ಬೆಂಗಳೂರು(ಮೇ.12):  ರಾಜ್ಯದ(Karnataka) ವಿವಿಧ ಭಾಗಗಳಲ್ಲಿ ಕಳೆದ ಎರಡು ವಾರಗಳಿಂದ ಸತತವಾಗಿ ಸುರಿಯುತ್ತಿರುವ ಆಲಿಕಲ್ಲು ಸಹಿತ ಮಳೆಯಿಂದ(Rain) ಟೊಮೆಟೋ ಬೆಳೆ ಹಾಳಾಗಿರುವ ಪರಿಣಾಮ ಪ್ರತಿ ಕೆ.ಜಿ. ಟೊಮೆಟೋ ಬೆಲೆ 80-95ಕ್ಕೆ ಏ​ರಿಕೆಯಾಗಿದೆ.

ಮಳೆಯಿಂದಾಗಿ ಅನೇಕ ದಿನಗಳಿಂದ ಪ್ರತಿ ಕೆ.ಜಿಗೆ .60-70 ಇದ್ದ ಟೊಮೆಟೋ(Tomato) ಬೆಳೆ ಈಗ ಇನ್ನಷ್ಟು ಏರಿಕೆಯಾಗಿದೆ. ಇದೇ ರೀತಿ ಮಳೆ ಮುಂದುವರಿದಲ್ಲಿ ಮುಂದಿನ ಕೆಲವು ದಿನಗಳಲ್ಲಿ ಬೆಲೆ 100 ದಾಟಬಹುದು ಎಂದು ಹೇಳಲಾಗಿದೆ.

ಕಳೆದ ವಾರ ಆನೇಕಲ್‌, ಹೊಸಕೋಟೆ ಮತ್ತಿತರ ಕೆಲವೆಡೆ ಆಲಿಕಲ್ಲು ಸಹಿತ ಬಿದ್ದ ಮಳೆಯಿಂದ ಟೊಮೆಟೋ ಬೆಳೆ ಸಾಕಷ್ಟು ಹಾನಿಯಾಗಿತ್ತು. ಹೀಗಾಗಿ ಮಾರುಕಟ್ಟೆಗೆ(Market) ಪೂರೈಕೆ ಪ್ರಮಾಣ ಕಡಿಮೆಯಾಗಿದೆ. ಈ ನಡುವೆ ಮದುವೆ, ಗೃಹ ಪ್ರವೇಶ, ಊರ ಹಬ್ಬ, ಜಾತ್ರೆ ಇತ್ಯಾದಿಗಳು ನಡೆಯುತ್ತಿರುವುದರಿಂದ ಎಲ್ಲೆಡೆ ಅನ್ನ ದಾಸೋಹಗಳು ನಡೆಯುತ್ತಿವೆ. ಹೋಟೆಲ್‌ಗಳು ಕೂಡ ಪೂರ್ಣ ಪ್ರಮಾಣದಲ್ಲಿ ಆರಂಭಗೊಂಡಿವೆ. ಹೀಗಾಗಿ, ಅಡುಗೆಗೆ ಟೊಮೆಟೋ ಹೆಚ್ಚಿನ ಪ್ರಮಾಣದಲ್ಲಿ ಬಳಸಲಾಗುತ್ತಿದೆ. ಆದರೆ ಬೇಡಿಕೆಗೆ ತಕ್ಕಷ್ಟು ಪೂರೈಕೆ ಇಲ್ಲದಿರುವುದರಿಂದ ಬೆಲೆಗಳು ಏರಿಕೆಯಾಗಿವೆ.