ಕೆಲವು ತಿಂಗಳ ಹಿಂದೆ ಅವರ ಮಾಜಿ ಸಹಪಾಠಿ ಸತೀಶನ್, ಒಬ್ಬರೂ ಜತೆಗೂಡಿ ಹೊಸ ಜೀವನ ಆರಂಭಿಸಬಹುದು ಎಂಬ ಆಲೋಚನೆ ಮುಂದಿಟ್ಟಿದ್ದರು. ಇದಕ್ಕೆ ಅವರ ಸ್ನೇಹಿತರಿಂದ ಬೆಂಬಲ ವ್ಯಕ್ತವಾಗಿತ್ತು. ಆದರೆ, ಮದುವೆ ಬಗ್ಗೆ ಯೋಚನೆಯೇ ಇಲ್ಲ ಎಂದು ಅವರಿಬ್ಬರೂ ಅದನ್ನು ನಿರಾಕರಿಸಿದ್ದರು. ಅಷ್ಟಾದರೂ ಸ್ನೇಹಿತರು ಪಟ್ಟುಬಿಡಲಿಲ್ಲ. ತಾವೆಲ್ಲ ಮದುವೆಯಾಗಿ ಸಂಸಾರ ಜಂಜಾಟದಲ್ಲಿ ಹೆಣಗಾಡುತ್ತಿರುವಾಗ, ವಯಸ್ಸು ಮೀರುತ್ತಿದ್ದರೂ ಮದುವೆಯಾಗದೆ ಇವರಿಬ್ಬರು ಆರಾಮಾಗಿ ಇದ್ದಾರಲ್ಲ ಎಂಬ ಹೊಟ್ಟೆಕಿಚ್ಚು ಕೂಡ ಇದಕ್ಕೆ ಕಾರಣ ಇರಬಹುದು!

ಅದೇನೇ ಇದ್ದರೂ ಮಾಜಿ ಗೆಳೆಯರ ಒತ್ತಾಸೆ ಮೇರೆಗೆ ಅವರಿಬ್ಬರೂ ಕುನ್ನಬರುಕಾವು ದೇವಿ ದೇವಸ್ಥಾನದಲ್ಲಿ ಕುಟುಂಬದವರು ಮತ್ತು ಸ್ನೇಹಿತರ ಸಮ್ಮುಖದಲ್ಲಿ ಹಸೆಮಣೆ ಏರಿದ್ದಾರೆ. ಸುಮಾರು 250 ಮಂದಿ ಉಪಸ್ಥಿತರಿದ್ದರು. ಇದು ಅವರ ಸ್ನೇಹಿತರ ಬಳಗಕ್ಕೆ ಕನಸೊಂದು ನನಸಾದ ಸಂಭ್ರಮದ ಕ್ಷಣವಾಗಿತ್ತು.

“ಇದನ್ನು ನಿರೀಕ್ಷಿಸಿರಲಿಲ್ಲ. ನಾವು ಜತೆಯಾಗಿ ಓದಿದ್ದರಿಂದ ಒಬ್ಬರನ್ನೊಬ್ಬರು ಅರ್ಥ ಮಾಡಿಕೊಂಡಿದ್ದೇವೆ. ಹೀಗಾಗಿ ಮದುವೆಯಾಗಲು ಒಪ್ಪಿಕೊಂಡಿದ್ದೆವು. ರಾಜಕೀಯ ಮತ್ತು ವೈಯಕ್ತಿಕ ಜೀವನ ಎರಡೂ ವಿಭಿನ್ನ. ಅವರೆಡನ್ನೂ ನಾನು ಬೆರೆಸುವುದಿಲ್ಲ” ಎಂದು ಸುಮತಿ ಹೇಳಿದ್ದಾರೆ.

“ನಾನು ಎಂದಿಗೂ ಮದುವೆ ಬಗ್ಗೆ ಆಲೋಚಿಸಿಯೇ ಇರಲಿಲ್ಲ. ಆದರೆ ಒಂಟಿಯಾಗಿ ಜೀವನ ನಡೆಸುತ್ತಿರುವುದರ ಬಗ್ಗೆ ನನಗೆ ಬೇಸರವಿತ್ತು. ಈಗ ಸ್ನೇಹಿತರು ಮತ್ತು ಕುಟುಂಬದವರ ಸಹಾಯದಿಂದ ಸಂಗಾತಿ ದೊರೆತಿದ್ದಾಳೆ” ಎಂದು ಹರಿದಾಸನ್ ಸಂತಸ ವ್ಯಕ್ತಪಡಿಸಿದ್ದಾರೆ. ಹರಿದಾಸನ್ ಬಲಪಂಥೀಯ ನಿಲುವು ಹೊಂದಿದ್ದರೆ, ಸುಮತಿ ಎಡಪಂಥೀಯ ಸಿದ್ಧಾಂತದಲ್ಲಿ ನಂಬಿಕೆ ಇರಿಸಿದವರಾಗಿದ್ದಾರೆ.