ಇಳಿಕೆ ಕಂಡ ಈರುಳ್ಳಿ ದರ ; ಮಾರುಕಟ್ಟೆಯಲ್ಲಿ ಎಷ್ಟಿದೆ ದರ!
ಬೆಂಗಳೂರು: ನವೆಂಬರ್ ಬಂತೆಂದರೆ ಈರುಳ್ಳಿ ದರ ಸೆಂಚುರಿ ಬಾರಿಸುತ್ತಿತ್ತು. ಗ್ರಾಹಕರು ಬೆಲೆ ಏರಿಕೆ ಬಿಸಿಯಿಂದ ತತ್ತರಿಸುತ್ತಿದ್ದರು. ಆದರೆ, ಇನ್ನು ಮುಂದೆ ಗ್ರಾಹಕರಿಗೆ ಬೆಲೆ ಏರಿಕೆಯ ಬಿಸಿಯಿಲ್ಲ. ಮಾರುಕಟ್ಟೆಗೆ ಹೆಚ್ಚಿನ ಪ್ರಮಾಣದ ಈರುಳ್ಳಿ ದಾಸ್ತಾನು ಬಂದ ಹಿನ್ನೆಲೆ ದರ ಇಳಿಕೆ ಆರಂಭವಾಗಿದೆ.
ಈರುಳ್ಳಿ ದರ ಸಮರವನ್ನು ಎದುರಿಸಲು ಕೇಂದ್ರ ಸರ್ಕಾರ ಈ ಬಾರಿ ಮುಂಚಿತವಾಗಿಯೇ ಸಾಕಷ್ಟು ಪ್ರಮಾಣದಲ್ಲಿ ಈರುಳ್ಳಿ ದಾಸ್ತಾನು ಮಾಡಿಟ್ಟಿದೆ. ಜತೆಗೆ ಗ್ರಾಹಕರಿಗೆ 25 ರೂ.ಗೆ ಈರುಳ್ಳಿಯನ್ನು ಸರ್ಕಾರ ವತಿಯಿಂದಲೇ ಮಾರಾಟ ಮಾಡುವುದಾಗಿ ಹೇಳಿತು. ಈ ಹಿನ್ನೆಲೆಯಲ್ಲಿ ರಾಜ್ಯದಲ್ಲಿಅತಿವೃಷ್ಟಿಯಿದ್ದರೂ ಬೆಲೆ ನಿಯಂತ್ರಣದಲ್ಲಿದೆ.
ಈರುಳ್ಳಿ ದರ 65 ರೂಪಾಯಿಯಿಂದ 50 ರೂಪಾಯಿಗೆ ಇಳಿಕೆ
ಕಳೆದ ಎರಡು ವಾರಗಳ ಹಿಂದಷ್ಟೇ ಯಶವಂತಪುರ ಎಪಿಎಂಸಿಯಲ್ಲಿ ಗುಣಮಟ್ಟದ ಈರುಳ್ಳಿ ಕೆ.ಜಿ.ಗೆ 65 ರೂ.ವರೆಗೆ ತಲುಪಿತ್ತು. ಇದೀಗ ಗುಣಮಟ್ಟದ ಮೊದಲ ದರ್ಜೆಯ ಈರುಳ್ಳಿ ಕೆ.ಜಿ.ಗೆ 50 ರೂ.ಗೆ ಇಳಿದಿದೆ. ಎರಡು ಮತ್ತು ಮೂರನೇ ದರ್ಜೆಯ ಈರುಳ್ಳಿ ದರವೂ ಇಳಿಕೆಯಾಗಿದೆ.
ಮಾರುಕಟ್ಟೆಗೆ ಬರುತ್ತಿದೆ ಈರುಳ್ಳಿ
ಯಶವಂತಪುರ ಎಪಿಎಂಸಿಗೆ ಈ ಹಿಂದೆ ವಾರಗಳಲ್ಲಿ ನಿತ್ಯ 2,500 ಟನ್‌ ಈರುಳ್ಳಿ ಬರುತ್ತಿತ್ತು. ಇದೀಗ ಬರೋಬ್ಬರಿ ನಾಲ್ಕು ಸಾವಿರ ಟನ್‌ ಈರುಳ್ಳಿ ಬರುತ್ತಿದೆ. ಮಹಾರಾಷ್ಟ್ರದಿಂದ 2 ಸಾವಿರ ಟನ್‌ ಹಳೆಯ ಈರುಳ್ಳಿ ಬಂದರೆ, ಕರ್ನಾಟಕದ ಚಿತ್ರದುರ್ಗ, ಚಳ್ಳಕೆರೆ, ಗದಗ ಮತ್ತಿತರ ಭಾಗಗಳಿಂದ 2 ಸಾವಿರ ಟನ್‌ನಷ್ಟು ಈರುಳ್ಳಿ ಬಂದಿದೆ. ಹೀಗಾಗಿ, ಬೆಲೆ ಇಳಿಕೆಯಾಗಿದೆ ಎಂದು ಯಶವಂತಪುರ ಎಪಿಎಂಸಿ ಈರುಳ್ಳಿ, ಆಲೂಗಡ್ಡೆ ವರ್ತಕರ ಸಂಘದ ಕಾರ್ಯದರ್ಶಿ ಬಿ. ರವಿಶಂಕರ್‌ ತಿಳಿಸಿದರು.
