ರವಲ್ಲದೆ ಬೌಲಿಂಗ್ನಲ್ಲಿಯೂ ಶ್ರೇಷ್ಠ ಪ್ರದರ್ಶನ ನೀಡಿದ ಸ್ಯಾಂಟ್ನರ್ 59 ರನ್ಗೆ ಪ್ರಮುಖ 5 ವಿಕೆಟ್ ಕಿತ್ತು ಪಂದ್ಯ ಶ್ರೇಷ್ಠ ಪ್ರಶಸ್ತಿಗೂ ಭಾಜನರಾದರು. ಅಲ್ಲದೆ ವಿಶ್ವಕಪ್‌ನಲ್ಲಿ ಐದು ವಿಕೆಟ್‌ಗಳನ್ನು ಪಡೆದ ಮೊದಲ ನ್ಯೂಜಿಲ್ಯಾಂಡ್ನ ಸ್ಪಿನ್ನರ್ ಎಂಬ ದಾಖಲೆ ಬರೆದರು. ಒಟ್ಟಾರೆಯಾಗಿ ಕಿವೀಸ್ನ ಆರನೇ ಬೌಲರ್.
ಗೆಲುವಿನ ಓಟ ಮುಂದುವರಿಸಿದ ಕಿವೀಸ್
ಇಲ್ಲಿನ ರಾಜೀವ್ಗಾಂಧಿ ಇಂಟರ್ನ್ಯಾಷನಲ್ ಕ್ರಿಕೆಟ್ ಸ್ಟೇಡಿಯಮ್ನಲ್ಲಿ ನಡೆದ ಪಂದ್ಯದಲ್ಲಿ ಟಾಸ್ ಗೆದ್ದ ನೆದರ್ಲೆಂಡ್ಸ್ ತಂಡ ಫೀಲ್ಡಿಂಗ್ ಆಯ್ಕೆ ಮಾಡಿಕೊಂಡಿತು. ಅಂತೆಯೇ ಮೊದಲು ಬ್ಯಾಟಿಂಗ್ ಆಹ್ವಾನ ಪಡೆದ ನ್ಯೂಜಿಲ್ಯಾಂಡ್ ಬಳಗ ನಿಗದಿತ 50 ಓವರ್ಗಳಲ್ಲಿ 7 ವಿಕೆಟ್ಗೆ 322 ರನ್ ಬಾರಿಸಿತು. ದೊಡ್ಡ ಗುರಿಯನ್ನು ಬೆನ್ನಟ್ಟಲು ಹೊರಟ ನೆದರ್ಲೆಂಡ್ಸ್ 46.3 ಓವರ್ಗಳಲ್ಲಿ 223 ರನ್ ಬಾರಿಸಿ ಆಲ್ಔಟ್ ಆಯಿತು.
ಮೊದಲು ಬ್ಯಾಟ್ ಮಾಡಿದ ನ್ಯೂಜಿಲ್ಯಾಂಡ್ ತಂಡ ಉತ್ತಮ ಅರಂಭ ಪಡೆಯಿತು. 67 ರನ್ಗಳಿಗೆ 1 ವಿಕೆಟ್ ಕಳೆದುಕೊಂಡಿತು. ಕಾನ್ವೆ 32 ರನ್ ಬಾರಿಸಿದರೆ ವಿಲ್ ಯಂಗ್ 70 ರನ್ ಬಾರಿಸಿದರು. ರಚಿನ್ ರವೀಂದ್ರ 51 ರನ್ ಕೊಡುಗೆ ಕೊಟ್ಟರೆ ಡ್ಯಾರಿಲ್ ಮಿಚೆಲ್ 48 ರನ್ ಬಾರಿಸಿದ್ದಾರೆ. ಬಳಿಕ ಟಾಮ್ ಲೇಥಮ್ 53 ರನ್ ಬಾರಿಸಿದರು. ಕೊನೆಯಲ್ಲಿ ಸ್ಯಾಂಟ್ನರ್ 36 ರನ್ ಬಾರಿಸಿದರೆ, ಮ್ಯಾಟ್ ಹೆನ್ರಿ 10 ರನ್ ಬಾರಿಸಿ ದೊಡ್ಡ ಮೊತ್ತ ಪೇರಿಸಲು ನೆರವಾದರು.
ದೊಡ್ಡ ಮೊತ್ತವನ್ನು ಪೇರಿಸಲು ಆರಂಭಿಸಿದ ನೆದರ್ಲೆಂಡ್ಸ್ ತಂಡ 21 ರನ್ಗೆ ಮೊದಲು ವಿಕೆಟ್ ಕಳೆದುಕೊಳ್ಳುವ ಮೂಲಕ ಆರಂಭಿಕ ಹಿನ್ನಡೆಗೆ ಒಳಗಾಯಿತು. ಮೂರನೇ ಕ್ರಮಾಂಕದಲ್ಲಿ 69 ರನ್ ಬಾರಿಸಿ ಮಿಂಚಿದರು. ಬಳಿಕ ಉಳಿದ ಬ್ಯಾಟರ್ಗಳು ಅಲ್ಪಸ್ವಲ್ಪ ರನ್ ಬಾರಿಸಿದ ಕಾರಣ ದೊಡ್ಡ ಮೊತ್ತವನ್ನು ಬೆನ್ನಟ್ಟಲು ಸಾಧ್ಯವಾಗಲಿಲ್ಲ.
