ಪಂಜಾಬ್​ನಲ್ಲಿ ಈ ಬಾರಿ ಆಮ್​ ಆದ್ಮಿ ಪಕ್ಷ ಸರ್ಕಾರ ರಚಿಸಿದ್ದು, ಮುಖ್ಯಮಂತ್ರಿ ಹುದ್ದೆಗೆ ಏರಿರುವ ಭಗವಂತ್ ಮಾನ್ ಭರ್ಜರಿ ಉತ್ಸಾಹದಲ್ಲಿ ಆಡಳಿತ ಶುರು ಮಾಡಿದ್ದಾರೆ. ಪಂಜಾಬ್​ನ್ನು ಅಭಿವೃದ್ಧಿಗೊಳಿಸುವುದೇ ಪರಮ ಗುರಿ ಎಂದು ಈಗಾಗಲೇ ಹೇಳಿಕೊಂಡಿರುವ ಅವರು ಇತ್ತೀಚೆಗೆ ಮಾಡಿದ ಭಾಷಣವೊಂದರಲ್ಲಿ ಪ್ರತಿಭಾ ಪಲಾಯನ ( Brain Drain)ದ ಬಗ್ಗೆ ಮಾತನಾಡಿದ್ದರು. ‘ಪಂಜಾಬ್​​ನಿಂದ ಪ್ರತಿಭಾ ಪಲಾಯನ ಹೆಚ್ಚುತ್ತಿದೆ. ಈ ಪ್ರತಿಭಾ ಪಲಾಯನ ತಡೆಯಲು ಎಲ್ಲ ರೀತಿಯ ವ್ಯವಸ್ಥೆ ಮಾಡಲಾಗುವುದು. ನೋಡುತ್ತಿರಿ ಮುಂದೊಂದು ದಿನ ವಿದೇಶಿಯರೂ ಕೆಲಸ ಹುಡುಕಿಕೊಂಡು ಪಂಜಾಬ್​ಗೆ ಬರುವಂತೆ ಮಾಡುತ್ತೇನೆ’ ಎಂದು ಭಗವಂತ್​ ಮಾನ್​ ಹೇಳಿದ್ದರು. Brain Drain ಅಥವಾ ಪ್ರತಿಭಾ ಪಲಾಯನ ಎಂದರೆ, ಇಲ್ಲಿ ಅತ್ಯುತ್ತಮ, ಉನ್ನತ ಶಿಕ್ಷಣ ಪಡೆದು, ಅದಕ್ಕೆ ತಕ್ಕುದಾದ ಕೆಲಸ ಸಿಗದೆ, ಅಥವಾ ಕೆಲಸ ಸಿಕ್ಕರೂ ಅದಕ್ಕೆ ಸರಿಯಾದ ವೇತನ, ಸೌಕರ್ಯ ದೊರೆಯದೆ ವಿದೇಶಗಳಿಗೆ ವಲಸೆ ಹೋಗಿ ಅಲ್ಲಿ ದುಡಿಯುವುದು ಇದು ನಮ್ಮ ದೇಶದ ದೊಡ್ಡ ಸಮಸ್ಯೆ ಎಂದವರು ಹೇಳಿದ್ದಾರೆ.