ಇರಾಕ್ ವಿವಾಹ ಮಸೂದೆ: ಬಾಲಕಿಯರ ಮದುವೆ ವಯಸ್ಸನ್ನು 9ಕ್ಕೆ ಇಳಿಸುವ ಪ್ರಸ್ತಾಪ; ವ್ಯಾಪಕ ಆಕ್ರೋಶ!
ಇರಾಕ್‌ನಲ್ಲಿ ಹೊಸ ಕಾನೂನನ್ನು ಪರಿಚಯಿಸಲು ನಿರ್ಧರಿಸಲಾಗಿದೆ, ಇದು ಹೆಣ್ಣುಮಕ್ಕಳ ಮದುವೆಯ ಕನಿಷ್ಠ ವಯಸ್ಸನ್ನು 9 ವರ್ಷಕ್ಕೆ ನಿಗದಿಪಡಿಸುತ್ತದೆ. ಮಸೂದೆಯನ್ನು ಇರಾಕಿ ಸಂಸತ್ತಿನಲ್ಲಿ ಮಂಡಿಸಲಾಗಿದೆ. ಇರಾಕ್‌ನ ಸಂಪ್ರದಾಯವಾದಿ ಶಿಯಾ ಪಕ್ಷಗಳು ಸಂಸತ್ತಿನಲ್ಲಿ ವೈಯಕ್ತಿಕ ಕಾನೂನಿಗೆ ತಿದ್ದುಪಡಿ ಮಾಡುವಂತೆ ಒತ್ತಾಯಿಸುತ್ತಿವೆ. ಅದು 9 ವರ್ಷ ವಯಸ್ಸಿನ ಹೆಣ್ಣು ಮಕ್ಕಳು ಮದುವೆಯಾಗಲು ಅವಕಾಶ ನೀಡುತ್ತದೆ. ಮಹಿಳಾ ಹಕ್ಕುಗಳ ಸಂಘಟನೆಗಳು ಈ ಮಸೂದೆಯ ಬಗ್ಗೆ ಕಳವಳ ವ್ಯಕ್ತಪಡಿಸಿವೆ.
ಪ್ರಸ್ತುತ ಇರಾಕ್‌ನಲ್ಲಿ ಹೆಣ್ಣುಮಕ್ಕಳ ಮದುವೆ ವಯಸ್ಸು 18 ವರ್ಷ. ಕಾಸಿಮ್ ಸರ್ಕಾರದ ಅಡಿಯಲ್ಲಿ 1959 ರಲ್ಲಿ ಜಾರಿಗೊಳಿಸಲಾದ ಕಾನೂನಿಗೆ ಬದಲಾವಣೆಗಳನ್ನು ಇರಾಕ್ ಸಂಸತ್ತಿನ ಅತಿದೊಡ್ಡ ಬಣವಾದ ಸಂಪ್ರದಾಯವಾದಿ ಶಿಯಾ ಇಸ್ಲಾಮಿಸ್ಟ್ ಪಕ್ಷಗಳ ಒಕ್ಕೂಟವು ಒತ್ತಾಯಿಸುತ್ತಿದೆ. ಸಂಸತ್ತಿನಲ್ಲಿ ಮಂಡಿಸಲಾದ ಕರಡು ಪ್ರತಿಯು ವೈಯಕ್ತಿಕ ಸ್ಥಾನಮಾನದ ಎಲ್ಲಾ ವಿಷಯಗಳಲ್ಲಿ ದಂಪತಿ ಸುನ್ನಿ ಅಥವಾ ಶಿಯಾ ಪಂಗಡದ ನಡುವೆ ಆಯ್ಕೆ ಮಾಡಬೇಕಾಗುತ್ತದೆ.
ನ್ಯಾಯಾಲಯದ ಬದಲು ಶಿಯಾ ಮತ್ತು ಸುನ್ನಿ ದತ್ತಿ ಕಚೇರಿಗಳಿಗೆ ಮದುವೆಯ ಬಗ್ಗೆ ನಿರ್ಧರಿಸಲು ಅವಕಾಶ ನೀಡುತ್ತದೆ. ಮಸೂದೆಯ ಕರಡು ಜಾಫರಿ ಕಾನೂನು ವ್ಯವಸ್ಥೆಯನ್ನು ಆಧರಿಸಿದೆ, ಜಾಫರಿ ಕಾನೂನಿಗೆ ಆರನೇ ಶಿಯಾ ಇಮಾಮ್ ಜಾಫರ್ ಅಲ್-ಸಾದಿಕ್ ಹೆಸರಿಡಲಾಗಿದೆ.
