ಸರ್ಕಾರ ನನಗೆ ಸ್ಲೀಪಿಂಗ್ ಪಾಟ್ನರ್ ಆಗಿದೆ; ವಿತ್ತಸಚಿವೆ ನಿರ್ಮಲಾ ಸೀತಾರಾಮನ್ ಗೆ ಸ್ಟಾಕ್ ಬ್ರೋಕರ್ ಕೇಳಿದ ಪ್ರಶ್ನೆ ವೈರಲ್.!
ಬಿಎಸ್ಇಯಲ್ಲಿ ಇತ್ತೀಚೆಗೆ ನಡೆದ ಹೂಡಿಕೆದಾರರ ಕಾರ್ಯಕ್ರಮವೊಂದರಲ್ಲಿ ಪಾಲ್ಗೊಂಡಿದ್ದ ನಿರ್ಮಲಾ ಸೀತಾರಾಮನ್ ಅವರು ಕುತೂಹಲಭರಿತ ಸಂವಾದಗಳಲ್ಲಿ ತೊಡಗಿದ್ದರು. ಈ ವೇಳೆ ಸಭಿಕರೊಬ್ಬರ ಎರಡು ಪ್ರಶ್ನೆಗೆ ಅವರು ನಿರುತ್ತರರಾಗಬೇಕಾಯಿತು. ನೀವು ನನಗೆ ಸ್ಲೀಪಿಂಗ್ ಪಾರ್ಟ್ನರ್, ನಾನು ವರ್ಕಿಂಗ್ ಪಾರ್ಟ್ನರ್ ಎಂದು ಹೇಳಿ ಸಭಾಂಗಣದಲ್ಲಿ ಆ ವ್ಯಕ್ತಿ ನಗೆಯ ಬುಗ್ಗೆ ಹರಿಸಿದರು. ಆ ವ್ಯಕ್ತಿ ಕೇಳಿದ ಆ ಎರಡು ಪ್ರಶ್ನೆಗಳೇನು? ಅದಕ್ಕೆ ಕೊನೆಯಲ್ಲಿ ನಿರ್ಮಲಾ ಸೀತಾರಾಮನ್ ನೀಡಿದ ಉತ್ತರ ಏನು? ಈ ವಿಡಿಯೋ ಸೋಷಿಯಲ್ ಮೀಡಿಯಾದಲ್ಲಿ ಮತ್ತು ವಾಟ್ಸಾಪ್ನಲ್ಲಿ ಸಾಕಷ್ಟು ಶೇರ್ ಆಗುತ್ತಿದೆ.
ಸ್ಲೀಪಿಂಗ್ ಪಾರ್ಟ್ನರ್, ವರ್ಕಿಂಗ್ ಪಾರ್ಟ್ನರ್
ಸಿಜಿಎಸ್ಟಿ, ಎಸ್ಜಿಎಸ್ಟಿ, ಐಜಿಎಸ್ಟಿ, ಸ್ಟ್ಯಾಂಪ್ ಡ್ಯೂಟಿ, ಎಸ್ಟಿಟಿ, ಲಾಂಗ್ ಟರ್ಮ್ ಕ್ಯಾಪಿಟಲ್ ಗೇನ್ ಟ್ಯಾಕ್ಸ್ ಹೀಗೆ ಸಾಕಷ್ಟು ತೆರಿಗೆ ಸರ್ಕಾರಕ್ಕೆ ಹೋಗುತ್ತದೆ. ಇವತ್ತು ಭಾರತ ಸರ್ಕಾರ ಬ್ರೋಕರ್ಗಿಂತ ಹೆಚ್ಚು ಸಂಪಾದಿಸುತ್ತಿದೆ. ನಾನು ಹೂಡಿಕೆ ಮಾಡುತ್ತಿದ್ದೇನೆ. ಎಲ್ಲಾ ರೀತಿಯ ರಿಸ್ಕ್ ಅನ್ನು ನಾನು ತೆಗೆದುಕೊಳ್ಳುತ್ತಿದ್ದೇನೆ. ನನ್ನ ಎಲ್ಲಾ ಲಾಭವನ್ನು ಸರ್ಕಾರ ತೆಗೆದುಕೊಳ್ಳುತ್ತಿದೆ. ನನಗೆ ನೀವು (ಸರ್ಕಾರ) ಸ್ಲೀಪಿಂಗ್ ಪಾರ್ಟ್ನರ್, ನಾನು ವರ್ಕಿಂಗ್ ಪಾರ್ಟ್ನರ್. ನನ್ನ ಹಣ, ನನ್ನ ರಿಸ್ಕ್, ನನ್ನ ಸಿಬ್ಬಂದಿ… ಇದರ ಬಗ್ಗೆ ಏನು ಹೇಳುತ್ತೀರಿ? ಎಂದು ಅವರು ಕೇಳಿದರು.
