ಭಿನ್ನ ನಾಯಕರ ವಾದ ತುಂಬಾನೇ ಸರಳ. ಪಕ್ಷದಲ್ಲಿ ಆಂತರಿಕ ಪ್ರಜಾಪ್ರಭುತ್ವ ಬರಬೇಕು ಅನ್ನೋದು ಅವರ ಆಗ್ರಹ. ನಾಯಕತ್ವ ಈ ಕೂಡಲೇ ಬದಲಾಗಬೇಕು, ಸೋನಿಯಾ ಗಾಂಧಿ ಕುಟುಂಬಸ್ಥರು ನಾಯಕತ್ವದಿಂದ ದೂರ ಸರಿಯಬೇಕು ಎಂದೇನೂ ಜಿ – 23 ನಾಯಕರು ನೇರವಾಗಿ ಹೇಳುತ್ತಿಲ್ಲ. ಆದರೆ, ಪಕ್ಷದ ನಾಯಕರು ಆಂತರಿಕ ಪ್ರಜಾಪ್ರಭುತ್ವದ ಮೇಲೆ ನಂಬಿಕೆ ಇಟ್ಟು ಸಭೆಯಲ್ಲಿ ಎಲ್ಲರೂ ಹೇಳುವ ಮಾತುಗಳಿಗೆ ಕಿವಿಗೊಡಬೇಕು, ಹೊಸ ತಂತ್ರಗಳನ್ನು ಒಗ್ಗಟ್ಟಿನಿಂದ ರೂಪಿಸಿ ಕಾರ್ಯರೂಪಕ್ಕೆ ತರಬೇಕು ಅನ್ನೋದು ಇವರ ಆಗ್ರಹ.

ಈ ಸಂದರ್ಭದಲ್ಲಿ ಕಾಂಗ್ರೆಸ್ ಎರಡು ಪಕ್ಷವಾಗಿ ಒಡೆದು ಹೋಗುತ್ತಾ ಎಂಬ ಸಂಶಯ ರಾಜಕೀಯ ವಿಶ್ಲೇಷಕರನ್ನು ಕಾಡುತ್ತಿದೆ. ಒಂದು ವಾದದ ಪ್ರಕಾರ ಕಾಂಗ್ರೆಸ್ ಭಾಗವಾಗಬಹುದು, ಆದರೆ ಇನ್ನೊಂದು ವಾದದ ಪ್ರಕಾರ ಅದು ಇಬ್ಭಾಗವಾಗುವದಿಲ್ಲ . ಆದರೆ ಸದ್ಯದ ಬೆಳವಣಿಗೆಗಳು ಯಾವುದು ಕಾಂಗ್ರೆಸ್ಸಿಗೆ ಅನುಕೂಲಕರವಾಗಿಲ್ಲ ಎಂದು ಅಭಿಪ್ರಾಯ ವ್ಯಕ್ತಪಡಿಸುತ್ತಾರೆ ರಾಜಕೀಯ ವಿಶ್ಲೇಷಕರು.