ಹೌದು. ನವರಾತ್ರಿಯ ಸಂದರ್ಭದಲ್ಲಿ ತುಳುನಾಡಿನಲ್ಲಿ ಕಾಣಸಿಗುವ ಮಾನವ ವೇಷಧಾರಿ ಹುಲಿಗಳಿವು. ಈ ಹಿಂದೆ ಸ್ವರ್ಗಲೋಕದಲ್ಲಿ ರಾಕ್ಷಸ ಹಾವಳಿ ಜಾಸ್ತಿಯಾಗಿ ದೇವತೆಗಳೆಲ್ಲಾ ಭೂಲೋಕಕ್ಕೆ ಇಳಿದ್ದರು. ಆದರೆ ಇಲ್ಲೂ ದಾನವರ ಕಿರುಕುಳ ಹೆಚ್ಚಾಗಿದ್ದು ದೇವತೆಗಳೆಲ್ಲಾ ಆದಿಶಕ್ತಿಯ ಮೊರೆ ಹೋಗುತ್ತಾರೆ. ಈ ಸಂದರ್ಭದಲ್ಲಿ ದೇವತೆಗಳೆಲ್ಲಾ ಬೇರೆ ಬೇರೆ ಪ್ರಾಣಿ ಪಕ್ಷಿಗಳ ರೂಪ ತಾಳಿ ದಾನವರ ವಧೆಯಲ್ಲಿ ಭಾಗಿಯಾಗಿದ್ದರು. ಈ ವೇಳೆ ದೇವಿಗೆ ವಾಹನವಾಗಿ ಸಹಕರಿಸಿದ್ದು ಹುಲಿ. ಹೀಗಾಗಿ ನವರಾತ್ರಿಯ ದಿನಗಳಲ್ಲಿ ಇಂದಿಗೂ ತುಳುನಾಡಿನ ಜನ ಹುಲಿಯ ವೇಷಗಳನ್ನು ಹಾಕಿ ದೇವಿಯ ಕೃಪೆಗೆ ಪಾತ್ರರಾಗುತ್ತಾರೆ ಅನ್ನೋದು ನಂಬಿಕೆ.

ಇಷ್ಟು ಮಾತ್ರವಲ್ಲದೆ ಹಿಂದಿನ ಕಾಲದಲ್ಲಿ ತುಳುನಾಡಿನಲ್ಲಿ ರೋಗ-ರುಜಿನಗಳು ಬಂದಾಗ ನವರಾತ್ರಿಯ ಸಂದರ್ಭದಲ್ಲಿ ವೇಷ ಹಾಕಿಸುತ್ತೇವೆ ಎಂದು ಹಿರಿಯರು ಹರಕೆ ಹೇಳುತ್ತಿದ್ದರು. ಅದರಂತೆ ಇಂದಿಗೂ ವಿವಿಧ ವೇಷಗಳನ್ನು ಇಲ್ಲಿಯ ಜನ ನವರಾತ್ರಿಯ ಸಂದರ್ಭದಲ್ಲಿ ಹಾಕಿ ಸೇವೆ ಸಲ್ಲಿಸುತ್ತಾರೆ. ಅದರಲ್ಲೂ ಪ್ರಮುಖವಾಗಿ ಹುಲಿ ವೇಷದಾರಿಗಳೇ ಹೆಚ್ಚಾಗಿ ಕಾಣಸಿಗುತ್ತಾರೆ. ಜೊತೆಗೆ ಹಿಂದಿನ ಕಾಲದಲ್ಲಿ ಕಾಡಿನ ಹುಲಿಗಳು ನಾಡಿಗೆ ಬಂದು ದಾಳಿ ಮಾಡುತ್ತಿತ್ತು.