ಅತ್ತ ಚಿಕ್ಕಮಗಳೂರು ಗಡಿಯನ್ನು ಹೊಂದಿರುವ, ಇತ್ತ ಕರಾವಳಿ ಭಾಗದ ಸಂಪರ್ಕ ಇರುವ ಬೆಳ್ತಂಗಡಿ ವಿಧಾನಸಭಾ ಕ್ಷೇತ್ರ ಒಂದು ವಿಭಿನ್ನ ಗ್ರಾಮೀಣ ಪ್ರದೇಶದ ಕ್ಷೇತ್ರ. ಬೆಳ್ತಂಗಡಿಯ ಜನಾಭಿಪ್ರಾಯ ಒಂದು ಹಂತದಲ್ಲಿ ಪ್ರಸ್ತುತ ಸಂದರ್ಭದಲ್ಲಿ ಬಹಳಷ್ಟು ಕುತೂಹಲಕಾರಿಯಾಗಿದೆ. ಪ್ರಥಮಬಾರಿ ಶಾಸಕರಾದ ಹರೀಶ್ ಪೂಂಜಾ ಕಳೆದ ನಾಲ್ಕು ವರ್ಷಗಳಲ್ಲಿ ತನ್ನ ಜನಪ್ರಿಯತೆ ಕಳೆದುಕೊಂಡಿಲ್ಲ.

ಮಾಜಿ ಶಾಸಕ ವಸಂತ ಬಂಗೇರ ನೇತೃತ್ವದಲ್ಲಿ ಕಾಂಗ್ರೆಸ್ ಹರೀಶ್ ಪೂಂಜಾ ವಿರುದ್ಧ ಬಹಳಷ್ಟು ಆರೋಪಗಳನ್ನು ಮಾಡುತ್ತ ಬಂದಿದ್ದರು, ಜನರ ಮನಸ್ಸಿನಲ್ಲಿ ಹರೀಶ್ ಪೂಂಜಾ ಬಗೆಗಿನ ಒಲವು ಕಡಿಮೆಯಾಗಿಲ್ಲ ಎಂದು ಆಂತರಿಕ ವರದಿಗಳು ಹೇಳುತ್ತವೆ.

ಜನಸಾಮಾನ್ಯರಿಗೆ ಸುಲಭವಾಗಿ ಸಿಗುವ ಹರೀಶ್ ಪೂಂಜಾ ಹಲವಾರು ಅಭಿವೃದ್ಧಿ ಕಾರ್ಯಗಳನ್ನು ನಡೆಸಿದ್ದಾರೆ ಎಂದು ಜನರು ಅಭಿಪ್ರಾಯಪಡುತ್ತಾರೆ. ಬಿಜೆಪಿಯಲ್ಲಿ ಹರೀಶ್ ಪೂಂಜಾ ರವರಿಗೆ ಸರಿಸಮಾನವಾದ ಅಭ್ಯರ್ಥಿಗಳು ಇಲ್ಲದೆ ಇರುವುದರಿಂದ ಮುಂದಿನ ಬಾರಿಯೂ ಹರೀಶ್ ಪೂಂಜಾ ಬೆಳ್ತಂಗಡಿ ಬಿಜೆಪಿ ಅಭ್ಯರ್ಥಿಯಾಗುವುದು ಖಚಿತವಾಗಿದೆ.

ಇನ್ನು ಕಾಂಗ್ರೆಸ್ಸಿನಲ್ಲಿ ಹಲವಾರು ಅಭ್ಯರ್ಥಿಗಳ ಹೆಸರು ಕೇಳಿಬರುತ್ತಿದ್ದರೂ, ಹರೀಶ್ ಪೂಂಜಾ ಮುಂದೆ ಮಾಜಿ ಶಾಸಕ ವಸಂತ ಬಂಗೇರ ಮಾತ್ರ ಸ್ಪರ್ಧೆ ನೀಡಬಲ್ಲ ಏಕೈಕ ಅಭ್ಯರ್ಥಿ ಎಂದು ಜನರು ಅಭಿಪ್ರಾಯಪಡುತ್ತಾರೆ.
ಜಿಲ್ಲಾ ಕಾಂಗ್ರೆಸ್ ಅಧ್ಯಕ್ಷ ಹರೀಶ್ ಕುಮಾರ್, ಯುವನಾಯಕ ರಂಜನ ಗೌಡ, ರಕ್ಷಿತ್ ಶಿವರಾಂ ಹೆಸರುಗಳು ಚಾಲ್ತಿಯಲ್ಲಿದ್ದರೂ ಅವರು ಬಂಗೇರ ನೀಡುವ ಸ್ಪರ್ಧೆಯನ್ನು ನೀಡಲು ಸಾಧ್ಯವಿಲ್ಲ ಎನ್ನುತ್ತಾರೆ ಸಾರ್ವಜನಿಕರು.

