₹10 ಲಕ್ಷ ಸುಲಿಗೆ ಮಾಡಲು ಸುಳ್ಳು ಅತ್ಯಾಚಾರ ಆರೋಪ: ಮಹಿಳೆ ವಿರುದ್ಧ ಪ್ರಕರಣ
ಗುರುಗ್ರಾಮ: ಅತ್ಯಾಚಾರ ಮಾಡಿದ್ದಾನೆ ಎಂದು ದೂರು ನೀಡಿ ವ್ಯಕ್ತಿಯೊಬ್ಬರಿಂದ 10 ಲಕ್ಷ ರೂ ವಸೂಲಿ ಮಾಡಲು ಪ್ರಯತ್ನಿಸಿದ ಆರೋಪದಡಿ ಹರ್ಯಾಣದ ಗುರುಗ್ರಾಮದಲ್ಲಿ ಮಹಿಳೆಯೊಬ್ಬರನ್ನು ಬಂಧಿಸಲಾಗಿದೆ. ಗುರುಗ್ರಾಮದ ಸೆಕ್ಟರ್ 20ರ ಪೊಲೀಸ್ ಠಾಣೆಯಲ್ಲಿ ಮಹಿಳೆ ದೂರು ನೀಡಿದ್ದಳು. ವ್ಯಕ್ತಿಯೊಬ್ಬ ತನ್ನ ಮೇಲೆ ಅತ್ಯಾಚಾರ ಎಸಗಿದ್ದಾನೆ ಎಂದು ಸುಳ್ಳು ಆರೋಪ ಮಾಡಿದ್ದಳು ಎಂದು ಪೊಲೀಸರು ತಿಳಿಸಿದ್ದಾರೆ.
ಮಹಿಳೆ ಮತ್ತು ಪುರುಷ ಇಬ್ಬರೂ ತಮ್ಮ ಸಾಮಾನ್ಯ ಸ್ನೇಹಿತನ ಮೂಲಕ ಪರಿಚಿತರಾಗಿದ್ದರು. ಏಪ್ರಿಲ್ 13ರಂದು ಸೌತ್ ಸಿಟಿಯಲ್ಲಿನ ಹೋಟೆಲ್ ಕೊಠಡಿಯಲ್ಲಿ ಇಬ್ಬರೂ ಭೇಟಿ ಮಾಡಿದ್ದರು ಎಂದು ಘಟನೆ ಬಗ್ಗೆ ಪೊಲೀಸರು ಭಾನುವಾರ ವಿವರಣೆ ನೀಡಿದ್ದಾರೆ.
ತಮ್ಮ ಸ್ನೇಹಿತ ಹೋಟೆಲ್ ಕೊಠಡಿಯಿಂದ ತೆರಳಿದ ಕೆಲವು ಗಂಟೆಗಳ ನಂತರ ಕೂಡ ಅವರಿಬ್ಬರೂ ಅಲ್ಲಿಯೇ ಉಳಿದುಕೊಂಡಿದ್ದರು. ಮರುದಿನ ಪೊಲೀಸ್ ಠಾಣೆಯನ್ನು ಸಂಪರ್ಕಿಸಿದ್ದ ಮಹಿಳೆ, ಹೋಟೆಲ್ ಕೊಠಡಿಯಲ್ಲಿ ಆ ವ್ಯಕ್ತಿ ತನ್ನ ಮೇಲೆ ಅತ್ಯಾಚಾರ ಮಾಡಿದ್ದಾನೆ ಎಂದು ಆರೋಪಿಸಿದ್ದಳು.
ಇದಾಗಿ ಕೆಲವೇ ಸಮಯದ ನಂತರ ಆರೋಪಿ ಕೂಡ ಪೊಲೀಸ್ ಠಾಣೆಗೆ ಬಂದು, ತನ್ನ ವಿರುದ್ಧದ ದೂರು ವಾಪಸ್ ಪಡೆಯಬೇಕು ಎಂದರೆ 10 ಲಕ್ಷ ರೂ ನೀಡಬೇಕು ಎಂದು ಮಹಿಳೆ ಒತ್ತಾಯಿಸುತ್ತಿದ್ದಾಳೆ ಎಂಬುದಾಗಿ ಆರೋಪಿಸಿದ್ದ. ಎರಡೂ ಕಡೆಯವರ ದೂರುಗಳನ್ನು ದಾಖಲಿಸಿದ ನಂತರ ಪೊಲೀಸರು, ಯಾರು ನಿಜವಾದ ತಪ್ಪಿತಸ್ಥರು ಎಂದು ಕಂಡುಹಿಡಿಯಲು ಉಪಾಯ ಮಾಡಿದ್ದರು. ಶಂಕಿತನ ಕೈಗೆ ಮೊಬೈಲ್ ಫೋನ್ ಒಂದನ್ನು ನೀಡಿ, ಮಹಿಳೆ ಜತೆಗಿನ ಸಂಭಾಷಣೆಯನ್ನು ರೆಕಾರ್ಡ್ ಮಾಡಿಕೊಳ್ಳುವಂತೆ ಸೂಚಿಸಿದ್ದರು. ಕರೆ ದಾಖಲೆಯಲ್ಲಿ ಮಹಿಳೆಯು ಆರೋಪಿಯಿಂದ ಹಣಕ್ಕಾಗಿ ಬೇಡಿಕೆ ಇರಿಸುತ್ತಿರುವುದು ಪೊಲೀಸರಿಗೆ ಮನವರಿಕೆಯಾಗಿತ್ತು. ಇದರ ನಂತರ ಆರೋಪಿಯು ಮಹಿಳೆ ವಿರುದ್ಧ ಲಿಖಿತ ದೂರು ದಾಖಲಿಸಿದ್ದ.