ವಧುವಿಗೆ 9, ವರನಿಗೆ 15 ವರ್ಷ ಆಗಿದ್ದರೆ ಓಕೆ!
ಇರಾಕ್ ಸರ್ಕಾರದ ಹೊಸ ಕಾನೂನಿನ ಪ್ರಕಾರ ವಧುವಿಗೆ 9 ವರ್ಷ ಹಾಗೂ ವರನಿಗೆ 15 ವರ್ಷ ಆಗಿದ್ದರೆ ಮದುವೆ ಮಾಡಬಹುದು! ಒಂದು ವೇಳೆ ಈ ಕಾನೂನು ಜಾರಿಗೆ ಬಂದರೆ ಬಾಲ್ಯ ವಿವಾಹ ಪ್ರಕರಣಗಳು ಹೆಚ್ಚುವ ಸಾಧ್ಯತೆಗಳಿವೆ ಎಂಬ ಆತಂಕ ವ್ಯಕ್ತವಾಗಿದೆ. ಮಹಿಳಾ ಹಕ್ಕುಗಳು ಹಾಗೂ ಲಿಂಗ ಸಮಾನತೆಗೆ ನಡೆಯುತ್ತಿರುವ ಹೋರಾಟಕ್ಕೆ ಭಾರೀ ಹಿನ್ನಡೆ ಆಗಲಿದೆ ಎಂಬ ಆಕ್ರೋಶದ ಕೂಗೂ ಕೇಳಿ ಬಂದಿದೆ.
ಇಸ್ಲಾಮಿಕ್ ಷರಿಯಾ ಕಾನೂನಿಗೆ ಪೂರಕ ಎಂಬಂತೆ ರಚಿತವಾಗುತ್ತಿರುವ ಈ ಹೊಸ ಕಾನೂನಿನ ವಿರುದ್ಧ ಇರಾಕ್‌ನ ಮಾನವ ಹಕ್ಕು ಸಂಘಟನೆಗಳು, ಮಹಿಳಾ ಸಂಘಟನೆಗಳು ಹಾಗೂ ಸಾಮಾಜಿಕ ಕಾರ್ಯಕರ್ತರ ಸಂಘಟನೆಗಳು ಸಿಡಿದೆದ್ದಿವೆ. ಬಾಲಕಿಯರ ಶಿಕ್ಷಣ, ಆರೋಗ್ಯ ಸೇರಿದಂತೆ ಹಲವು ವಿಚಾರಗಳಲ್ಲಿ ಈ ಕಾನೂನು ವ್ಯತಿರಿಕ್ತ ಪರಿಣಾಮ ಬೀರುತ್ತದೆ ಎಂದು ಆಕ್ರೋಶ ವ್ಯಕ್ತಪಡಿಸಲಾಗಿದೆ. ಬಾಲ್ಯ ವಿವಾಹಕ್ಕೆ ಪ್ರೋತ್ಸಾಹ ನೀಡುವುದರಿಂದ ಗರ್ಭಪಾತ, ಬಾಲ ಗರ್ಭಧಾರಣೆ, ಗರ್ಭಿಣಿಯರ ಸಾವು ಹಾಗೂ ಕೌಟುಂಬಿಕ ದೌರ್ಜನ್ಯಗಳು ಹೆಚ್ಚಳ ಆಗುತ್ತವೆ ಎಂದು ಸಂಘಟನೆಗಳು ವಾದಿಸಿವೆ.
ಇದು ಮದುವೆ, ವಿಚ್ಛೇದನ, ಉತ್ತರಾಧಿಕಾರ ಮತ್ತು ದತ್ತು ಸ್ವೀಕಾರಕ್ಕೆ ಸಂಬಂಧಿಸಿದ ನಿಯಮಗಳನ್ನು ಒಳಗೊಂಡಿದೆ. ಈ ಕರಡು ಮಸೂದೆಯನ್ನು ಸಂಸದ ರೇದ್ ಅಲ್-ಮಲಿಕಿ ಅವರು ಇರಾಕ್ ಸಂಸತ್ತಿನಲ್ಲಿ ಮಂಡಿಸಿದ್ದಾರೆ. ಕರಡಿನಲ್ಲಿ ಪ್ರಸ್ತಾಪಿಸಲಾದ ಬದಲಾವಣೆಗಳು ಮಾನವ ಹಕ್ಕುಗಳ ಕಾರ್ಯಕರ್ತರ ಅಸಮಾಧಾನವನ್ನು ಹೆಚ್ಚಿಸಿವೆ.
