ಬುಧವಾರ ರಾತ್ರಿ ಅಮೆರಿಕ ಸಿರಿಯಾದ ಮೇಲೆ ದಾಳಿ ನಡೆಸಿ ಐಸಿಸ್  ಸಂಘಟನೆಯ ಮುಖ್ಯಸ್ಥನೊಬ್ಬನನ್ನು ನಿರ್ನಾಮಗೊಳಿಸಿದೆ ಎಂದು ಗುರುವಾರ ವ್ಹೈಟ್ ಹೌಸ್ ನಿಂದ ರಾಷ್ಟ್ರವನ್ನುದ್ದೇಶಿಸಿ ಸಂಕ್ಷಿಪ್ತ ಭಾಷಣ ಮಾಡಿದ ಅಮೆರಿಕ ಅಧ್ಯಕ್ಷ ಜೋ ಬೈಡೆನ್  ಹೇಳಿದರು. ‘ಕಳೆದ ರಾತ್ರಿ ಅಮೆರಿಕದ ಮಿಲಿಟರಿ ಪಡೆಗಳು ನನ್ನ ಆದೇಶದ ಮೇರೆಗೆ, ವಿಶ್ವಕ್ಕೆ ಅತಿದೊಡ್ಡ ಅಪಾಯಕಾರಿ ಭಯೋತ್ಪಾದಕನಾಗಿ ಪರಿಣಮಿಸಿದ್ದ ಹಾಜಿ ಅಬ್ದುಲ್ಲಾಹ್  ಹೆಸರಿನ ಐಸಿಸ್ ನಾಯಕನನ್ನು ಯಶಸ್ವೀಯಾಗಿ ಮುಗಿಸಿಬಿಟ್ಟಿವೆ. 2019 ರಲ್ಲಿ ಅಮೆರಿಕ ಭಯೋತ್ಪಾದನೆಯನ್ನು ಮಟ್ಟಹಾಕುವ ದಿಸೆಯಲ್ಲಿ ನಡೆಸಿದ ಕಾರ್ಯಾಚರಣೆಯಲ್ಲಿ ಅಲ್ ಭಗ್ದಾದಿಯನ್ನು ಕೊಂದ ನಂತರ ಹಾಜಿ ಅಬ್ದುಲ್ಲಾಹ್ ಅದರ ಮುಖ್ಯಸ್ಥನಾಗಿ ಗುರುತಿಸಿಕೊಂಡಿದ್ದ, ನಮ್ಮ ಪಡೆಗಳ ಪರಾಕ್ರಮದಿಂದಾಗಿ ಈ ಭಯಾನಕ ಉಗ್ರನ ಕತೆ ಮುಗಿದಿದೆ’ ಎಂದು ವ್ಹೈಟ್ ಹೌಸ್ ನ  ರೂಸ್ ವೆಲ್ಟ್ ಕೋಣೆಯಿಂದ ಮಾಡಿದ ಭಾಷಣದಲ್ಲಿ ಬೈಡೆನ್ ಹೇಳಿದರು.