ಇವತ್ತು ಮುಂಬೈನಲ್ಲಿ ಯಾರಾದರು ಮನೆ ಖರೀದಿಸಲು ಹೋದರೆ ಅದು ದುಃಸ್ವಪ್ನವೇ ಆಗಿರುತ್ತದೆ. ನಾನು ಟ್ಯಾಕ್ಸ್ ಕಟ್ಟುತ್ತೇನೆ. ಇವತ್ತು ಎಲ್ಲವನ್ನೂ ಚೆಕ್ನಲ್ಲೇ ಕೊಡಬೇಕು. ಎಲ್ಲಾ ತೆರಿಗೆ ಪಾವತಿಸಿದ ಬಳಿಕ ಉಳಿಯುವ ಹಣವು ನನ್ನ ಬ್ಯಾಂಕ್ ಬ್ಯಾಲನ್ಸ್ ಆಗಿರುತ್ತದೆ. ನಾನು ಮನೆ ಖರೀದಿಸುವಾಗ ಸ್ಟ್ಯಾಂಪ್ ಡ್ಯೂಟಿ, ಜಿಎಸ್ಟಿ ಕಟ್ಟಬೇಕು. ಬಾಂಬೆ ನಗರದಲ್ಲಿ ಅದು ಶೇ. 11ರಷ್ಟಿದೆ. ಅಂದರೆ ಮನೆ ಖರೀದಿಸುವಾಗ ಶೇ. 11ರಷ್ಟು ಹಣ ನನ್ನ ಜೇಬಿಂದ ಹೊರಟುಹೋಗುತ್ತೆ. ಸೀಮಿತ ಸಂಪನ್ಮೂಲ ಇರುವ ಒಬ್ಬ ಸಾಧಾರಣ ವ್ಯಕ್ತಿಗೆ ನೀವು ಮನೆ ಖರೀದಿಸಲು ಹೇಗೆ ನೆರವಾಗಲ್ಲಿರಿ? ಒಬ್ಬ ಬ್ರೋಕರ್ ಇಷ್ಟೊಂದು ತೆರಿಗೆಗಳ ಮಧ್ಯೆ ಹೇಗೆ ಕೆಲಸ ಮಾಡಲು ಸಾಧ್ಯ? ಇಲ್ಲಿ ಸರ್ಕಾರ ನನಗೆ ಸ್ಲೀಪಿಂಗ್ ಪಾರ್ಟ್ನರ್ ಆಗಿದೆ. ನಾನು ಯಾವ ಆದಾಯ ಇಲ್ಲದ ವರ್ಕಿಂಗ್ ಪಾರ್ಟ್ನರ್ ಆಗಿದ್ದೇನೆ ಎಂದು ಆ ವ್ಯಕ್ತಿ ಮತ್ತೊಂದು ಪ್ರಶ್ನೆ ಕೇಳಿದರು
ನಿರ್ಮಲಾ ಸೀತಾರಾಮನ್ ಕೊಟ್ಟ ಉತ್ತರ ಇದು…
ಈ ಎರಡು ಪ್ರಶ್ನೆಗಳು ಸಭಿಕರನ್ನು ನಗೆಗಡಲಿನಲ್ಲಿ ತೇಲಿಸಿತು. ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ಅವರಲ್ಲೂ ನಗೆ ಬರಿಸಿತು. ಅಂತಿಮವಾಗಿ ಈ ಪ್ರಶ್ನೆಗಳಿಗೆ ಅವರು ಚುಟುಕಾಗಿ ಉತ್ತರ ಕೊಟ್ಟರು. ‘ಸ್ಲೀಪಿಂಗ್ ಪಾರ್ಟ್ನರ್ ಇಲ್ಲಿ ಕೂತು ಈ ಪ್ರಶ್ನೆಗೆ ಉತ್ತರ ಕೊಡಲು ಸಾಧ್ಯವಿಲ್ಲ’ ಎಂದು ಅವರು ಹೇಳಿದರು. ANI ಯಲ್ಲಿ ಇದರ ವಿಡಿಯೋವನ್ನು ಹಾಕಲಾಗಿದೆ.
