ಧಾರವಾಡ: ರಷ್ಯಾದ ಕೋವಿಡ್-19 ಲಸಿಕೆ ಸ್ಪುಟ್ನಿಕ್ ವಿ ತಯಾರಿಸಲು ಡಾ. ರೆಡ್ಡಿಸ್​ ಲ್ಯಾಬೊರೇಟರಿ ಜೊತೆ ಒಪ್ಪಂದ ಮಾಡಿಕೊಂಡಿದೆ ಎಂದು ಔಷಧ ಸಂಸ್ಥೆ ಶಿಲ್ಪಾ ಮೆಡಿಕೇರ್ ತಿಳಿಸಿದೆ.

ಕಂಪೆನಿಯು ತನ್ನ ಸಂಪೂರ್ಣ ಸ್ವಾಮ್ಯದ ಅಂಗಸಂಸ್ಥೆಯಾದ ಶಿಲ್ಪಾ ಬಯೋಲಾಜಿಕಲ್ಸ್ ಪ್ರೈವೇಟ್ ಲಿಮಿಟೆಡ್ (ಎಸ್‌ಬಿಪಿಎಲ್) ಮೂಲಕ ಡಾ. ರೆಡ್ಡಿಸ್​ ಪ್ರಯೋಗಾಲಯಗಳೊಂದಿಗೆ ಈ ಲಸಿಕೆ ಉತ್ಪಾದನೆ ನಡೆಯಲಿದೆ. ಆರ್​ & ಡಿ ಜತೆಗೆ ಕರ್ನಾಟಕದ ಧಾರವಾಡ ಪ್ಲಾಂಟ್​​ನಲ್ಲಿ ತಯಾರಿಕೆ ಇದೆ ಎಂದು ಶಿಲ್ಪಾ ಮೆಡಿಕೇರ್ ನಿಯಂತ್ರಕ ಫೈಲಿಂಗ್​ನಲ್ಲಿ ತಿಳಿಸಿದೆ. ಮೊದಲ 12 ತಿಂಗಳು ಡ್ಯುಯಲ್ ವೆಕ್ಟರ್ ಸ್ಪುಟ್ನಿಕ್ ವಿ, ಉದ್ದೇಶಿತ ಉತ್ಪಾದನೆಯು ವಾಣಿಜ್ಯ ಉತ್ಪಾದನೆಯ ಪ್ರಾರಂಭದ ದಿನಾಂಕದಿಂದ 50 ಮಿಲಿಯನ್ ಡೋಸ್ ಇರಲಿದೆ ಎಂದು ಕಂಪನಿ ಹೇಳಿದೆ.

ಡಾ.ರೆಡ್ಡಿಸ್​​ ಸ್ಪುಟ್ನಿಕ್ ತಂತ್ರಜ್ಞಾನವನ್ನು ಎಸ್‌ಬಿಪಿಎಲ್‌ಗೆ ವರ್ಗಾಯಿಸಲು ಅನುಕೂಲವಾಗಲಿದೆ. ಒಪ್ಪಂದದ ಪ್ರಕಾರ, ಎಸ್‌ಬಿಪಿಎಲ್ ಲಸಿಕೆ ತಯಾರಿಕೆಯ ಜವಾಬ್ದಾರಿಯನ್ನು ಹೊಂದಿದ್ದರೆ, ಡಾ.ರೆಡ್ಡಿಸ್​ ಅದರ ಮಾರುಕಟ್ಟೆ ಪ್ರದೇಶಗಳಲ್ಲಿ ಲಸಿಕೆ ವಿತರಣೆ ಮತ್ತು ಮಾರಾಟದ ಜವಾಬ್ದಾರಿ ವಹಿಸಿಕೊಂಡಿದೆ. ಮುಂದಿನ ದಿನಗಳಲ್ಲಿ ಲಸಿಕೆಯ ಸಿಂಗಲ್​ ಡೋಸ್ ಆವೃತ್ತಿಯಾದ ಸ್ಪುಟ್ನಿಕ್ ಲೈಟ್ ತಯಾರಿಸುವ ಆಯ್ಕೆಯನ್ನು ಸಹ ಕಂಪನಿಗಳು ಪತ್ತೆ ಹಚ್ಚುತ್ತಿದೆ ಎಂದು ಶಿಲ್ಪಾ ಮೆಡಿಕೇರ್ ಹೇಳಿದೆ.