ಹೋಂಡಾ ಎನ್‌ಎಕ್ಸ್‌ 500 ಬೈಕ್ ಬಿಡುಗಡೆ
ಹೋಂಡಾ ಮೋಟಾರ್‌ಸೈಕಲ್ ಆಂಡ್ ಸ್ಕೂಟರ್ ಇಂಡಿಯಾ (ಎಚ್‌ಎಂಎಸ್‌ಐ) ತನ್ನ ಮತ್ತೊಂದು ಹೊಸ ಬೈಕ್ ಅನ್ನು ಭಾರತೀಯ ದ್ವಿಚಕ್ರ ವಾಹನ ಮಾರುಕಟ್ಟೆಗೆ ಪರಿಚಯಿಸಿದೆ. ಹೊಸ ಹೋಂಡಾ ಎನ್‌ಎಕ್ಸ್‌ 500 ಅಡ್ವೆಂಚರ್ ಟೂರರ್ ಅನ್ನು ಪರಿಚಯಾತ್ಮಕ ಎಕ್ಸ್ ಶೋರೂಮ್ ಬೆಲೆ 5.90 ಲಕ್ಷ ರೂಪಾಯಿಗೆ ಬಿಡುಗಡೆ ಮಾಡಲಾಗಿದೆ. ಈ ಬೈಕ್‌ನ ಬಿಡುಗಡೆಯೊಂದಿಗೆ ಹೋಂಡಾ ಅಡ್ವೆಂಚರ್ ಮೋಟಾರ್‌ಸೈಕಲ್ ವಿಭಾಗದಲ್ಲಿ ತನ್ನ ಬಲವನ್ನು ಇನ್ನಷ್ಟು ವಿಸ್ತರಿಸುವತ್ತ ಹೆಜ್ಜೆ ಇಟ್ಟಿದೆ.
ಜಪಾನ್ ಮೂಲದ ಈ ತಯಾರಕರು ಸಂಪೂರ್ಣ ಸಿದ್ಧ ಮಾದರಿಯಲ್ಲಿ ಸಿಬಿಯು ಮಾರ್ಗದ ಮೂಲಕ ಈ ಬೈಕ್ ಅನ್ನು ಭಾರತಕ್ಕೆ ತರುತ್ತಿದ್ದಾರೆ. ಜೊತೆಗೆ ಕಂಪನಿಯ ಬಿಗ್‌ವಿಂಗ್ ಶೋರೂಮ್‌ಗಳ ಮೂಲಕ ಈ ಬೈಕ್‌ನ ಮಾರಾಟ ನಡೆಯಲಿದೆ. ಈ ಬೈಕ್‌ನ ವಿತರಣೆಗಳು 2024ರ ಫೆಬ್ರವರಿಯಿಂದ ಶುರುವಾಗಲಿದೆ.
ಹೋಂಡಾ ಎನ್‌ಎಕ್ಸ್‌ 500 ಬೈಕ್ ಸಿಬಿ500Xನ ಉತ್ತರಾಧಿಕಾರಿಯಾಗಿದೆ. ಸಿಬಿ500X ಅನ್ನು ಹೋಂಡಾ ಸ್ಥಗಿತಗೊಳಿದೆ. ಆದರೂ ಸಿಬಿ500ಎಕ್ಸ್‌ಗೆ ಹೋಲಿಸಿದರೆ ಹೊಸ ಹೋಂಡಾ ಎನ್‌ಎಕ್ಸ್‌ 500 ಬೈಕ್ ಗಮನಾರ್ಹವಾಗಿ ವಿಭಿನ್ನವಾಗಿದೆ. ಗ್ರ್ಯಾಂಡ್ ಪ್ರಿಕ್ಸ್ ರೆಡ್, ಮ್ಯಾಟ್ ಗನ್ಪೌಡರ್ ಬ್ಲ್ಯಾಕ್ ಮೆಟಾಲಿಕ್ ಮತ್ತು ಪರ್ಲ್ ಹಾರಿಜಾನ್ ವೈಟ್ ಹೀಗೆ ಮೂರು ಬಣ್ಣಗಳ ಆಯ್ಕೆಯಲ್ಲಿ ಈ ಬೈಕ್ ಅನ್ನು ನೀಡಲಾಗುತ್ತಿದೆ.