ಭಾರತೀಯ ದಂಡ ಸಂಹಿತೆ (ಐಪಿಸಿ) ಸೆಕ್ಷನ್ 389ರ (ಅಪರಾಧದ ಆರೋಪದ ಮೂಲಕ ವ್ಯಕ್ತಿಯಲ್ಲಿ ಭಯ ಮೂಡಿಸಿ ಸುಲಿಗೆ ಮಾಡುವುದು) ಅಡಿ ಮಹಿಳೆ ವಿರುದ್ಧ ಪ್ರಕರಣ ದಾಖಲಿಸಲಾಗಿದೆ. ಈ ಬಗ್ಗೆ ತನಿಖೆ ನಡೆಸಲಾಗುತ್ತಿದೆ ಎಂದು ಪೊಲೀಸರು ಮಾಹಿತಿ ನೀಡಿದ್ದಾರೆ.
ಮಾವನ ವಿರುದ್ಧವೇ ಸುಳ್ಳು ಪ್ರಕರಣ
ಕೆಲವು ದಿನಗಳ ಹಿಂದಷ್ಟೇ ದಿಲ್ಲಿಯಲ್ಲಿ ಇಂತಹದೇ ಪ್ರಕರಣ ವರದಿಯಾಗಿತ್ತು. ತಂದೆಯ ಸಹಾಯದೊಂದಿಗೆ ಮಹಿಳೆಯೊಬ್ಬಳು ಮಾವನ ವಿರುದ್ಧ ಅತ್ಯಾಚಾರ ದೂರು ದಾಖಲಿಸಿದ್ದಳು. ಇದು ಸುಳ್ಳು ಆರೋಪ ಎನ್ನುವುದು ತನಿಖೆಯಿಂದ ದಾಖಲಾಗಿತ್ತು. ಈ ಬಗ್ಗೆ ತಂದೆ- ಮಗಳ ವಿರುದ್ಧ ತೀವ್ರ ಕಿಡಿಕಾರಿದ್ದ ದಿಲ್ಲಿಯ ಕೋರ್ಟ್, ಅವರಿಬ್ಬರ ವಿರುದ್ಧ ಎಫ್‌ಐಆರ್ ದಾಖಲಿಸುವಂತೆ ಪೊಲೀಸರಿಗೆ ಸೂಚನೆ ನೀಡಿತ್ತು.
ಮಹಿಳೆಯ ಗಂಡ, ಮಾವ ಹಾಗೂ ನಾದಿನಿ ವಿರುದ್ಧ ದಾಖಲಿಸಲಾಗಿದ್ದ ವರದಕ್ಷಿಣೆ ಕಿರುಕುಳದ ಸುಳ್ಳು ಆರೋಪಗಳಿಂದ ಖುಲಾಸೆಗೊಳಿಸಿ ಹೆಚ್ಚುವರಿ ಸೆಷನ್ಸ್ ಕೋರ್ಟ ನ್ಯಾಯಾಧೀಶರು ತೀರ್ಪು ನೀಡಿದ್ದರು.
“ಅತ್ಯಾಚಾರ ಬಹಳ ಹೇಯ ಅಪರಾಧ. ಆದರೆ ಅತ್ಯಾಚಾರದ ಸುಳ್ಳು ಆರೋಪಗಳನ್ನು ಕೂಡ ಕಠಿಣವಾಗಿ ಪರಿಗಣಿಸಬೇಕಾಗುತ್ತದೆ. ಇದು ಆರೋಪಿಗಳಿಗೆ ತೀವ್ರ ಅವಮಾನ ಉಂಟುಮಾಡುತ್ತದೆ” ಎಂದು 73 ಪುಟಗಳ ತೀರ್ಪಿನಲ್ಲಿ ನ್ಯಾಯಾಧೀಶರು ಹೇಳಿದ್ದರು.