ವಸಂತ ಬಂಗೇರರಿಗೆ ತನ್ನದೇ ಆದ ವರ್ಚಸ್ಸು ಇದೆ. ಜನಪ್ರಿಯ ನಾಯಕರಾಗಿ ವಸಂತ ಬಂಗೇರ ರಿಗೆ , ತನ್ನ ವರ್ಚಸ್ಸಿನ ಜೊತೆಗೆ ಪಕ್ಷದ ಮತಗಳು ಸೇರಿದರೆ ಪ್ರಬಲ ಸ್ಪರ್ಧೆ ನೀಡಬಹುದು ಎನ್ನುತ್ತಾರೆ ಸಾರ್ವಜನಿಕರು. ಯುವ ನಾಯಕರುಗಳು ಕ್ಷೇತ್ರದಲ್ಲಿ ಓಡಾಡುತ್ತಿದ್ದರು, ಯಾವುದೇ ವರ್ಚಸ್ಸನ್ನು ಗಳಿಸಿಕೊಡುವಲ್ಲಿ ವಿಫಲರಾಗಿದ್ದಾರೆ ಎನ್ನುತ್ತಾರೆ ಸಾರ್ವಜನಿಕರು. ರಂಜನ್ ಗೌಡ ಅಧ್ಯಕ್ಷರಾಗಿ ಪಕ್ಷದ ಕೆಲಸ ಮಾಡುತ್ತಿದ್ದಾರೆ, ಹೊರತು ಅದಕ್ಕಿಂತ ಹೆಚ್ಚು ರಾಜಕೀಯದಲ್ಲಿ ಆಸಕ್ತಿ ವಹಿಸುತ್ತಿಲ್ಲ ಎಂಬುದು ಸಾರ್ವಜನಿಕರ ಅಭಿಪ್ರಾಯ. ಈ ಎಲ್ಲ ಕಾರಣಗಳಿಂದ ಇಂದಿಗೂ ಮಾಜಿ ಶಾಸಕ ವಸಂತ ಬಂಗೇರ ಅವರೇ ಪ್ರಬಲ ಅಭ್ಯರ್ಥಿಯಾಗಿ ಗೋಚರಿಸುತ್ತಿದ್ದಾರೆ. ಇನ್ನೂ ರಕ್ಷಿತ್ ಶಿವರಾಂ ಹಾಗೂ ತಂಡ ರಾಜಕೀಯದ ಅನುಭವದ ಕೊರತೆಯಿಂದ ಬಳಲುತ್ತಿದೆ ಎಂದು ರಾಜಕೀಯ ವಿಶ್ಲೇಷಕರು ಅಭಿಪ್ರಾಯಪಡುತ್ತಾರೆ.
ಜಿಲ್ಲಾಧ್ಯಕ್ಷ ಹರೀಶ್ ಕುಮಾರ್ ಅವರು ಎಂದಿನಂತೆ ನಿರ್ಲಿಪ್ತತೆಯಿಂದ ರಾಜಕಾರಣ ಮಾಡುವ ಕಾರಣ ಹರೀಶ್ ಪೂಂಜಾ ಮುಂದೆ ಪ್ರಬಲ ಅಭ್ಯರ್ಥಿ ಯಾಗಿ ಗೋಚರವಾಗುತ್ತಿಲ್ಲ ಎಂದು ರಾಜಕೀಯ ವಿಶ್ಲೇಷಕರು ಅಭಿಪ್ರಾಯಪಡುತ್ತಾರೆ.

ಈ ನಡುವೆ ಬಿಜೆಪಿಯ ಒಳಗಡೆ ಕೆಲವೊಂದು ಗೊಂದಲಗಳು ಇದ್ದು, ಅದರ ಲಾಭವನ್ನು ಎತ್ತಿಕೊಳ್ಳಲು ಕಾಂಗ್ರೆಸ್ ವಿಫಲವಾಗಿದೆ ಎನ್ನುತ್ತಾರೆ ಸಾರ್ವಜನಿಕರು ಹಾಗೂ ರಾಜಕೀಯ ವಿಶ್ಲೇಷಕರು. ವಸಂತ ಬಂಗೇರ ಬಿಜೆಪಿ ವಿರುದ್ಧ ಹೋರಾಟ ನಡೆಸುತ್ತಿದ್ದಾರೆ. ಆದರೆ ಯಾವುದೇ ಹೋರಾಟಗಳು ತಾರ್ಕಿಕ ಅಂತ್ಯವನ್ನು ಕಂಡಿಲ್ಲ ಎನ್ನುತ್ತಾರೆ ರಾಜಕೀಯ ವಿಶ್ಲೇಷಕರು.