ನವದೆಹಲಿ: ದೇಶದಲ್ಲಿ ತೈಲ​ ದರ ಗಗನಮುಖಿಯಾಗಿದೆ. ಹೀಗಾಗಿ ಜನ ಪೆಟ್ರೋಲ್​, ಡೀಸೆಲ್​ನ ಸಹವಾಸ ಬೇಡ ಅಂತಾ ಎಲೆಕ್ಟ್ರಿಕ್​ ವಾಹನಗಳತ್ತ ಮುಖ ಮಾಡುತ್ತಿದ್ದಾರೆ. ಆದರೆ ಕೆಲ ದಿನಗಳಿಂದ ಸಾಲು ಸಾಲು ಎಲೆಕ್ಟ್ರಿಕ್ ಸ್ಕೂಟರ್​ಗಳಲ್ಲಿ ಬೆಂಕಿ ಕಾಣಿಸಿಕೊಂಡಿದ್ದು, ಜನರಲ್ಲಿ ಆತಂಕ ಸೃಷ್ಟಿಸಿದೆ. ಈ ಮಧ್ಯೆ ಎಲೆಕ್ಟ್ರಿಕ್​ ವಾಹನ ತಯಾರಿಕಾ ಕಂಪನಿಗಳಿಗೆ ಕೇಂದ್ರ ಸಚಿವ ನಿತಿನ್ ಗಡ್ಕರಿ ಖಡಕ್ ಎಚ್ಚರಿಕೆ ನೀಡಿದ್ದಾರೆ.

ಕಳೆದ ಕೆಲ ದಿನಗಳಿಂದ ದೇಶದಲ್ಲಿ ತೈಲ ಬೆಲೆ ನಿರಂತರವಾಗಿ ಏರಿಕೆಯಾಗ್ತಿದೆ. ಪೆಟ್ರೋಲ್​, ಡೀಸೆಲ್​ ದರಗಳು ಆಕಾಶಕ್ಕೆ ಏಣಿ ಹಾಕುತ್ತಿವೆ. ಪೆಟ್ರೋಲ್​ ಬಂಕ್​ನತ್ತ ಹೋಗಬೇಕಾದ್ರೆ ಮೊದಲು ಜೇಬಲ್ಲಿರೋ ಪರ್ಸ್​ ಚೆಕ್​ ಮಾಡಬೇಕಾದ ಪರಿಸ್ಥಿತಿ ಬಂದೊದಗಿದೆ. ದುಬಾರಿ ತೈಲ ದರದಿಂದ ರೋಸಿ ಹೋಗಿರುವ ಜನರು ಪೆಟ್ರೋಲ್​, ಡೀಸೆಲ್ ವಾಹನಗಳಿಗೆ ಗುಡ್​ಬೈ ಹೇಳಿ ಎಲೆಕ್ಟ್ರಿಕ್​ ವಾಹನಗಳನ್ನ ವೆಲ್​ಕಮ್​ ಮಾಡುತ್ತಿದ್ದಾರೆ.