ಕೇಂದ್ರ ಹಣಕಾಸು ಸಚಿವ ನಿರ್ಮಲಾ ಸೀತಾರಾಮನ್ ಬುಧವಾರ (ಫೆ 1) ಲೋಕಸಭೆಯಲ್ಲಿ ಬಜೆಟ್ ಮಂಡಿಸಿದರು. ವಿಧಾನಸಭೆ ಚುನಾವಣೆಯ ಹೊಸಿಲಿನಲ್ಲಿರುವ ಕರ್ನಾಟಕಕ್ಕೆ ವಿಶೇಷ ಯೋಜನೆ ಘೋಷಿಸಬಹುದು ಎಂಬ ನಿರೀಕ್ಷೆಗಳಿದ್ದವು. ಭದ್ರಾ ಮೇಲ್ದಂಡೆ ಯೋಜನೆಗೆ ಅನುದಾನ ಘೋಷಣೆ ಹೊರತುಪಡಿಸಿದರೆ ಕರ್ನಾಟಕಕ್ಕೆ ನಿರ್ದಿಷ್ಟವಾಗಿ ಯಾವುದೇ ಹೊಸ ಯೋಜನೆ ಘೋಷಿಸಲಿಲ್ಲ. ಹೊಸ ತೆರಿಗೆ ಪದ್ಧತಿಯಲ್ಲಿ ವಾರ್ಷಿಕ ₹ 7 ಲಕ್ಷದವರೆಗೆ ತೆರಿಗೆ ವಿನಾಯ್ತಿ ಘೋಷಿಸಿದ್ದು ಮಧ್ಯಮ ವರ್ಗದಲ್ಲಿ ಹರ್ಷ ತಂದಿದೆ. ಈ ಬಾರಿ ಕೇಂದ್ರ ಸಚಿವರ ಬಜೆಟ್ ಭಾಷಣದ ಅವಧಿ 1 ಗಂಟೆ 25. ಬಜೆಟ್ ಭಾಷಣದಲ್ಲಿ ನಿರ್ಮಲಾ ಸೀತಾರಾಮನ್ ಒಮ್ಮೆ ಮಾತ್ರ (ಹಳೇ ವಾಹನ ನೀತಿ) ತಡವರಿಸಿ, ತಪ್ಪು ಪದಗಳನ್ನು ಉಚ್ಚರಿಸಿದರು. ಆದರೆ ತಕ್ಷಣ ಸಾವರಿಸಿಕೊಂಡು ಅದನ್ನು ಪ್ರತಿಪಕ್ಷಗಳಿಗೆ ಹೋಲಿಸುವ ಮೂಲಕ ರಾಜಕೀಯ ಪ್ರಬುದ್ಧತೆ ಮೆರೆದರು. ಬಜೆಟ್ ಭಾಷಣದ ಅತಿಮುಖ್ಯ ಅಂಶಗಳು ಇಲ್ಲಿದೆ.

• ವೈಯಕ್ತಿಕ ಆದಾಯ ತೆರಿಗೆಯಲ್ಲಿ, ಎಫ್‌ಎಂ “ರೂ. 0-3 ಲಕ್ಷ ಆದಾಯಕ್ಕೆ ತೆರಿಗೆ ಶೂನ್ಯ, 3 ಲಕ್ಷ ರೂ. ಮತ್ತು ರೂ. 5 ಲಕ್ಷದವರೆಗಿನ ಆದಾಯಕ್ಕೆ ಶೇ. 5, 6 ಲಕ್ಷಕ್ಕಿಂತ ಹೆಚ್ಚಿನ ಆದಾಯಕ್ಕೆ ಶೇ. 5 ತೆರಿಗೆ ವಿಧಿಸಲಾಗುವುದು ಮತ್ತು 9 ಲಕ್ಷದವರೆಗೆ ಶೇಕಡ 10 ತೆರಿಗೆ ವಿಧಿಸಲಾಗುತ್ತದೆ ಮತ್ತು ರೂ 12 ಲಕ್ಷ ಮತ್ತು ರೂ 15 ಲಕ್ಷದವರೆಗಿನ ಆದಾಯಕ್ಕೆ ಶೇಕಡ 20 ಮತ್ತು 15 ಲಕ್ಷಕ್ಕಿಂತ ಹೆಚ್ಚಿನ ಆದಾಯಕ್ಕೆ ಶೇಕಡ 30 ತೆರಿಗೆ ವಿಧಿಸಲಾಗುತ್ತದೆ.

• ಹೊಸ ತೆರಿಗೆ ಪದ್ಧತಿ (New Tax Regime) ಆದಾಯ ತೆರಿಗೆ ವಿನಾಯ್ತಿ ಮೊತ್ತವನ್ನು ₹ 5 ಲಕ್ಷದಿಂದ ₹ 7 ಲಕ್ಷಕ್ಕೆ ಹೆಚ್ಚಿಸಲಾಗುವುದು ಎಂದು ಸಚಿವರು ಭರವಸೆ ನೀಡಿದರು. ತೆರಿಗೆ ವಿವರಗಳನ್ನು ನೀಡಿದರು. ವಾರ್ಷಿಕ ₹ 9 ಲಕ್ಷ ವೇತನ ಪಡೆಯುವವರು ₹ 45,000 ತೆರಿಗೆ ಕಟ್ಟುತ್ತಾರೆ ಎಂದು ಸಚಿವರು ಹೇಳಿದರು.

  ಹೊಸ ತೆರಿಗೆ ದರಗಳು ಹೀಗಿವೆ…

  ₹ 3 ಲಕ್ಷದವರೆಗೆ – ಇಲ್ಲ

  ₹ 3ರಿಂದ 6 ಲಕ್ಷ – ಶೇ 5

  ₹ 6ರಿಂದ 9 ಲಕ್ಷ – ಶೇ 10

  ₹ 9ರಿಂದ 12 ಲಕ್ಷ – ಶೇ 15

  ₹ 12ರಿಂದ 15 ಲಕ್ಷ – ಶೇ 20

  ₹ 15 ಲಕ್ಷಕ್ಕೂ ಹೆಚ್ಚು – ಶೇ 30