ಮಂಗಳೂರು ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ಕಾರು ಪಾರ್ಕಿಂಗ್ಗೆ ವಿನೂತನ ಯೋಜನೆ ಜಾರಿ
ಮಂಗಳೂರು: ಮಂಗಳೂರು ಅಂತರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ (Mangaluru international airport) ಹೊಸ ಹೊಸ ಬದಲಾವಣೆಗಳಾಗುತ್ತಿವೆ. ತನ್ನ ಪ್ರಯಾಣಿಕರಿಗೆ ಹೆಚ್ಚಿನ ಸವಲತ್ತು ನೀಡಲು ಹೆಚ್ಚಿನ ಆಧ್ಯತೆಯನ್ನು ಕೊಡಲಾಗುತ್ತಿದೆ. ಆತ್ಮೀಯರು ಮತ್ತು ಸಂಬಂಧಿಕರನ್ನು ಕರೆದೊಯ್ಯುವುದಕ್ಕೆಂದು ಮಂಗಳೂರು ವಿಮಾನ ನಿಲ್ದಾಣಕ್ಕೆ ಬರುವವರಿಗೆ ಶೀಘ್ರದಲ್ಲೇ ವಿಮಾನ ನಿಲ್ದಾಣದ ಟರ್ಮಿನಲ್‌ ಪ್ರವೇಶಿಸಲು ಅವಕಾಶ ದೊರೆಯಲಿದೆ ಎಂದು ಕೆಲ ದಿನಗಳ ಹಿಂದಷ್ಟೇ ತಿಳಿಸಲಾಗಿತ್ತು. ಈಗ ಮತ್ತೆ ಪ್ರಯಾಣಿಕರನ್ನು ಗಮನದಲ್ಲಿಟ್ಟುಕೊಂಡು ಅವರಿಗೆ ಅನುಕೂಲವಾಗಲೆಂದೇ ಫಾಸ್ಟ್ ಟ್ಯಾಗ್ ಕಾರ್ ಪಾರ್ಕಿಂಗ್ ಸೌಲಭ್ಯ ಮಾಡಲಾಗುತ್ತಿದೆ(FASTag Car Parking). ಸದ್ಯ ಈಗ ತನ್ನ ಸ್ವಯಂಚಾಲಿತ ಕಾರ್ ಪಾರ್ಕಿಂಗ್ ವ್ಯವಸ್ಥೆಗೆ ಮತ್ತೊಂದು ಸೌಲಭ್ಯವನ್ನು ಸೇರಿಸಲಾಗಿದೆ. ಮಂಗಳವಾರದಿಂದ(ಏಪ್ರಿಲ್ 17) ಫಾಸ್ಟ್ ಟ್ಯಾಗ್ ಕಾರ್ ಪಾರ್ಕಿಂಗ್ ಸೇವೆಗೆ ಚಾಲನೆ ನೀಡಲಾಗಿದೆ.
ಮಂಗಳೂರು ವಿಮಾನ ನಿಲ್ದಾಣಕ್ಕೆ ಬರುವವರ ಸಂಖ್ಯೆ ಹೆಚ್ಚಾಗಿದೆ. ಹೀಗಾಗಿ ಇದನ್ನು ಗಮನದಲ್ಲಿಟ್ಟುಕೊಂಡು ಸ್ವಯಂಚಾಲಿತ ಕಾರ್ ಪಾರ್ಕಿಂಗ್ ವ್ಯವಸ್ಥೆಯ ಜೊತೆಗೆ ಫಾಸ್ಟ್ ಟ್ಯಾಗ್ ವ್ಯವಸ್ಥೆಯನ್ನೂ ಜಾರಿ ಮಾಡಲಾಗಿದೆ. ಈ ಮೂಲಕ ಪ್ರಯಾಣಿಕರು, ತಮ್ಮವರನ್ನು ಬಿಡಲು ಬರುವವರು, ಹಾಗೂ ತಮ್ಮವರನ್ನು ಅದ್ಧೂರಿ ಸ್ವಾಗತ ಮಾಡಿ ಕರೆದುಕೊಂಡು ಹೋಗಲು ಬರುವವರು ತಮ್ಮ ವಾಹನಗಳನ್ನು ಗೊತ್ತುಪಡಿಸಿದ ಪಾರ್ಕಿಂಗ್ ಸ್ಥಳದಲ್ಲಿ ನಿಲ್ಲಿಸಬಹುದು. ಇದಕ್ಕೆ ಕಡಿಮೆ ಸಮಯ ತಗುಲುತ್ತದೆ. ಇದರಿಂದ ಕಾರ್ ಪಾರ್ಕ್ ಮಾಡುವವರಿಗೆ ಸಮಯ ಉಳಿಯುತ್ತದೆ. ಫಾಸ್ಟ್ ಟ್ಯಾಗ್ ಎಲೆಕ್ಟ್ರಾನಿಕ್ ಟೋಲ್ ಸಂಗ್ರಹ ವ್ಯವಸ್ಥೆಯಾಗಿದೆ.