ಈ ಬೈಕ್‌ನ ಎಂಜಿನ್ ಬಗ್ಗೆ ನೋಡುವುದಾದರೆ, ಹೊಸ ಹೋಂಡಾ ಎನ್‌ಎಕ್ಸ್‌ 500 ಬೈಕ್ 471ಸಿಸಿ, ಲಿಕ್ವಿಡ್-ಕೂಲ್ಡ್, ಪ್ಯಾರಲಲ್-ಟ್ವಿನ್ ಎಂಜಿನ್‌ನಿಂದ ಶಕ್ತಿ ಪಡೆಯುತ್ತದೆ. ಈ ಎಂಜಿನ್ 47.5 ಎಚ್‌ಪಿ ಶಕ್ತಿ ಹಾಗೂ 43 ನ್ಯೂಟನ್ ಮೀಟರ್ ಟಾರ್ಕ್‌ ಅನ್ನು ಉತ್ಪಾದಿಸುತ್ತದೆ. ಈ ಎಂಜಿನ್ 6-ಸ್ಪೀಡ್ ಗೇರ್‌ಬಾಕ್ಸ್‌ನೊಂದಿಗೆ ಜೋಡಿಯಾಗಿ ಬರುತ್ತದೆ.
ಇನ್ನು ಈ ಬೈಕ್ ಎತ್ತರದ ವಿಂಡ್‌ಸ್ಕ್ರೀನ್‌ನೊಂದಿಗೆ ಬರುತ್ತದೆ. ಕಾಂಪ್ಯಾಕ್ಟ್ ವಿನ್ಯಾಸದ ಜೊತೆಗೆ ಎಲ್ಇಡಿ ಹೆಡ್‌ಲೈಟ್‌ ಅನ್ನೂ ಇದು ಒಳಗೊಂಡಿದೆ. ಈ ಬೈಕ್‌ನ ವೈಶಿಷ್ಟ್ಯಗಳ ಬಗ್ಗೆ ಗಮನಿಸುವುದಾದರೆ, ಇದು ಐದು ಇಂಚಿನ ಎಎಫ್‌ಟಿ ಸ್ಕ್ರೀನ್ ಹೊಂದಿದ್ದು, ಕನೆಕ್ಟೆಡ್ ಫೀಚರ್‌ಗಳು ಹಾಗೂ ನ್ಯಾವಿಗೇಷನ್ ಅನ್ನು ನೀಡುತ್ತದೆ. ಇದಲ್ಲದೆ, ಇನ್ನೂ ಹಲವು ವೈಶಿಷ್ಟ್ಯಗಳನ್ನು ಇದು ಒಳಗೊಂಡಿದೆ. ಈ ಬೈಕ್ ಸ್ಟೀಲ್ ಡೈಮಂಡ್-ಟ್ಯೂಬ್ ಮೇನ್‌ಫ್ರೇಮ್ ಅನ್ನು ಬಳಸುತ್ತದೆ. ಮುಂಭಾಗದಲ್ಲಿ ಎರಡು-ಪಿಸ್ಟನ್ ಕ್ಯಾಲಿಪರ್‌ಗಳೊಂದಿಗೆ ಡ್ಯುಯಲ್ 296 ಎಂಎಂ ಮುಂಭಾಗದ ಡಿಸ್ಕ್‌ಗಳು ಮತ್ತು ಹಿಂಭಾಗದಲ್ಲಿ 1-ಪಿಸ್ಟನ್ ಕ್ಯಾಲಿಪರ್ ಜೊತೆಗೆ ಡ್ಯುಯಲ್-ಚಾನೆಲ್ ಎಬಿಎಸ್‌ನೊಂದಿಗೆ 240 ಎಂಎಂ ಡಿಸ್ಕ್ ಬ್ರೇಕಿಂಗ್ ಕರ್ತವ್ಯವನ್ನು ನಿರ್ವಹಿಸುತ್ತದೆ. ಇನ್ನು ಮುಂಭಾಗದಲ್ಲಿ ಯುಎಸ್‌ಡಿ ಫೋರ್ಕ್‌ಗಳು ಮತ್ತು ಹಿಂಭಾಗದ ಮೊನೊ-ಶಾಕ್‌ ಸಸ್ಪೆನ್ಷನ್ ಕಾರ್ಯವನ್ನು ನೋಡಿಕೊಳ್ಳುತ್ತವೆ. ಇದು 19-ಇಂಚಿನ ಮುಂಭಾಗದ ಅಲಾಯ್ ವ್ಹೀಲ್ ಹಾಗೂ 17-ಇಂಚಿನ ಹಿಂದಿನ ಚಕ್ರವನ್ನು ಹೊಂದಿದೆ.
ಹೊಸ ಹೋಂಡಾ ಎನ್‌ಎಕ್ಸ್‌ 500 ಬೈಕ್ ಕವಾಸಕಿ ವರ್ಸಿಸ್ 650, ರಾಯಲ್ ಎನ್‌ಫೀಲ್ಡ್ ಹಿಮಾಲಯನ್ 450 ಮತ್ತು ಕೆಟಿಎಂ 390 ಅಡ್ವೆಂಚರ್‌ಗೆ ಇದು ಪ್ರತಿಸ್ಪರ್ಧಿಯಾಗಿರಲಿದೆ.
