ಮಂಗಳೂರು: ಪರಿಸ್ಥಿತಿ ಹಾಗೂ ಸಂದರ್ಭವನ್ನು ಅವಲೋಕಿಸದೆ ಹೇಳಿಕೆ ನೀಡಿ ಓಡಿಹೋದ ರೀತಿ ಕರಾವಳಿ ಕಾಂಗ್ರೆಸ್ಸಿನ ಮಹಿಳಾ ನಾಯಕರದ್ದು ಆಗಿದೆ ಎನ್ನುತ್ತಾರೆ ರಾಜಕೀಯ ವಿಶ್ಲೇಷಕರು.

ಇತ್ತೀಚಿಗೆ ಕರಾವಳಿಯ ಇಬ್ಬರು ಮಹಿಳಾ ನಾಯಕಿಯರು ಬಜರಂಗದಳ ಕುರಿತಂತೆ ಹೇಳಿಕೆ ನೀಡಿದ್ದರು. ಲಾವಣ್ಯ ಬಳ್ಳಾಲ್ ಹಾಗೂ ಪ್ರತಿಭಾ ಕುಳಾಯಿ ಆರಂಭದಲ್ಲಿ ಹೇಳಿಕೆ ನೀಡಿ ಆಕ್ರಮಣಕಾರಿ ವರ್ತನೆ ಪ್ರದರ್ಶಿಸಿದರು, ನಂತರ ಬಜರಂಗದಳ ಹಾಗೂ ಬಿಜೆಪಿಯ ಕೌಂಟರ್ಗೆ ಉತ್ತರ ನೀಡದೆ ಜನಸಾಮಾನ್ಯರಲ್ಲಿ ಕಾಂಗ್ರೆಸ್ ಬಗ್ಗೆ ತಪ್ಪು ಭಾವನೆ ಉಂಟಾಗುವಂತೆ ಮಾಡಿದ್ದಾರೆ ಎಂದು ಕಾಂಗ್ರೆಸ್ ನಾಯಕರೊಬ್ಬರು ಅಭಿಪ್ರಾಯಪಡುತ್ತಾರೆ.

ಕೋವಿಡ್ ನಿರ್ವಹಣೆಯಿಂದಾಗಿ ಟೀಕೆಗೊಳಗಾಗಿದ್ದ ಕರಾವಳಿ ಬಿಜೆಪಿ ತಮ್ಮ ಹಳೆ ಹಿಂದುತ್ವದ ಅಜೆಂಡಾದ ಮೂಲಕ ಜನರನ್ನು ಮತ್ತೆ ಮುಟ್ಟಲು ಈ ವಿವಾದ ಅವಕಾಶ ಮಾಡಿಕೊಟ್ಟಿದೆ ಎನ್ನುತ್ತಾರೆ ರಾಜಕೀಯ ವಿಶ್ಲೇಷಕರು.

ಈ ಎರಡು ಮಹಿಳೆ ನಾಯಕಿಯರ ಎಡವಟ್ಟಿನಿಂದಾಗಿ ಕರಾವಳಿಯ ಕಾಂಗ್ರೆಸ್ ಈ ವಿವಾದದಲ್ಲಿ ಮುಜುಗರ ಅನುಭವಿಸಬೇಕಾಗಿ ಬಂದಿದೆ ಎನ್ನುತ್ತಾರೆ ಕಾಂಗ್ರೆಸ್ಸಿನ ಹಿರಿಯ ನಾಯಕರೊಬ್ಬರು.
ಬಿಜೆಪಿಗೆ ಈ ವಿಷಯ ಬಹಳಷ್ಟು ಮೈಲೇಜ್ ಅನ್ನು ನೀಡಿದ್ದು, ಜನತೆಯ ಒಲವು ತನ್ನ ಕಡೆ ತಿರುಗುವುದನ್ನು ಬಿಜೆಪಿ ಸೂಕ್ಷ್ಮವಾಗಿ ಗಮನಿಸುತ್ತಿದೆ. ಆದರೆ ಕಾಂಗ್ರೆಸ್ ಈ ವಿಷಯಕ್ಕೆ ಸರಿಯಾಗಿ ಸಿದ್ಧತೆ ಮಾಡಿಕೊಳ್ಳದೆ ಹಾರಿಬಂದು ಹೇಳಿಕೆ ನೀಡಿ ಅದನ್ನು ಕೊನೆ ಮುಟ್ಟಿಸದೆ, ಜನಾಕ್ರೋಶಕ್ಕೆ ಒಳಗಾಗುವಂತೆ ಮಾಡಿಕೊಂಡಿದೆ ಎನ್ನುತ್ತಾರೆ ರಾಜಕೀಯ ವಿಶ್ಲೇಷಕರು.

ಚುನಾವಣೆಗೆ ಕೇವಲ ಒಂದುವರೆ ವರುಷ ಮಾತ್ರ ಬಾಕಿ ಇದೆ. ಈ ಸಂದರ್ಭದಲ್ಲಿ ಆಡಳಿತ ಪಕ್ಷದ ತಪ್ಪುಗಳು ಸಹಜವಾಗಿ ಸಿಗುತ್ತದೆ. ಆದರೆ ಕರಾವಳಿಯಲ್ಲಿ ಯುವ ನಾಯಕರುಗಳ ಎಡವಟ್ಟಿನಿಂದಾಗಿ ವಿರೋಧಪಕ್ಷವೇ ಜನರ ಒಲವನ್ನು ಕಳೆದುಕೊಳ್ಳುವ ಸ್ಥಿತಿಗೆ ಬಂದಿರುವುದು ಬಹಳಷ್ಟು ದುರದೃಷ್ಟಕರ ಎನ್ನುತ್ತಾರೆ ರಾಜಕೀಯ ವಿಶ್ಲೇಷಕರು.

ಒಟ್ಟಿನಲ್ಲಿ ಕಳೆದ ಕೆಲವು ದಿನಗಳ ಹಿಂದಿನ ವಿವಾದ ಬಿಜೆಪಿಯನ್ನು ತನ್ನ ಹಳಿಗೆ ಮರಳಿಸಿದ್ದು ಸತ್ಯ. ಕಾಂಗ್ರೆಸ್ ಮುಂದೆ ಏನು ಮಾಡುತ್ತದೆ ಎಂಬುದನ್ನು ಕಾದುನೋಡಬೇಕಾಗಿದೆ.