ಉತ್ತರಪ್ರದೇಶ: ನಾಟಕದಲ್ಲಿ ಗಲ್ಲಿಗೇರಿಸುವ ದೃಶ್ಯದ ತರಬೇತಿ ಪಡೆಯುತ್ತಿದ್ದ ವೇಳೆ ಆಕಸ್ಮಿಕವಾಗಿ ಕುಣಿಕೆ ಬಿಗಿಗೊಂಡು10 ವರ್ಷದ ಬಾಲಕ ಸಾವನ್ನಪ್ಪಿದ ದಾರುಣ ಘಟನೆ ಉತ್ತರ ಪ್ರದೇಶದ ಬಾಬತ್​ ಗ್ರಾಮದಲ್ಲಿ ನಡೆದಿದೆ.

ಮೃತ ಬಾಲಕನನ್ನು ಶಿವಂ ಎಂದು ಗುರುತಿಸಲಾಗಿದೆ. ಸ್ವಾತಂತ್ರ್ಯ ದಿನಾಚರಣೆಯ ದಿನದಂದು ಸ್ವಾತಂತ್ರ್ಯ ಹೋರಾಟಗಾರ ಭಗತ್​ ಸಿಂಗ್​​ ಜೀವನಾಧಾರಿತ ನಾಟಕ ಪ್ರದರ್ಶನ ಮಾಡುವ ಸಲುವಾಗಿ ಶಿವಂ ಹಾಗೂ ಆತನ ಸ್ನೇಹಿತರು ನಾಟಕದ ತರಬೇತಿ ನಡೆಸುತ್ತಿದ್ದರು ಎನ್ನಲಾಗಿದೆ.
ನಾಟಕದ ತಾಲೀಮು ಮಾಡುವ ಸಲುವಾಗಿ ಶಿವಂ ಸ್ನೇಹಿತರು ಗುರುವಾರ ಶಿವಂ ನಿವಾಸಕ್ಕೆ ಆಗಮಿಸಿದ್ದರು. ಕೊನೆಯ ದೃಶ್ಯದ ತಾಲೀಮು ನಡೆಸುತ್ತಿದ್ದ ವೇಳೆ ಶಿವಂ ಸ್ಟೂಲ್​ ಮೇಲೆ ನಿಂತು ಕುತ್ತಿಗೆಗೆ ನೇಣು ಕುಣಿಕೆಯನ್ನು ಬಿಗಿದುಕೊಂಡಿದ್ದ. ಆದರೆ ಅಚಾನಕ್ಕಾಗಿ ಸ್ಟೂಲಿನಿಂದ ಕಾಲು ಜಾರಿದ ಪರಿಣಾಮ ಶಿವಂ ಸಾವನ್ನಪ್ಪಿದ್ದಾನೆ.