ಬೆಲೆ ಮತ್ತಷ್ಟು ಇಳಿಕೆಯಾಗುವ ಸಾದ್ಯತೆ
ಬೆಲೆ ಸ್ವಲ್ಪ ಇಳಿಕೆಯಾಗುತ್ತಿದ್ದಂತೆಯೇ ಹಲವು ರೈತರು ಈರುಳ್ಳಿಯನ್ನು ಹೆಚ್ಚಿನ ಪ್ರಮಾಣದಲ್ಲಿ ಮಾರುಕಟ್ಟೆಗೆ ತರುತ್ತಿದ್ದಾರೆ. ಸಾಕಷ್ಟು ಈರುಳ್ಳಿ ಬರುತ್ತಿರುವುದರಿಂದ ಬೆಲೆ ಮತ್ತಷ್ಟು ಇಳಿಕೆಯಾಗುವ ಸಾದ್ಯತೆಯಿದೆ. ಒಂದು ವೇಳೆ ಮಾಲು ಕಡಿಮೆಯಾದರೆ ಆಗ ಬೆಲೆ ಸ್ವಲ್ಪ ಏರಿಕೆಯಾಗಬಹುದು. ಆದರೆ, ಹೆಚ್ಚು ಬೆಲೆ ಏರುವುದಿಲ್ಲಎಂದು ಅವರು ನುಡಿದರು.
ಮಾರುಕಟ್ಟೆ ಹೊರತು ಪಡಿಸಿ ಎಷ್ಟಿದೆ ದರ?
ಚಿಲ್ಲರೆ ದರದಲ್ಲಿಈರುಳ್ಳಿ ಕೆ.ಜಿ.ಗೆ 50-60 ರೂ. ನಂತೆ ಮಾರಾಟವಾಗುತ್ತಿದೆ. ಆದರೆ, ಕೆಲವು ಮಳಿಗೆಗಳನ್ನು ದರ ತಗ್ಗಿದರೂ ಕೂಡಾ ತಮ್ಮ ಮಾರಾಟ ದರವನ್ನು ಇಳಿಕೆ ಮಾಡಲು ವರ್ತಕರು ಹಿಂದೇಟು ಹಾಕುತ್ತಿದ್ದಾರೆ. ಜತೆಗೆ ಕೆಲವರು ಕಾದುನೋಡುವ ತಂತ್ರ ಅನುಸರಿಸುತ್ತಿದ್ದಾರೆ. ಮಾರುಕಟ್ಟೆಗಳು, ಹಾಪ್‌ಕಾಮ್ಸ್‌ ಮಳೆಗಗಳಲ್ಲಿ ಮಾತ್ರ ಈರುಳ್ಳಿ ದರ ಇಳಿಕೆಯಾಗಿದೆ.
ಡಿಸೆಂಬರ್‌ನಲ್ಲಿ ಮತ್ತಷ್ಟು ಅಗ್ಗ!
ಡಿಸೆಂಬರ್‌ನಲ್ಲಿ ಮತ್ತೆ ಮಹಾರಾಷ್ಟ್ರದ ಕೆಂಪು ಈರುಳ್ಳಿ ಬೆಳೆ ಕೊಯ್ಲಿಗೆ ಬರಲಿದೆ. ಜತೆಗೆ, ಗುಜರಾತ್‌, ರಾಜಸ್ಥಾನದ ಬೆಳೆಯೂ ಬರಲಿದೆ. ಮಹಾರಾಷ್ಟ್ರದ ಕೆಂಪು ಈರುಳ್ಳಿ ಹೆಚ್ಚು ದಿನ ಸಂಗ್ರಹಿಸಲು ಯೋಗ್ಯವಾದ ಈರುಳ್ಳಿಯಲ್ಲ. ಹೀಗಾಗಿ, ಮುಂದಿನ ದಿನಗಳಲ್ಲಿಈರುಳ್ಳಿ ಬೆಲೆ ಮತ್ತಷ್ಟು ಇಳಿಕೆಯಾಗುವ ಸಾಧ್ಯತೆಯಿದೆ.
ಎಪಿಎಂಸಿಯಲ್ಲಿಈರುಳ್ಳಿ ದರ ( ಪ್ರತಿ ಕೆಜಿ)
- ಮೊದಲ ದರ್ಜೆ ಈರುಳ್ಳಿ – 40 ರಿಂದ 50 ರೂ.
- ಎರಡನೇ ದರ್ಜೆ ಈರುಳ್ಳಿ – 30 ರಿಂದ40 ರೂ.
- ಮೂರನೇ ದರ್ಜೆ ಈರುಳ್ಳಿ – 20 ರಿಂದ 30 ರೂ.
