Cricket : ಸರ್ವಶ್ರೇಷ್ಠ ನಾಯಕ ಮಹೇಂದ್ರ ಸಿಂಗ್ ಧೋನಿ ಅವರಿಗೆ ವಿಶೇಷ ಗೌರವ ಸಲ್ಲಿಸಲು ಈ ನಿರ್ಧಾರ ಕೈಗೊಂಡ BCCI!
ಮೂರು ಐಸಿಸಿ ಟ್ರೋಫಿಗಳ ವಿಜೇತ, ಭಾರತ ಕಂಡಂತಹ ಸರ್ವಶ್ರೇಷ್ಠ ನಾಯಕ ಮಹೇಂದ್ರ ಸಿಂಗ್ ಧೋನಿ ಅವರಿಗೆ (Mahendra Singh Dhoni) ವಿಶೇಷ ಗೌರವ ಸಲ್ಲಿಸಲು ಬಿಸಿಸಿಐ (BCCI) ಮುಂದಾಗಿದೆ. ಮಾಹಿ ಅವರ ಜೆರ್ಸಿ ನಂಬರ್ 7ಕ್ಕೆ ಶಾಶ್ವತ ವಿದಾಯ ನೀಡಲು ಬಿಸಿಸಿಐ ನಿರ್ಧರಿಸಿದೆ. ಇನ್ಮುಂದೆ ಈ ಸಂಖ್ಯೆಯ ಜೆರ್ಸಿಯನ್ನು ಯಾರೂ ತೊಡುವಂತಿಲ್ಲ ಎಂದು ಸೂಚಿಸಿದೆ ಎಂದು ವರದಿಯಾಗಿದೆ.
ಭಾರತ ತಂಡಕ್ಕಾಗಿ 15 ವರ್ಷಗಳ ಕಾಲ ಅಂತಾರಾಷ್ಟ್ರೀಯ ವೃತ್ತಿಜೀವನ ಸೇವೆ ಸಲ್ಲಿಸಿದ ಧೋನಿ, ನಂಬರ್ 7 ಜೆರ್ಸಿ ಧರಿಸಿ ಕಣಕ್ಕಿಳಿದಿದ್ದರು. ಧೋನಿ ಅವರಂತೆ ಜೆರ್ಸಿಯೂ ಕೂಡ ಅಷ್ಟೇ ಪ್ರಸಿದ್ಧಿ ಎಂಬುದು ವಿಶೇಷ. ಲೆಜೆಂಡರಿ ಆಟಗಾರನ ನಾಯಕತ್ವದಲ್ಲಿ 2007ರಲ್ಲಿ ಟಿ20 ವಿಶ್ವಕಪ್, 2011ರಲ್ಲಿ ಏಕದಿನ ವಿಶ್ವಕಪ್ ಮತ್ತು 2013ರಲ್ಲಿ ಭಾರತ ಐಸಿಸಿ ಚಾಂಪಿಯನ್ಸ್ ಟ್ರೋಫಿ ಗೆದ್ದಿದೆ.
ಇಂಡಿಯನ್ ಎಕ್ಸ್ಪ್ರೆಸ್ ವರದಿ ಪ್ರಕಾರ, ಧೋನಿ ಅಂತಾರಾಷ್ಟ್ರೀಯ ಕ್ರಿಕೆಟ್ಗೆ ನಿವೃತ್ತಿ ಘೋಷಿಸಿದ ನಂತರ, ಅವರಿಗೆ ಗೌರವ ಸಲ್ಲಿಸುವ ಸಲುವಾಗಿ ಬಿಸಿಸಿಐ ಜೆರ್ಸಿ ನಂಬರ್ 7ಕ್ಕೆ ನಿವೃತ್ತಿ ಹೇಳಲು ಬಿಸಿಸಿಐ ನಿರ್ಧರಿಸಿದೆ. 42 ವರ್ಷದ ಧೋನಿಗೆ ಸಂಬಂಧಿಸಿದ ಈ ಜೆರ್ಸಿಯನ್ನು ಯಾರೂ ಕೂಡ ಆಯ್ಕೆ ಮಾಡುವಂತಿಲ್ಲ. ಧೋನಿಗೂ ಮೊದಲು 2017ರಲ್ಲಿ ಸಚಿನ್ ತೆಂಡೂಲ್ಕರ್ ಅವರ (Sachin Tendulkar) ಐಕಾನಿಕ್ ಜೆರ್ಸಿ 10 ಅನ್ನು ಬಿಸಿಸಿಐ ನಿವೃತ್ತಿಗೊಳಿಸಿ ಗೌರವ ಸೂಚಿಸಿತ್ತು.
ಬಿಸಿಸಿಐ ಹಿರಿಯ ಅಧಿಕಾರಿಯೊಬ್ಬರು ಮಾತನಾಡಿ, ಯುವ ಆಟಗಾರರು ಮತ್ತು ಪ್ರಸ್ತುತ ಭಾರತೀಯ ತಂಡದ ಆಟಗಾರರಿಗೆ ಧೋನಿ ಅವರ ನಂಬರ್ 7 ಆಯ್ಕೆ ಮಾಡದಂತೆ ತಿಳಿಸಲಾಗಿದೆ. ಧೋನಿ ಕ್ರಿಕೆಟ್ಗೆ ನೀಡಿದ ಕೊಡುಗಾಗಿ ಅವರ ಜೆರ್ಸಿಗೆ ನಿವೃತ್ತಿ ನೀಡಲು ಬಿಸಿಸಿಐ ನಿರ್ಧರಿಸಿದೆ. ಈಗ ಅಂತಾರಾಷ್ಟ್ರೀಯ ಕ್ರಿಕೆಟ್ಗೆ ಬರುವ ಆಟಗಾರರು ಈ ಜೆರ್ಸಿಯನ್ನು ಪಡೆಯಲು ಸಾಧ್ಯವಿಲ್ಲ. ಅದೇ ರೀತಿ ಸಚಿನ್ರ ಜೆರ್ಸಿಯನ್ನೂ ಹೊರಗಿಡಲಾಗಿದೆ ಎಂದು ಹೇಳಿದ್ದಾರೆ.
