ಜೋಯಿಡಾ ತಾಲೂಕಿನ ಕಾರ್ಟೋಳಿ ಗ್ರಾಮದ ಮಹಾದೇವ ವೇಳಿಪ ವಯೋ ಸಹಜತೆಯ ಅನಾರೋಗ್ಯದಿಂದ ಇಂದು ಕೊನೆಯುಸಿರೆಳೆದಿದ್ದಾರೆ. ಜನಪದ ಕಲೆ ಹಾಗೂ ಪರಿಸರ ರಕ್ಷಣೆಗೆ ನಿಂತಿದ್ದ ಹಾಗೂ ರಾಜ್ಯ ಪ್ರಶಸ್ತಿ, ರಾಜ್ಯೋತ್ಸವ ಪ್ರಶಸ್ತಿಗೆ ಭಾಜನರಾಗಿದ್ದ ಮಹಾದೇವ ವೇಳಿಪ ಈಗ ಕೇವಲ ನೆನಪು ಮಾತ್ರ.
ಕಲಾವಿದ ಮಹಾದೇವ ವೇಳಿಪ ನೂರಾರು ಬಗೆಯ ಗೆಡ್ಡೆ ಗೆಣಸುಗಳನ್ನು ಉಳಿಸಿ ಬೆಳಸುವ ಜೊತೆಗೆ ಅರಣ್ಯ ಸಂರಕ್ಷಣೆ ಬಗ್ಗೆಯೂ ಹೆಚ್ಚಿನ ಕಾಳಜಿ ವಹಿಸಿ ಪರಿಸರ ಪ್ರೇಮಿಯಾಗಿದ್ದರು. ಜನಪದ ಹಾಡುಗಳನ್ನು ಸಾವಿರ ಲೆಕ್ಕದಲ್ಲಿ ನಿರಂತರ ಹಾಡುತಿದ್ದ ಮಹಾದೇವ ವೇಳಿಪ ಅವರ ಸಾಧನೆ ಅಪಾರ.

ಹಿಂದುಳಿದ ಪ್ರದೇಶವಾದ ಜೊಯಿಡಾ ತಾಲೂಕಿನ ಕಾಟೋ೯ಳಿ ಭಾಗದವರಾದ ಇವರು ಚಿಕ್ಕಂದಿನಿಂದಲೇ ಪರಿಸರದ ಪರ ಒಲವು ಬೆಳೆಸಿಕೊಂಡಿದ್ದರು. ಕುಣಬಿ ಬುಡಕಟ್ಟು ಸಮುದಾಯದ ಹಿರಿಯರಾದ ಮಾದೇವ ವೇಳಿಪ ಅವರು ಮಳೆ, ಪಕ್ಷಿ, ಗಿಡಮರಗಳ ಬಗ್ಗೆ, ರಾಮಾಯಣ, ಮಹಾಭಾರತದ ಕುರಿತಾದ ಸಾಂಪ್ರದಾಯಿಕ ಹಾಡುಗಳನ್ನು ಹಾಡುತ್ತಾರೆ. ವಿಶೇಷವಾಗಿ ಯಾವುದೇ ಕಾಯಿಲೆ, ರೋಗಗಳು ಬಂದರೆ ಗಿಡಮೂಲಿಕೆಗಳ ಮೂಲಕವೇ ಔಷಧಿಯನ್ನು ನೀಡುವುದರಲ್ಲಿ ಪರಿಣಿತಿ ಹೊಂದಿದ್ದ ಇವರು ನೂರಾರು ಜನರ ಪ್ರಾಣವನ್ನು ಉಳಿಸಿದ್ದಾರೆ.

ಜೀವನ ನಿರ್ವಹಣೆಗಾಗಿ ಅಪರೂಪದ ಗೆಡ್ಡೆ ಗೆಣಸುಗಳನ್ನು ಬೆಳೆದ ವೇಳಿಪ ಅವರಿಗೆ ಮೂರು ಗಂಡು ಮತ್ತು ನಾಲ್ಕು ಹೆಣ್ಣು ಮಕ್ಕಳಿದ್ದು, ಪತ್ನಿ ಪಾರ್ವತಿ ವೇಳಿಪ ಅವರು ಕಳೆದ ಹತ್ತು ವರ್ಷಗಳ ಹಿಂದೆ ನಿಧನರಾಗಿದ್ದಾರೆ. ವಿಶೇಷ ಅಂದ್ರೆ ಇವರ ಪರಿಸರ ಕಾಳಜಿ ಮೆಚ್ಚಿ ಪವರ್‌ಸ್ಟಾರ್‌ ಪುನೀತ್ ರಾಜ್‌ಕುಮಾರ್ ಅವರು ಜೋಯ್ಡಾಗೆ ಬಂದಿದ್ದ ವೇಳೆ ಮಾದೇವ ವೇಳಿಪ ಅವರನ್ನು ಭೇಟಿಯಾಗಿ ಅವರ ನಿಸ್ವಾರ್ಥ ಸೇವೆಯನ್ನು ಮೆಚ್ಚಿ ಕೊಂಡಾಡಿದ್ದರು.