ಮತದಾರ ಪಟ್ಟಿಗೆ ಜನನ/ ಮರಣ ಲಿಂಕ್‌: ಕೇಂದ್ರದ ಮಹತ್ವದ ಹೆಜ್ಜೆ
ಹೊಸದಿಲ್ಲಿ: ಜನರ ಜನನ ಮತ್ತು ಮರಣ ಮಾಹಿತಿಯನ್ನು ಮತದಾರರ ಪಟ್ಟಿಯೊಂದಿಗೆ ಲಿಂಕ್‌ ಮಾಡಲು ಸರಕಾರ ಯೋಜನೆ ರೂಪಿಸುತ್ತಿದೆ. ಈ ಸಂಬಂಧ ಮುಂದಿನ ಮುಂಗಾರು ಸಂಸತ್‌ ಅಧಿವೇಶನದಲ್ಲಿ ಹೊಸ ವಿಧೇಯಕ ಮಂಡಿಸುವುದಾಗಿ ಗೃಹ ಸಚಿವ ಅಮಿತ್‌ ಶಾ ಮಾಹಿತಿ ನೀಡಿದ್ದಾರೆ.
ಮತದಾರ ಪಟ್ಟಿಯೊಂದಿಗೆ ಜನನ/ ಮರಣ ಮಾಹಿತಿ ಜೋಡಣೆಯಿಂದ ವೋಟರ್‌ ಲಿಸ್ಟ್‌ ಪರಿಷ್ಕರಣೆ ಸ್ವಯಂಚಾಲಿತವಾಗಲಿದೆ. ಯಾವುದೇ ವ್ಯಕ್ತಿಗೆ 18 ವರ್ಷ ವಯಸ್ಸು ತುಂಬುತ್ತಲೇ ಮತದಾರರ ಗುರುತಿನ ಚೀಟಿ (ವೋಟರ್‌ ಐಡಿ) ಮಾಡಿಸಿಕೊಳ್ಳುವಂತೆ ಚುನಾವಣಾ ಆಯೋಗದ ಕಡೆಯಿಂದ ಸೂಚನೆ ಬರಲಿದೆ.
ಅದೇ ರೀತಿ ಯಾವುದೇ ವ್ಯಕ್ತಿ ಮೃತಪಟ್ಟಲ್ಲಿ, ಚುನಾವಣಾ ಆಯೋಗವು ತಾನೇ ಆ ವ್ಯಕ್ತಿಯ ಹೆಸರನ್ನು ಮತದಾರ ಪಟ್ಟಿಯಿಂದ ಡಿಲೀಟ್‌ ಮಾಡಲಿದೆ. ಆದರೆ, ಇದಕ್ಕೂ ಮುನ್ನ, ಆ ವ್ಯಕ್ತಿಯ ಕುಟುಂಬದ ಸದಸ್ಯರಿಗೆ 15 ದಿನದೊಳಗೆ ಮರಣದ ವಿಷಯವನ್ನು ದೃಢಪಡಿಸುವಂತೆ ಕೋರಲಾಗುವುದು.
ಸೆನ್ಸಸ್‌ ರಿಜಿಸ್ಟ್ರಾರ್‌ ಕಡೆಯಿಂದ ಪತ್ರ ಅಥವಾ ಸಂದೇಶದ ಮುಖಾಂತರ ಈ ದೃಢೀಕರಣ ಕೇಳಲಾಗುತ್ತದೆ. ಕುಟುಂಬ ಸದಸ್ಯರು ಯಾವುದೇ ಆಕ್ಷೇಪಣೆ ಸಲ್ಲಿಸದಿದ್ದರೆ, ಮತದಾರ ಪಟ್ಟಿಯಿಂದ ಆಯೋಗವು ಹೆಸರನ್ನು ರದ್ದುಪಡಿಸುತ್ತದೆ.
