ಬೆಂಗಳೂರು: ಸರ್ಕಾರದ ಯಾವುದೇ ಸೌಲಭ್ಯ ಪಡೆಯಲು ಅವಶ್ಯವಾಗಿರುವ ಆಧಾರ್ ಕಾರ್ಡ್‌ನಲ್ಲಿ ಏನಾದರೂ ಲೋಪದೋಷವಿದ್ದಲ್ಲಿ ಸರಿಪಡಿಸಲು ಆಧಾರ್ ಕೇಂದ್ರಗಳಿಗೆ ಅಲೆಯಬೇಕಾಗಿದ್ದ ಗ್ರಾಮೀಣರಿಗೆ ಸರ್ಕಾರ ಗುಡ್ ನ್ಯೂಸ್ ನೀಡಿದೆ.
ಈಗ ತಮ್ಮ ತಮ್ಮ ಗ್ರಾಪಂ ಕಚೇರಿಗಳಲ್ಲೇ ಆಧಾರ್ ಕಾರ್ಡ್ ತಿದ್ದುಪಡಿ ಮಾಡಿಸಲು ಹಾಗೂ ಹೊಸದಾಗಿ ನೋಂದಣಿ ಮಾಡಿಸಲು ಕೇಂದ್ರ ಸ್ಥಾಪನೆಗೆ ರಾಜ್ಯ ಸರ್ಕಾರ ಆದೇಶಿಸಿದೆ. ಸದ್ಯ ರಾಜ್ಯದ 630 ಗ್ರಾಪಂಗಳಲ್ಲಿ ಮೊದಲ ಹಂತದಲ್ಲಿ ಈ ವ್ಯವಸ್ಥೆ ಜಾರಿಗೆ ಬರಲಿದೆ. ಅದಕ್ಕಾಗಿ ಗ್ರಾಪಂಗಳಿಗೆ ೨೦೦೦ ಟ್ಯಾಬ್ಲೆಟ್ ಮತ್ತು ಸಿಂಗಲ್ ಪ್ರಿಂಟ್ ದೃಢೀಕರಣ ಉಪಕರಣಗಳನ್ನು ನೀಡಲು ಸರ್ಕಾರ ಒಪ್ಪಿದೆ. 630 ಟ್ಯಾಬ್ಲೆಟ್‌ಗಳನ್ನು ರಾಜ್ಯದ 28 ಜಿಲ್ಲೆಗಳ ತಲಾ 22 ಗ್ರಾಪಂಗಳಿಗೆ ವಿತರಿಸಲು ಸಿದ್ಧತೆ ನಡೆಸಲಾಗಿದೆ.
ಗ್ರಾಪಂಗಳಲ್ಲಿ ಏನೇನು ಸೌಲಭ್ಯ?

ಗ್ರಾಮೀಣರು ಆಧಾರ್‌ನಲ್ಲಿ ಮೊಬೈಲ್ ಸಂಖ್ಯೆಯನ್ನು ಅಪ್‌ಡೇಟ್ ಮಾಡಿಸಬಹುದು. ೫ ವರ್ಷಕ್ಕಿಂತ ಕಡಿಮೆ ವಯಸ್ಸಿನ ಮಕ್ಕಳ ಆಧಾರ್ ನೋಂದಣಿ ಮಾಡಿಸಬಹುದು. ಆಧಾರ್ ತಿದ್ದುಪಡಿ ಅಥವಾ ಹೊಸದಾಗಿ ನೋಂದಣಿ ಮಾಡಿಸಲು 50 ರು. ಶುಲ್ಕ ನಿಗದಿಪಡಿಸಲಾಗಿದೆ. 5 ವರ್ಷಕ್ಕಿಂತ ಕಡಿಮೆ ವಯಸ್ಸಿನ ಮಕ್ಕಳಿಗೆ ಶುಲ್ಕ ವಿನಾಯ್ತಿ ನೀಡಲಾಗಿದೆ. ಒಂದು ವೇಳೆ ಹೆಚ್ಚುವರಿ ಶುಲ್ಕ ಅಥವಾ ಶುಲ್ಕ ವಿನಾಯ್ತಿಯಿದ್ದವರಿಂದ ಶುಲ್ಕ ಪಡೆದಲ್ಲಿ ಪಿಡಿಒ, ಡಾಟಾ ಎಂಟ್ರಿಯವರ ಮೇಲೆ ಶಿಸ್ತು ಕ್ರಮ ಕೈಗೊಳ್ಳಲಾಗುತ್ತದೆ.
ಸದ್ಯದಲ್ಲಿ ಆರಂಭ ಪಿಡಿಒ ಅನುಮೋದಿಸಲು ಅಧಿಕಾರ ನೀಡಲಾಗಿದೆ. ಜು.13 ಅಥವಾ 14 ರಂದು ಜಿಪಂ ವತಿಯಿಂದ ಅಧಿಕಾರಿಯನ್ನು ನೇಮಿಸಲಾಗುತ್ತದೆ. ಜು.19ರಂದು ಜಿಪಂನಲ್ಲಿ ಪಿಡಿಒಗಳಿಗೆ ತರಬೇತಿ ನೀಡಲಾಗುತ್ತದೆ.