ಇರಾಕಿನ ಮಹಿಳಾ ಹಕ್ಕುಗಳ ವೇದಿಕೆಯ ಸಿಇಒ ತಮಾರಾ ಅಮೀರ್, ಈ ಪ್ರಸ್ತಾವಿತ ಬದಲಾವಣೆಗಳು ಇರಾಕ್‌ನಲ್ಲಿನ ಮಹಿಳೆಯರು ಮತ್ತು ಮಕ್ಕಳ ಹಕ್ಕುಗಳು ಮತ್ತು ಯೋಗಕ್ಷೇಮದ ಮೇಲೆ ಆಳವಾದ ಋಣಾತ್ಮಕ ಪರಿಣಾಮ ಬೀರುತ್ತವೆ ಎಂದು ಮಿಡಲ್ ಈಸ್ಟ್ ಐಗೆ ತಿಳಿಸಿದ್ದಾರೆ. ರಾಜಕಾರಣಿ ತನ್ನ ಒಂಬತ್ತು ವರ್ಷದ ಮಗಳ ಮದುವೆಗೆ ಅವಕಾಶ ನೀಡುತ್ತಾರಾ ಎಂದು ಪ್ರಶ್ನಿಸಿದರು. ಇರಾಕಿ ಸಮುದಾಯವು ಈ ಪ್ರಸ್ತಾಪಗಳನ್ನು ನಿಸ್ಸಂದೇಹವಾಗಿ ತಿರಸ್ಕರಿಸುತ್ತದೆ ಎಂದು ಅವರು ಹೇಳಿದರು.
ಈ ಮಸೂದೆಯನ್ನು ವಿರೋಧಿಸುವ ಜನರು ಸಂಸತ್ತಿನಲ್ಲಿ ಅಂಗೀಕಾರಗೊಂಡರೆ ಅದು ಮಹಿಳೆಯರ ಹಕ್ಕುಗಳು ಮತ್ತು ಲಿಂಗ ಸಮಾನತೆಯನ್ನು ನಾಶಪಡಿಸುತ್ತದೆ ಎಂದು ಹೇಳುತ್ತಾರೆ. ಪ್ರಗತಿಯನ್ನೂ ನಿಲ್ಲಿಸುತ್ತದೆ. ಮಾನವ ಹಕ್ಕುಗಳ ಸಂಘಟನೆಗಳು, ಸಾಮಾಜಿಕ ಸಂಘಟನೆಗಳು ಮತ್ತು ಮಹಿಳಾ ಗುಂಪುಗಳು ಈ ಮಸೂದೆಯನ್ನು ವಿರೋಧಿಸಿದವು, ಇದು ಯುವತಿಯರ ಶಿಕ್ಷಣ, ಆರೋಗ್ಯ ಮತ್ತು ಕಲ್ಯಾಣದ ಮೇಲೆ ನಿರ್ಬಂಧಗಳನ್ನು ಹಾಕುತ್ತದೆ ಎಂದು ಹೇಳಿದರು.
ಈ ಬಾಲ್ಯ ವಿವಾಹಗಳು ಮಕ್ಕಳನ್ನು ಶಾಲೆಯಿಂದ ಹೊರಗುಳಿಯುವುದು, ಅಕಾಲಿಕ ಗರ್ಭಧಾರಣೆ ಮತ್ತು ಕೌಟುಂಬಿಕ ಹಿಂಸಾಚಾರಕ್ಕೆ ಕಾರಣವಾಗುತ್ತವೆ ಎಂದು ಗುಂಪುಗಳು ವಾದಿಸಿವೆ. UNICEF ವರದಿಯ ಪ್ರಕಾರ, ಇರಾಕ್‌ನಲ್ಲಿ ಶೇ.28 ಹುಡುಗಿಯರು 18 ವರ್ಷಕ್ಕಿಂತ ಮೊದಲು ಮದುವೆಯಾಗುತ್ತಾರೆ. ದೇಶ ಮತ್ತಷ್ಟು ಹಿನ್ನಡೆಯಾಗಲಿದೆ ಎಂದು ಹ್ಯೂಮನ್ ರೈಟ್ಸ್ ವಾಚ್ ಸಂಶೋಧಕಿ ಸಾರಾ ಸಂಬಾರ್ ಹೇಳಿದ್ದಾರೆ.
