ಇದರೊಂದಿಗೆ, ಈ ಬಾರಿ ಗಾಂಧಿ ಪರಿವಾರದ ಯಾವುದೇ ನಾಯಕರೂ ಕಣಕ್ಕೆ ಇಳಿವ ಸಾಧ್ಯತೆ ಇಲ್ಲ ಎಂಬ ಊಹೆಗಳೂ ನಿಜವಾಗಿದ್ದು, ಸುಮಾರು 2 ದಶಕಗಳ ಬಳಿಕ ಎಐಸಿಸಿಯ ಚುಕ್ಕಾಣಿ ಹೊರಗಿನವರ ಪಾಲಾಗುವುದು ಖಚಿತವಾಗಿದೆ. ಆದರೆ ಗಾಂಧಿ ಕುಟುಂಬ ಕಣಕ್ಕೆ ಇಳಿಯದೇ ಇದ್ದರೂ, ಅವರಿಂದಲೇ ಸೂಚಿಸಲ್ಪಟ್ಟಿರುವ ಮಲ್ಲಿಕಾರ್ಜುನ ಖರ್ಗೆ ಕಡೆಯ ಹಂತದಲ್ಲಿ ಕಣಕ್ಕೆ ಧುಮುಕಿರುವ ಕಾರಣ, ಕಲಬುರಗಿ ಮೂಲದ ಹಿರಿಯ ನಾಯಕನ ಆಯ್ಕೆ ಬಹುತೇಕ ಖಚಿತ ಎನ್ನಲಾಗಿದೆ. ಹೀಗಾಗಿ ಕಡೆಯ ಹಂತದಲ್ಲಿ ಪಕ್ಷದಲ್ಲಿನ ಒಗ್ಗಟ್ಟನ್ನು ಸೂಚಿಸುವ ಸಲುವಾಗಿ ಶಶಿ ತರೂರ್‌ ಮತ್ತು ತ್ರಿಪಾಠಿ ನಾಮಪತ್ರ ಹಿಂದಕ್ಕೆ ಪಡೆದರೂ ಅಚ್ಚರಿ ಇಲ್ಲ ಎನ್ನಲಾಗಿದೆ. ಇದಕ್ಕೆ ಪೂರಕ ಎಂಬಂತೆ ಖರ್ಗೆ ಭೀಷ್ಮ ಪಿತಾಮಹ ಇದ್ದಂತೆ ಎಂದು ಶುಕ್ರವಾರ ತರೂರ್‌ ಬಣ್ಣಿಸಿದ್ದಾರೆ.