ಪೆಟ್ರೋಪೊಲಿಸ್‌: ಬ್ರೆಜಿಲ್‌ನ (Brazil) ಸುಂದರವಾದ ನಗರವಾದ ಪೆಟ್ರೋಪೊಲಿಸ್‌(Petropolis) ನಲ್ಲುಂಟಾದ  ದಿಢೀರ್ ಪ್ರವಾಹ ಮತ್ತು ಭೂಕುಸಿತಗಳಲ್ಲಿ ಕನಿಷ್ಠ 78 ಜನರು ಸಾವನ್ನಪ್ಪಿದ್ದಾರೆ. ಬೀದಿಗಳು ನೀರಿನಿಂದ ತುಂಬಿದ್ದು, ಮನೆಗಳು ಕೊಚ್ಚಿ ಹೋಗಿವೆ ಎಂದು ಅಧಿಕಾರಿಗಳು ವರದಿ ಮಾಡಿದ್ದಾರೆ.  ಮಂಗಳವಾರ ಭಾರೀ ಚಂಡಮಾರುತದಿಂದಾಗಿ ಮೂರು ಗಂಟೆಗಳ ಕಾಲ ರಿಯೊ ಡಿ ಜನೈರೊದ ಉತ್ತರದಲ್ಲಿರುವ ಬೆಟ್ಟಗಳ ಸುಂದರವಾದ ಪ್ರವಾಸಿ ಪಟ್ಟಣದಲ್ಲಿ ಮಳೆ ಸುರಿದ ನಂತರ ಕೆಸರು ಮತ್ತು ಅವಶೇಷಗಳಲ್ಲಿ ಹೂತುಹೋದವರನ್ನು ಬದುಕಿಸಲು ರಕ್ಷಣಾ ಕಾರ್ಯಕರ್ತರು ಪ್ರಯತ್ನಿಸುತ್ತಿರುವುದು ಕಂಡು ಬಂತು. ಅಗ್ನಿಶಾಮಕ ದಳದವರು ಮತ್ತು ಸ್ವಯಂಸೇವಕರು ಮಣ್ಣಿನ ಧಾರೆಯಲ್ಲಿ ಕೊಚ್ಚಿಹೋದ ಮನೆಗಳ ಅವಶೇಷಗಳಿಂದ  ಶವಗಳನ್ನು ಹೊರ ತೆಗೆಯುತ್ತಿದ್ದು, ಸಾವಿನ ಸಂಖ್ಯೆ ಏರಿಕೆಯಾಗುವ ಸಾಧ್ಯತೆ ಇದೆ. ಕಳೆದ ಮೂರು ತಿಂಗಳುಗಳಲ್ಲಿ ಬ್ರೆಜಿಲ್‌ಗೆ ಅಪ್ಪಳಿಸಿರುವ ಮಾರಣಾಂತಿಕ ಚಂಡಮಾರುತಗಳ ಸರಣಿಯಲ್ಲಿ ಇದು ಇತ್ತೀಚಿನದು, ಹವಾಮಾನ ಬದಲಾವಣೆಯಿಂದ ಇದು ಕೆಟ್ಟದಾಗಿದೆ ಎಂದು ತಜ್ಞರು ಹೇಳುತ್ತಾರೆ. ಕನಿಷ್ಠ 21 ಜನರನ್ನು ಜೀವಂತವಾಗಿ ರಕ್ಷಿಸಲಾಗಿದೆ ಎಂದು ರಾಜ್ಯ ಸರ್ಕಾರ ತಿಳಿಸಿದೆ. ನಾಯಿ, ಅಗೆಯುವ ಯಂತ್ರಗಳು ಮತ್ತು ಹೆಲಿಕಾಪ್ಟರ್‌ಗಳನ್ನು ಬಳಸಿ, ರಕ್ಷಣಾ ಕಾರ್ಯಕರ್ತರು ಬಿರುಸಿನ ಕಾರ್ಯಾಚರಣೆ ನಡೆಸುತ್ತಿದ್ದಾರೆ. ಸುಮಾರು 300 ಜನರನ್ನು ನಿರಾಶ್ರಿತರ ಶಿಬಿರದಲ್ಲಿ ಇರಿಸಲಾಗಿದೆ, ಹೆಚ್ಚಾಗಿ ಶಾಲೆಗಳಲ್ಲಿರಿಸಲಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.