ಹೂ ಕೀಳಲು ಕೂಲಿಯಾಳು ಒಬ್ಬರಿಗೆ ದಿನಕ್ಕೆ 300 ರಿಂದ ಮುನ್ನೂರೈವತ್ತು ರೂಪಾಯಿ ನೀಡಬೇಕು. ಒಬ್ಬ ಕೂಲಿಯಾಳು ದಿನಕ್ಕೆ ಹೆಚ್ಚೆಂದರೆ 40 ರಿಂದ 50 ಕೆ.ಜಿ. ತೂಕದ ಹೂ ಕೀಳಬಹುದು. ಕೂಲಿ ಹಣ ನೀಡುವುದರ ಜತೆಯಲ್ಲಿ, ಕಿತ್ತಿರುವ ಹೂವುಗಳನ್ನು ಮಾರಾಟಗಾರರಿಗೆ ತಲುಪಿಸಬೇಕು, ಬೆಳೆ ಬಾಡದಂತೆ ನೀರು ಹಾಯಿಸಬೇಕು, ಕೆಲವು ಅಗತ್ಯ ಔಷಧಿ ಸಿಂಪಡಿಸಬೇಕು ಸೇರಿದಂತೆ ಇನ್ನಿತರ ಖರ್ಚು ಹೆಚ್ಚಿದೆ. ಲಾಭಗಿಂತ ಖರ್ಚು ಹೆಚ್ಚಾದ ಪರಿಣಾಮ ರೈತ ಸೇವಂತಿ ಹೂ ನಾಶ ಮಾಡಿದ್ದಾನೆ.

ಹೊಲದಲ್ಲಿ ಹೂ ಹುಲುಸಾಗಿ ಬೆಳೆದರೂ, ನಾನಾ ಕಾರಣಗಳಿಂದ ಹೂವುಗಳನ್ನು ಕೇಳುವವರಿಲ್ಲ. ಆದ್ದರಿಂದ ಮಾರುಕಟ್ಟೆಯಲ್ಲೆ ಸುರಿದು ಬರಬೇಕಾದ ಪರಿಸ್ಥಿತಿ ನಿರ್ಮಾಣವಾಗಿದೆ. ಈ ಕಾರಣದಿಂದ ರೈತ ತನ್ನ ಬೆಳೆಯನ್ನು ಹಾಳು ಮಾಡಿದ್ದಾನೆ. ನಾಲ್ಕೈದು ತಿಂಗಳಿನಿಂದಲೂ ಹಗಲು ರಾತ್ರಿ ನೀರು ಹಾಯಿಸಿ ಒಂದು ಎಕರೆ ಪ್ರದೇಶದಲ್ಲಿ ಸೊಂಪಾಗಿ ಬೆಳೆದು ಹೂಬಿಟ್ಟಿದ್ದ ಸೇವಂತಿ ಭೂಮಿ ತಾಯಿಗೆ ಮಕಾಡೆ ಮಲಗಿದೆ.

1 ಎಕರೆ ಹೊಲದಲ್ಲಿ ಸೇವಂತಿಗೆ ನಾಟಿ
ತಾನು ಹಾಗೂ ತನ್ನ ಪತ್ನಿ ಮಂಜಮ್ಮಳ ಸಹಕಾರದೊಂದಿಗೆ ಹಿಂದೆ ಎರಡು ಬಾರಿ ಸೇವಂತಿ ಬೆಳೆ ಬೆಳೆದು ಅಲ್ಪ ಲಾಭವನ್ನು ಈ ದಂಪತಿ ಕಂಡಿದ್ದರು. ಅಂತೆಯೇ ಈ ವರ್ಷವೂ ಲಾಭದ ನಿರೀಕ್ಷೆಯಿಂದ ಸೇವಂತಿ ಬೆಳೆಯಲು ರೈತ ಮುಂದಾಗಿದ್ದ. ಅದಕ್ಕಾಗಿ ನಾಲ್ಕೈದು ತಿಂಗಳ ಹಿಂದೆ ತನ್ನ ಒಂದು ಎಕರೆ ಜಮೀನಿನಲ್ಲಿ ಸಸಿ ನಾಟಿ ಮಾಡಿದ್ದರು. ಅಲ್ಪ ನೀರಿನಲ್ಲಿಯೇ ಹಗಲು ರಾತ್ರಿ ನೀರು ಹಾಯಿಸಿ ಹೂ ಬೆಳೆಸಿದ್ದರು.