ಪ್ರಸ್ತುತ 60 ಬೆಸ ಸಂಖ್ಯೆಗಳನ್ನು ಭಾರತೀಯ ತಂಡದಲ್ಲಿ ನಿಯಮಿತರು ಮತ್ತು ಸ್ಫರ್ಧೆಯಲ್ಲಿ ಇರುವವರಿಗೆ ಗೊತ್ತುಪಡಿಸಲಾಗಿದೆ. ಆದ್ದರಿಂದ ಆಟಗಾರನು ಸುಮಾರು 1 ವರ್ಷ ಅಥವಾ ಅದಕ್ಕಿಂತ ಹೆಚ್ಚಿನ ಕಾಲ ತಂಡದಿಂದ ಹೊರಗಿದ್ದರೂ ನಾವು ಹೊಸ ಆಟಗಾರನಿಗೆ ಅವರ ಸಂಖ್ಯೆ ನೀಡುವುದಿಲ್ಲ ಎಂದು ಬಿಸಿಸಿಐ ಅಧಿಕಾರಿ ಸ್ಪಷ್ಟಪಡಿಸಿದರು. ಇದೀಗ ಭಾರತೀಯ ಕ್ರಿಕೆಟ್ಗೆ ಸಲ್ಲಿಸಿದ ಅಪಾರ ಕೊಡುಗೆಗಾಗಿ ಧೋನಿ ಅವರ 7ನೇ ಜೆರ್ಸಿಗೆ ನಿವೃತ್ತಿ ನೀಡಲು ಬಿಸಿಸಿಐ ನಿರ್ಧರಿಸಿರುವುದು ಅಭಿಮಾನಿಗಳಿಗೆ ಖುಷಿ ನೀಡಿದೆ.
ಶಾರ್ದೂಲ್ ವಿರುದ್ಧ ಆಕ್ರೋಶ
2017ರಲ್ಲಿ ಶಾರ್ದೂಲ್ ಠಾಕೂರ್ ಅವರು ಭಾರತದ ಪರ ಅಂತಾರಾಷ್ಟ್ರೀಯ ಪಂದ್ಯವೊಂದರಲ್ಲಿ ಸಚಿನ್ ಅವರ ಐಕಾನಿಕ್ ಜೆರ್ಸಿ 10 ಅನ್ನು ಧರಿಸಿ ಕಣಕ್ಕಿಳಿದಿದ್ದರು. ಇದಾದ ನಂತರ ಈ ಜೆರ್ಸಿಯನ್ನು ನಿವೃತ್ತಗೊಳಿಸಲಾಯಿತು. ಶಾರ್ದೂಲ್ ಠಾಕೂರ್ ಮಾತ್ರ ಹೆಚ್ಚು ಟ್ರೋಲ್ಗೆ ಒಳಗಾಗಿದ್ದರು. ಅಲ್ಲದೆ, ಅಭಿಮಾನಿಗಳು ಸೋಷಿಯಲ್ ಮೀಡಿಯಾದಲ್ಲಿ ಬಿಸಿಸಿಐ ವಿರುದ್ಧ ಭಾರಿ ಆಕ್ರೋಶ ವ್ಯಕ್ತಪಡಿಸಿದ್ದರು. ಬಿಸಿಸಿಐ ಮಧ್ಯ ಪ್ರವೇಶಿಸಿ ಠಾಕೂರ್ಗೆ ಜರ್ಸಿ ನಂಬರ್ 54ಕ್ಕೆ ಬದಲಿಸಿತು.
ಮುಂದಿನ ದಿನಗಳಲ್ಲಿ ಕೊಹ್ಲಿ-ರೋಹಿತ್
ಸಚಿನ್ ಮತ್ತು ಧೋನಿ ನಂತರ ವಿರಾಟ್ ಕೊಹ್ಲಿ ಜೆರ್ಸಿ ನಂಬರ್ 18 ಮತ್ತು ರೋಹಿತ್ ಶರ್ಮಾ ಅವರ ಜೆರ್ಸಿ ನಂಬರ್ 45 ಅನ್ನು ಭವಿಷ್ಯದಲ್ಲಿ ನಿವೃತ್ತಿಗೊಳಿಸಿದರೂ ಅಚ್ಚರಿ ಇಲ್ಲ. ಇವರಿಬ್ಬರು ಭಾರತ ತಂಡದ ಪರ ಬ್ಯಾಟಿಂಗ್ ಲೆಜೆಂಡ್ಗಳಾಗಿ ಮಾರ್ಪಟ್ಟಿದ್ದು, ತಂಡಕ್ಕೆ ಅಪಾರ ಕೊಡುಗೆ ನೀಡಿದ್ದಾರೆ. ಹಾಗಾಗಿ ಅವರ ಕೊಡುಗೆಗೆ ಗೌರವ ಸಲ್ಲಿಸುವ ಸಲುವಾಗಿ 18 ಮತ್ತು 45 ಜೆರ್ಸಿಗಳಿಗೆ ವಿದಾಯ ಹೇಳಿದರೂ ಅಚ್ಚರಿ ಇಲ್ಲ.
