ಮಹಿಳೆಯೊಬ್ಬರಿಂದ 2.2 ಲಕ್ಷ ರೂ ಕಳವು ಮಾಡಿದ ಆರೋಪದಲ್ಲಿ 40 ವರ್ಷದ ಹೇಮಂತ್ ಕುಮಾರ್ ರಘು ಎಂಬಾತನನ್ನು ಮೂವರು ಸಹಚರರ ಜತೆ ಬಿಹಾರ ಪೊಲೀಸರು ಬಂಧಿಸಿದ್ದಾರೆ. ಶಂಕಿತರಿಂದ ನಗದು ಹಣ, ಶಸ್ತ್ರಾಸ್ತ್ರಗಳು, ಗುಂಡುಗಳು ಹಾಗೂ ಕಳವು ಮಾಡಿದ ಎರಡು ಬೈಕ್‌ಗಳನ್ನು ವಶಪಡಿಸಿಕೊಳ್ಳಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.

ವರದಿ ಪ್ರಕಾರ, ಬಂಧಿತ ರಘು ತಮಿಳುನಾಡಿನ ತಿರುವಳ್ಳೂರು ಜಿಲ್ಲೆಯ ಪೊನ್ನೇರಿ ಪೊಲೀಸ್ ಠಾಣಾ ವ್ಯಾಪ್ತಿಯ ನಿವಾಸಿಯಾಗಿದ್ದಾನೆ. ದುಬೈನಲ್ಲಿನ ಬಹು ರಾಷ್ಟ್ರೀಯ ಕಂಪೆನಿಯಲ್ಲಿ ಕೆಲಸ ಮಾಡುತ್ತಿದ್ದು, ನೈಟ್ ಕ್ಲಬ್ ನೃತ್ಯಗಾತಿ ಜತೆ ಪ್ರೀತಿಯಲ್ಲಿ ಬಿದ್ದ ಬಳಿಕ ಕೆಲಸ ಬಿಟ್ಟಿದ್ದಾಗಿ ವಿಚಾರಣೆ ವೇಳೆ ರಘು ಹೇಳಿದ್ದಾನೆ.

ತಾನು ದುಬೈನಲ್ಲಿ ನೆಲೆಸಿದ್ದಾಗ ನೈಟ್ ಕ್ಲಬ್‌ಗಳಲ್ಲಿ ಡ್ಯಾನ್ಸ್ ಮಾಡುವ ಮುಜಫ್ಫರ್‌ಪುರದ ಯುವತಿ ಪರಿಚಯವಾಗಿತ್ತು. ಆಕೆಯ ಪ್ರೀತಿಯಲ್ಲಿ ಬಿದ್ದಿದ್ದೆ ಎಂದು ಪೊಲೀಸರಿಗೆ ಆತ ತಿಳಿಸಿದ್ದಾನೆ. ಆ ಯುವತಿ ಮೂಡಿಸಿದ್ದ ಹುಚ್ಚು ಎಷ್ಟಿತ್ತೆಂದರೆ, ಆಕೆಗಾಗಿ ರಘು ಏನು ಬೇಕಾದರೂ ಮಾಡಲು ಸಿದ್ಧನಿದ್ದ. ಆಕೆಯ ನೈಟ್ ಕ್ಲಬ್ ಡ್ಯಾನ್ಸ್ ಕೆಲಸವನ್ನು ಒತ್ತಾಯ ಮಾಡಿ ಬಿಡಿಸಿದ್ದ. ಇದಕ್ಕೆ ಪ್ರತಿಯಾಗಿ ಬಿಹಾರದಲ್ಲಿನ ಆಕೆಯ ಊರಿನಲ್ಲಿ ಆಕೆ ಜತೆ ಇರುವುದಾಗಿ ಒಪ್ಪಿಕೊಂಡಿದ್ದ. ಹೀಗೆ ತಾನೂ ದುಬೈನಲ್ಲಿದ್ದ ಒಳ್ಳೆಯ ಕೆಲಸ ಬಿಟ್ಟು ಆಕೆ ಜತೆ ಕಳೆದ ವರ್ಷ ಬಿಹಾರಕ್ಕೆ ಬಂದಿದ್ದ.