ನವದೆಹಲಿ: ದೇಶದಲ್ಲಿ ಸಿಎಎ ಏಕೆ ಜಾರಿಗೊಳಿಸಬೇಕು ಎಂಬುದಕ್ಕೆ ನೆರೆಯ ರಾಷ್ಟ್ರ ಅಫ್ಘಾನಿಸ್ಥಾನದ ಪ್ರಸ್ತುತ ಪರಿಸ್ಥಿತಿ ಉತ್ತರ ನೀಡುತ್ತಿದೆ ಎಂದು ಕೇಂದ್ರ ಸಚಿವ ಹರ್ದೀಪ್ ಸಿಂಗ್ ಪುರಿ ತಿಳಿಸಿದ್ದಾರೆ.
ಭಾರತದಲ್ಲಿ ಪೌರತ್ವ ತಿದ್ದುಪಡಿ ಕಾಯ್ದೆಯ ಅಗತ್ಯತೆ ಏನು ಎಂಬುದಕ್ಕೆ ಅಫ್ಘಾನಿಸ್ಥಾನದ ಅಸ್ಥಿರ ಪರಿಸ್ಥಿತಿ ಕಾರಣ ಹೇಳುತ್ತದೆ. ಅಲ್ಲಿನ ಜನರು ಎದುರಿಸುತ್ತಿರುವ ಕರಾಳ ಪರಿಸ್ಥಿತಿ, ಮುಂದೆ ಭಾರತಕ್ಕೂ ಎದುರಾಗಬಾರದು ಎಂಬ ಸದುದ್ದೇಶದಿಂದ ಸಿಎಎ ಜಾರಿಗೆ ಕೇಂದ್ರ ಸರ್ಕಾರ ಮುಂದಾಗಿದ್ದು ಎಂದು ಅವರು ಹೇಳಿದ್ದಾರೆ.
ಹಾಗೆಯೇ ಅಫ್ಘಾನಿಸ್ಥಾನ ತಾಲೀಬಾನ್ ಉಗ್ರರ ವಶವಾದ ಬಳಿಕ, ಅಲ್ಲಿ ನೆಲೆಸಿದ್ದ ಭಾರತೀಯರು ಭಾರತಕ್ಕೆ ಹಿಂದಿರುಗಲು ಬಯಸಿದ್ದಾರೆ. ಅವರಿಗೆ ಭಾರತ ಸರ್ಕಾರ ಸಂಪೂರ್ಣ ಅನುಕೂಲ ಒದಗಿಸಿಕೊಡುತ್ತಿದೆ ಎಂದು ಹರ್ದೀಪ್ ತಿಳಿಸಿದ್ದಾರೆ.