ಶ್ರಾವಣ ಮಾಸದಿಂದ ಹೂಗಳಿಗೆ ಸಹಜವಾಗಿ ಮಾರುಕಟ್ಟೆಯಲ್ಲಿ ಸೀಜನ್ ಆರಂಭವಾಗಿ ಬೆಲೆಯೂ ಜಾಸ್ತಿಯಾಗುತ್ತದೆ ಎಂಬುದು ರೈತನ ಚಿಂತನೆಯಾಗಿತ್ತು. ಅಲ್ಲದೇ ಹೂವಿನ ದರ ದೀಪಾವಳಿ ಹಬ್ಬದವರೆಗೂ ಹೆಚ್ಚು ಇರುತ್ತದೆ ಎಂಬ ಆಶಯವನ್ನು ರೈತ ಹೊಂದಿದ್ದರು. ಆದರೆ ಅವನ ಆಸೆ ಕಮರಿದೆ. ಎಕರೆ ಸೇವಂತಿಗೆ ಬೆಳೆಯಲು 12 ಸಾವಿರ ರೂ.ಗಳನ್ನು ತೆತ್ತು ಸಸಿ ತಂದಿದ್ದೆ, ನಾಲ್ಕು ತಿಂಗಳಿನಿಂದಲೂ ನೀರು ಹಾಯಿಸಿ ಕಷ್ಟ ಪಟ್ಟು ಬೆಳೆಸಿದ್ದೆ, ಆಗಾಗ್ಗೆ ಕಳೆ ತೆಗೆಸಿ, ಗೊಬ್ಬರ ಹಾಕಿ ಔಷಧೋಪಚಾರ ನಡೆಸಿದ್ದೇ. ಈ ಹೂವನ್ನು ಮೊಳಕಾಲ್ಮುರು, ನೆರೆಯ ಆಂಧ್ರದ ರಾಯದುರ್ಗ ಹಾಗೂ ಬಳ್ಳಾರಿ ಮಾರುಕಟ್ಟೆಗೆ ನೀಡಿ ನಾನು ನಷ್ಟ ಅನುಭವಿಸಿರಲಿಲ್ಲ.

ಈ ಬಾರಿ ಬೆಲೆ ಕುಸಿತವು ನನಗೆ ನೋವು ತಂದ ಕಾರಣ ಬೆಳೆ ನಾಶಕ್ಕೆ ನಿರ್ಧರಿಸಿದೆ ಎಂದು ರೈತ ಮಂಜುನಾಥ್ ಬೇಸರ ವ್ಯಕ್ತಪಡಿಸುತ್ತಾರೆ. ಅಲ್ಲದೇ ಬೆಳೆ ನಾಟಿಗಾಗಿ ಧರ್ಮಸ್ಥಳ ಸಂಘದಿಂದ ತಂದ ಸಾಲ, ವಾರಕ್ಕೊಮ್ಮೆ ಕಡ್ಡಾಯವಾಗಿ ಕಂತು ಕಟ್ಟಲೇ ಬೇಕಾದ ಅನಿವಾರ್ಯತೆ ಬೆಳೆ ನಾಶಕ್ಕೆ ಮುಂದಾಗಿಸಿದೆ. ಈ ಬೆಳೆಯ ಬದಲು ಅನ್ಯ ಬೆಳೆ ಬೆಳೆದಲ್ಲಿ ಲಾಭ ಕಾಣುವ ಲೆಕ್ಕಾಚಾರ ರೈತನದ್ದಾಗಿದ್ದು, ಹೂ ಬೆಳೆಗಾರರತ್ತ ಸರಕಾರ ನೋಡಿ ಸಣ್ಣಮಟ್ಟದ ಪರಿಹಾರವನ್ನಾದರೂ ನೀಡಲಿ ಎಂದು ಆಶಿಸಿದ್ದಾರೆ.