ಆಪರೇಷನ್‌ ಥಿಯೇಟರ್‌ನಲ್ಲೇ ಪ್ರಿ ವೆಡ್ಡಿಂಗ್‌ ಶೂಟ್‌ ; ಡಾಕ್ಟರ್‌ ಕೆಲಸದಿಂದ ವಜಾ..!
ಚಿತ್ರದುರ್ಗ: ಪ್ರಿವೆಡ್ಡಿಂಗ್‌ ಶೂಟ್‌ (Prewedding Shoot) ಹೆಸರಲ್ಲಿ ಎಲ್ಲೆಲ್ಲೋ ಹೋಗುವುದು, ಹೇಗೇಗೋ ವಿಡಿಯೋ ಮಾಡುವುದು, ಅಶ್ಲೀಲವಾಗಿ ನಡೆದುಕೊಳ್ಳುವುದನ್ನು ನೋಡಿದ್ದೇವೆ. ಹೀಗಾಗಿಯೇ ಹಲವಾರು ಕಡೆಗಳಲ್ಲಿ ಪ್ರಿ ವೆಡ್ಡಿಂಗ್‌ ಶೂಟ್‌ಗೆ ಅನುಮತಿ ನಿರಾಕರಿಸಲಾಗಿದೆ. ಈ ನಡುವೆ, ಆಸ್ಪತ್ರೆಯ ಆಪರೇಶನ್ ಥಿಯೇಟರ್‌ನಲ್ಲೇ (Operation Theatre) ವೈದ್ಯರೊಬ್ಬರು ಪ್ರಿ ವೆಡ್ಡಿಂಗ್‌ ಶೂಟ್‌ ನಡೆಸಿ ವಿವಾದಕ್ಕೆ ಒಳಗಾಗಿದ್ದಾರೆ. ಅವರಿಗೆ ಈಗ ಕೆಲಸದಿಂದ ವಜಾ ಮಾಡುವ ಶಿಕ್ಷೆಯೂ (Doctor Dismissed) ಸಿಕ್ಕಿದೆ.
ಭರಮಸಾಗರದ ಸರ್ಕಾರಿ ಆಸ್ಪತ್ರೆಯಲ್ಲಿ ಗುತ್ತಿಗೆ ಆಧಾರದ ಮೇಲೆ ವೈದ್ಯರಾಗಿ ಸೇವೆ ಸಲ್ಲಿಸುತ್ತಿರುವ ಡಾ. ಅಭಿಷೇಕ್‌ ಅವರು ತಮ್ಮ ಭಾವಿ ಪತ್ನಿಯನ್ನು ಆಸ್ಪತ್ರೆಗೆ ಕರೆದುಕೊಂಡು ಫೋಟೊ ಶೂಟ್‌ ಮಾಡಿದ್ದು ವೈರಲ್‌ ಆಗಿತ್ತು.
ಪ್ರೀವೆಡ್ಡಿಂಗ್‌ ಶೂಟ್‌ ಸಾಮಾಜಿಕ ಜಾಲತಾಣದಲ್ಲಿ ಸದ್ದು ಮಾಡುತ್ತಿದ್ದಂತೆಯೇ ಇದೀಗ ಜಿಲ್ಲಾಧಿಕಾರಿ ಟಿ.ವೆಂಕಟೇಶ್‌ ಅವರು ಹೊರಗುತ್ತಿಗೆ ವೈದ್ಯ ಡಾ. ಅಭಿಷೇಕ್‌ ಅವರನ್ನು ಕೆಲಸದಿಂದ ತೆಗೆದುಹಾಕಿದ್ದಾರೆ.
ಈ ವಿಡಿಯೊವನ್ನು ಭರಮಸಾಗರ ಸರ್ಕಾರಿ ಆಸ್ಪತ್ರೆಯ ಆಪರೇಷನ್‌ ಥಿಯೇಟರ್‌ನಲ್ಲಿ ಮಾಡಲಾಗಿದೆ. ಡಾ. ಅಭಿಷೇಕ್‌ ಅವರು ಆಪರೇಷನ್‌ ದಿರಸಿನಲ್ಲಿದ್ದಾರೆ. ಅವರು ಆಪರೇಷನ್‌ ಟೇಬಲ್‌ನಲ್ಲಿ ಮಲಗಿದ ಯಾರಿಗೋ ಆಪರೇಷನ್‌ ಮಾಡುತ್ತಿರುವಂತೆ ಅವರ ಪತ್ನಿ ಎದುರು ನಿಂತು ಸಹಾಯ ಮಾಡುವಂತೆ ಚಿತ್ರೀಕರಣ ನಡೆಸಲಾಗಿದೆ. ಈ ಶೂಟಿಂಗ್‌ ವೇಳೆ ಅವರ ಸಹಾಯಕರು ಮತ್ತು ಇತರರ ನಗುತ್ತಿದ್ದಾರೆ.
ಆಪರೇಷನ್‌ ಥಿಯೇಟರನ್ನು ಇಂಥ ಕೆಲಸಗಳಿಗೆ ಬಳಸಿಕೊಂಡು ಅದರ ಘನತೆಯನ್ನು ಕಡಿಮೆ ಮಾಡಲಾಗಿದೆ ಎಂದು ಹಲವರು ಆಕ್ಷೇಪ ವ್ಯಕ್ತಪಡಿಸಿದ್ದರು. ಮತ್ತು ಸರ್ಕಾರಿ ಆಸ್ಪತ್ರೆಯಲ್ಲಿ ಈ ರೀತಿ ಖಾಸಗಿ ಶೂಟಿಂಗ್‌ ನಡೆಸಬಾರದಿತ್ತು ಎಂಬ ಅಭಿಪ್ರಾಯವೂ ಇದೆ.