ತ್ವರಿತ ಚಲನೆಗೆ ಅನುಕೂಲವಾಗುವಂತೆ, ಫಾಸ್ಟ್ ಟ್ಯಾಗ್ ಆಯ್ಕೆಯನ್ನು ಬಳಸುವ ಪ್ರಯಾಣಿಕರಿಗಾಗಿ ವಿಮಾನ ನಿಲ್ದಾಣವು ಪ್ರವೇಶ (ಎರಡನೇ ಲೇನ್) ಮತ್ತು ನಿರ್ಗಮನ (ಮೂರನೇ ಲೇನ್) ನಲ್ಲಿ ಪ್ರತಿ ಲೇನ್ ಅನ್ನು ನಿಗದಿಪಡಿಸಿದೆ ಎಂದು MIA ವಕ್ತಾರರು ತಿಳಿಸಿದ್ದಾರೆ. ಇದರೊಂದಿಗೆ, ವಾಹನಗಳ ಚಲನೆಯು ವೇಗವಾಗಿರುತ್ತದೆ ಮತ್ತು ವಿಮಾನ ನಿಲ್ದಾಣವನ್ನು ಪ್ರವೇಶಿಸಲು / ನಿರ್ಗಮಿಸಲು ಕಾಯುತ್ತಿರುವ ಪ್ರಯಾಣಿಕರಿಗೆ ಸಮಯ ಉಳಿಯುತ್ತೆ. ಹೀಗಾಗಿ ಇದು ಸಮಯ ಮತ್ತು ಇಂಧನವನ್ನು ಉಳಿಸಲು ಸಹಾಯ ಮಾಡುತ್ತದೆ.
ಫಾಸ್ಟ್ ಟ್ಯಾಗ್ನ ಮುಖ್ಯ ಪ್ರಯೋಜನವೆಂದರೆ ಅದು ನಗದು ವಹಿವಾಟಿನ ಅಗತ್ಯವನ್ನು ನಿವಾರಿಸುತ್ತದೆ. ಇದು ಎಲ್ಲರಿಗೂ ತ್ವರಿತ ಪಾರ್ಕಿಂಗ್ ಆಯ್ಕೆಗಳನ್ನು ನೀಡುತ್ತದೆ. ಪಾರ್ಕಿಂಗ್ ರಶೀದಿಗಾಗಿ ಕಾಯುವುದು ಅಥವಾ ಪ್ರವೇಶ ಅಥವಾ ನಿರ್ಗಮನದಲ್ಲಿ ನಗದು/ಕ್ರೆಡಿಟ್ ಪಾವತಿಗಳನ್ನು ಮಾಡುವಂತಹ ಸಮಸ್ಯೆಗಳು ಇರುವುದಿಲ್ಲ. ಫಾಸ್ಟ್ ಟ್ಯಾಗ್ಗೆ ರಿಚಾರ್ಜ್ ಮಾಡಿಸಿದ್ದರೆ ಸಾಕು ಹಣ ಅದಾಗಿಯೇ ಕಟ್ ಆಗುತ್ತೆ. ಮೊಬೈಲ್ಗೆ ಮೆಸೇಜ್ ಬರುತ್ತೆ. ಸಾಮಾನ್ಯ ಹೆದ್ದಾರಿಗಳಿಗೆ ಫಾಸ್ಟ್ ಟ್ಯಾಗ್ ಮೂಲಕ ಹೇಗೆ ಟೋಲ್ ದರ ಕಟ್ಟಾಗುವುದೋ ಅದೇ ರೀತಿ ಇದು ಕೂಡ ಕೆಲಸ ಮಾಡುತ್ತೆ. ಫಾಸ್ಟ್‌ಟ್ಯಾಗ್ ಹೊಂದಿರುವ ಪ್ರಯಾಣಿಕರು ತಡೆರಹಿತ ಪ್ರವೇಶ, ನಿರ್ಗಮನ ಮಾಡಬಹುದು.
